Corruption: Thil Mulkimhuai ahi…! | ~ Dr. R. Sanga

“Corruption” kichi omzia bel ginom louhna ahihke’h Sorkar nasem thuneihna neite’n Daan kalh a agamtatna uh genna kammal ahi. Leitung pianchil apan hun sawt lou nung in mihingte lak ah korapson ana om pah ahi chih Kaina leh Abel akipan kiteltak in i ngahthei hi. Kaina leh Abel kuate hi uh hiam chih Bible in hon hilh hi. Adam leh Evi kaal a Pasian in gil a gah goutan apiak; Unau, laiguizom, piangkhawm helhel ahi uhi (Genesis 4). Khantouhna (Development) lam ah Kaina suante’n masawn in akhang hat mahmah ua; amaute’n lasak, kaihging, tumging leh siik tuzat-heizat chiteng seek lam uang bawl in khanghat mahmah uhi (Genesis 4:19-22).   

Kaina suante’n a pu-le-pate uh gitlouhna thilhihte a etton kia uh hi lou in, khelhna ahih chiang un zong kisiamtan chiing zawmah lai mi ahi uhi. Huchi in leitung ah khelhna ahong pung hulhul a: “… Toupa’n leitung ah mihing’ khelhna a thupi a, alungtang ngaihtuah pen ahoih lou lam ngen ahi ngiitnget chih athei hi” (Gen. 6:5). A sanggam pianpih, Abel pen Kaina in athat hi. Kaina in Abel a thah ziak in; Pasian in Kaina ahoupih a: “Bang diing a hiai thil mulkimhuaitak hih nata mai a….?” Himahleh Kaina in a ngaihkhawk het louh ziak in Pasian thangpai petmah ahingei diing a athuakzoh vaal, Kaina tung ah gawtna atungsak chih Genesis 4:13 & 14-na ah i mu hi.

Kaina hihna diktak Johan in hichi’n gen hi: “Migiloupa…, a unaupa Abel thatpa….” (1 John 3: 12). Kaina thilhihte pen gitlouhna thilhih ahi a; a unaupa Abel thilhihte a dikzawk ziak leh Pasian kipahlam a thil ahih ziak in Kaina in amudah hi: Huaiziak in Kaina lampi zuite khempeuh a di’a tung-gikna, manthatna leh asuan apaakte uh a diing nangawn a gawtna leh manthatna atung ua tung thei zel ahi chih Thukhun Thak in zong hon hilh hi: “Atung uh a gik hi! Kaina lampi azui ua; Punna delh in Balaam mohna ah hah tai in atai ua, Kora thukalhna ah a mangthangta uhi” (Jude 11).   

Kaina lampi zui a, punna leh mimal hamphatna delh a diktatna himhim ngeingaih lou, Balaam mohna ah chihtaktak a hah tai a tai in, Setan deihdan kipahpih niteng in apung hulhul maimah hi. Punna delh ziak in Lamka Khopi sung a lamliante kuak keukuau, tuktui luan chiang a tui vungdim zel, khua hong khaal chiang a lah leivui khu veng-vung mai, Gari bang kitattuan bouhbouh a taai in kimuktuk dekdek a om maimah: Amulkimhuai: ‘Corruption’ – Neekguk-Taakgukna leh kineeksiatna apung hulhul a…! Mahni mimal nopsakna diing delh a thaanghuaitak a gamta; mulkimna bei – Sodom leh Gomorah sualna khuk a tuaklut mi huham Lamka khopi ah atamta, tualthah nangawn poisa lou; numei naupang kumching lou nasan sualgawp a, that zawmah chihte baan ah guuktakna leh nuthawi-pathawi, nungak-tangval thanghuaina uang petmah hi. Nungak-tuailai leh nupi-laa, tuailai tangval leh pathlawi thaanghuaitak a gamta zihzeh tamtak Lamka khopi sung ah om uh ahi chih EBCC Saptuam Upa khat in agen ka zakha ngei hi. Huchibang mite atung uh agik hi! Toupa deihdan bang hi hiam chih Laisiang-Thou ah zongthak chiat le’ng i chi ahi. Mahni kituisabuah lou hamham di’n pheiphung khai in kalsuankhawm in ‘korapson’ dou souhsouh le’ng uthuai hina maizen e!!

Manipur singtang gam pumpi huap a gen in: Meivak, Lamlian, Tui-neek/Tui-dawn, Niteng Neektaak vai khosakna toh kisai a khantouhna diing in Phualpi Sorkar in sum-le-pai tam huntawk kumteng in Manipur State Government tungtawn in apia hi. Five Year Plans & Annual Plan a guanlut a om tengteng Manipur Hill Districts huapsungte ah zat bei in om gige mahleh Zodawn, singtang gamte ah adetdou, settheih bawlkhiak mit a muhtheih leh chiamteh thamching bang aom a? Akiningching tuidawn diing, khua-le-khua kikawmtuahna lamlian leh meivak chihte bang dinmun ah aom a le? Abel in Pasian deihdan toh kituak a kithoihna alat lai in Kaina ahihleh Balaam mohna ah hah tai in a tai chi a Bible a i muhbang in punna delh a thil mulkimhuai hihte tung agik hi! Huaiziak in, Abel bang a Pasian deihdan a niteng hinkhua-nuntakna  a hinpih a “DIKTATNA” delh a, punna thanghuai delh a hah tai a tai ngei lou: Aw, i lak ah kua ahiam mi muanhuai…! Thutak a ding ngam kua aom a? Huchia meivak, lamlian mam hoih leh tui neek-le-dawn kiningching i ngahtheihna diing in.… Mipi ai-oh a gensaktu, Sorkar Vaihawmna Inpi a Palai sawllut a om zelte leh Secretariat a mohpuakna leh hihna dinmun saang taktak nei, Officers-te baan a Hill District Headquarters a Officers, Sorkar nasemtute nasepdan paizia akip-akawi a theih seeng hi kei mahleh, mipite theihtuak leh theih diing chiangtan bel om ahihlam phawkkhiat kiphamoh lua ahi. Banghang hiam chihleh, i gam ah ‘Corruption’ uang lua ahihman in milip in “Awareness” neih kiphamoh petmahta hi.

Toupa’n i gam adamsak theihna diing in bel Amah deihlam bang hi hiam chih Laisiang-Thou Bu sung ah i zon a, Abel khekhap zui a Pasian lungtuak diing a kithoihna bawl in, biakdan dik a Pasian biak diing kisam hi. Bible ah kiiknawn kisam petmah hi. Dawi leh Kau biakna pen alangtang in omnawn kei mahleh; tulai nungak-tangvalte lak ah kibum chih thu khawng athang vengvung maimah hi. I Sabiakna pen hihbuah in aom a, a korap gawpta hi. Deihgohna, huaihamna leh mahni angma sialna chihte tengteng korapson in huamkha vek ahi chih thei tek ni.

Phualpi Sorkar in “Right to Information Act” (RTI): Daan abawl dungzui in mipi ai-oh di’a teelching a om mite leh Sorkar a thuneihna nei mite nasepdan paizia, sum-le-pai azatna diing diktak a zat a om leh om louh a theinuam mi khat peuh in, RTI nuai ah akisaipih thuneitute kiang ah dotna bawltheih gige ahihman in; lang lou diing a seelguk chih om thei lou asuak hi. Seelguk thugil puahzaaksak hun ahi chih mipite’n i phawk chiat theihna diing in bel khanlohna leh kikheekna eite lak ah aom kiphamoh hi. Huchibang khanlohna leh kikheekna eite lak a apiantheihna diing in “Awareness on RTI Program” aom diing kisam hi. Tua diing in NGOs leh Associations tuamtuam in nasatak a panlaak kul-le-poimoh ahi. Milip in theihna (awareness) a hi diing bangtak a i neihtheih chiang in ahoihlam a Khantouhna (Development) hong om theipan phet diing hi."

Aam Aadmi Party in India gam pumpi huap a neekguk-taakguk doudalna diing in tulai in nasatak in pan alatou lellel a; “Anti-corruption” chih thupi a nei in Delhi khopi ah tallang mahmah mai a; North-East nangawn ah zong Online tungtawn in Members tampi omta hi. Manipur State ngei ah zong “Anti-Corruption” chih thupi a nei a tangkoupih taktak ngam, pasalpha, mi hangsan District khat zel ah mi nga beek (5 x 9 = 45) omleh State Government kivaihawmna leh District Administration chiat ah ahoihlam a kikheekna om di’n uphuai hi. Aziak bel AAP paidan ah mipi nautangte deihna bang dungzui a vaihawmna pai diing chih ahihman in singtang mite a di’n bildohhuai mahmah di’n uphuai hi.

I Gam puahpha diing leh i Nam khantouhna di’n bel ngalsaute hiam gamdang apan ahihke’h pawlam mite hong pai lou hial diing uh ahi chih theikawm a, ei mahmah in lungsim tawng a ngaihsutna, sia-le-pha theihna siang toh chihtaktak a panlaak kiphamoh masapen ahi chih chiamteh tinten diing ahi. I tawpsan a paihmang diing om ahi chih thei in: Kum 1947 in Quit India Movement (for British) ana omta a; tu kum 2014 in Quit Manipur Movement (for corrupted government) chih tangkoupih thei sam le’ng maw…!!! India in Zalenna angah akipan neksiat leh siikden a mipi nautangte i om hunsung uh, kum 67 bang phathei dekta; Zomite genthei sawt lawta hi hangh…! Kaina in a unaupa Abel athah pen mulkimhuai lua bang in kilang mahleh, huai toh kibang, amulkimhuai ‘Corruption’ in i Gam hon zelsuak hita mai lou hiam? Kivelthak chiat in “Thil Mulkimhuai” dou diing in kihanchiam tek ni.