Nou mau ah Chi (salt) ki neih un By Naulak Pauthiansiam
Michih-in CHI (salt) poimohdan I theih chiat vek uh ka gingta a. Chi ahihleh thil chi tuamtuam ah ki hah zat mahmah in khenkhat te bang in ann huan chiang in buh hoihtak a amin theih na ding bang ahih ka leh meh huan chiang bang in a lim sak na ding in kha sek uhi. Hiai a igen ut pen ahih leh huai ahi kei a thil dang sau gen nawn lou in Laisiangthou in CHI toh kisai in bang ana gen hi hiam chih tomkim tak in en zual ni.
*Lei chi na hi uh: himahleh chi peng leh, bangin ahia a kihih-al nawn ding? Paihkhiaka mihingte chil gawpgawp lou ngal dingin, bangmah din a phatuam kei. (Matthai 5:13)
*Mi chih meia soh ala om ding ahi ngal a. (Marka 9:49)
*Chi a hoiha, himahleh, chi leng a pen khitin, bangin a hih-al nawn ding ua?(Luka 14:34)
Amasa pen di’n Laisiangthou a aki gelh dungzui in Gingtute’n eimah ah chi ineih chiat diu huai khah mahni
mohpuakna ahi chih thei thakthak ni. Eite chi hon kipatna I Toupa Pathian apan ahi. Eite’n I chi alna mangthang sak thei gige ihi chih leng Laisaingthou in chiangtak in ana gen a, Pathian in bel I al gige ding a deih a huai mah tuh Jesun “lei chi na hi uh” Matthai 5:13 ah ana chi hi. Hiai kammal tam lou ah Jesu’n ama saptuam te I mohpuakna uh hon thei sak nuam hi. Eite chi hong hi ding ihi kei a ahihhang in “lei chi ihi uh hi.”
Pathian in ah eite ahon hotdam lai in amau te ka hotdam di ahi chih kia a lungsim ah ngaihtuah lou in thil za pi tak toh I khelhna te apan hon hondam ana hi ahi. Eite hotdam a I om khit nung un, aman bel eite’n hiai khovel a thuneihna in neih ding uh nakpi tak in hon lamen hi. Aman I kiang uah I omna saptuam sung kia hiam a lei chi ding nahi uh hon chi zaw lou in “Lei chi na hi uh” hon na chi hi. Hiai ahon chih na san ahihleh ngaihtuah vengveng ding om a, hiai I theihsiam theih na ding in amasa in dotna tamlou iki dot uh ki phamoh a huaite bang dang hilou in, “chi al a om bang chihna? Chi in bang chi bang mel pu? Koi a hon kipan hiam? Leh bang na sem khe thei?
Genteh-na di’n Pathian in gimnam a bawl lai in, gimnam chi tuamtuam a sang a sim ahon pia a huaite lak ah cheptheihna or cheptheih thil le chi li (4) ana bawl tel a huai te banghiam ichih leh, ‘thil thuk, thil khum, thil kha leh chi al.’ Laisiangthou in ahihleh eite leitung a ding a thil a ‘kha, khum, thuk’ a siam a om ihi ana chi kei a. Himahleh, Laisiangthou in bel, “Lei chi na hi uh” hon na chi hi. Pathian in eite leng lei chi ding in ahon deih a; Huaiziak in, michih in hiai I ngaihkhok a lei chi hinkhua bang a I omna peuh a izat siam uh kita sam ahi chih phawk thakthak ni.
Job in hichin ana gen hi, “Gim neilou chi tel louin a kine thei dia hia? ahihkeileh aktuida ah limna mawngmawng a om hia?” (6:6). Bang chi’n aktui na su al thei dia? Huaituh nang leh ken chi iva soh chiang in ahong al thei pan ding hi. Huchibang in, khalam tak a gen di’n lei chi ihih theih na ding in eiten tangtak a leitung toh kisukkhakna ineih ki phamoh petmah ahi.
Huaiziak-in, Kris a ka unau te aw… koimun hiam a pawl tamlou toh ei-leh-ei kikhual a om baihlam tak in ah om theih a. Akoi abang hileh eite nasep ding ahihleh a mangthang ding-te kia Kris tanchinhoih I tut ding huai tuh I tung a Pathian deihdan ahi. Hiai bang chi leh ki hih theih ding hiam chih dotna ineih chiat uh ka gingta a, hiai hih theih na ding in lametna bei a gawtmun lam zuan a pai lellel te eiten amau Tanchinhoih toh iva ki thuzakpih poimoh petmah hi. Laisiangthou bu sung ah Jesu’n, “Va pai khia un la amau te phutluih in ka kiang ah hong ki pi lut un” ana chi kei a. Ahihhang in, Aman “ Khovel tengtengah ah pai unla, thil siamtengteng kiangah Tanchin Hoih hilh un” ana chi zaw hi (Marka 16:15; Matthai 28:16-20). Hiai mah khovel a ding a chi ihih theih na lampi khat omsun ahih banah, bang hang a Pathian in lei chi ding a hon deih tinten ahi hiam chih leng I theih siam uh ngai hi. Toupa in eite pen khamangthang te ading in CHI bang al in, khovak bang a tang ding in hong deih ahi chih theisiam thei di’n simtute honvualzawl hen…