HEMBIAK DAWH-AI By K.Lianthansang @ K Thansang Zomi

BUNG - I

KUM SangNih Leh Sawm Leh Thum (2013), February 20th. Zomi-te adia Ni thupipen a Chiamteh, ZOMI NAMNI ahi chih 'Zomi ka hi Zumpih kei ning' chiteng in i theih vek uh gintak huai hi. Kei leng huai nitak Zomi ka hih zumpih ka hi tuankei, himahleh mundang a Program ka neih ziak in KONSAT (Concert) ah ka va hoh mankei hi.

Khua votsim mah leh January kha bangzen in a vot kei. Ka program zatna ua a nunglam a ka CAmera a lim khawng la a ka om laitak in, Nungak (Tulai adia nungak hita uh) Nih hong pai ua, ka kiang ah hong tu uhi. Ka na houpih kei, himahleh amau a lawmnu toh hong kihouhou ua, a kihou ging uh ka zaklouh di lau mah a bang uhi. Minute Nga vel huchia hong om tak un, kei kiang nai zaw a ompen in ka min Khawng hon dong a,ken le ka min 'Sangboi' ahihdan ka hilh pah hi. Huai teng kia di ka sak leh Court a ding mah ka bang a,' Bang behte e?' hon chi nawn a, ken le 'Khuptong (Quptong) Dolbak...eh.!!..Dolbak hilou Balkante' chi in Ka dawng hi (Chiamnuih hat chih mahtak). Investigation Department a sem hia, ahihkei leh hoih hon sa (star) sim chi a buaitheih di hial khop in, 'College kailai maw? Koi ah? Class bangzah' hon chih behlap lai a, ken le College kai ka hihdan ka gen a, ka Class zah khawng hoihtak in ka hilh pah hi.

Huchia Sunday School Exam, Kam a Dawngpawlte bang a Dotna leh Dawnnate ka neih laitak un, Dotna dongnu a lawmte'n Refreshment sai di'n hong samkhia uhi. Huai hong sam khete lak ah ka meltheih pasal khat a omkha a, ken le, den a hon houpih nu   ki 'Maiphiat' Sim heuhau ahihman in, a min bek chu theih kon sawmta hi. Ka meltheih pa kiang ah ka va pai a, 'Huai a Refreshment hawmnu a min bang a le?' ka va chih khialkhial leh 'A min tak zaw ka thei kei, hilele a lawmte'n Margareth chi ngen in a sam ua...hoih sasim maw, kivontawi thou eive' hon na chi zungzung pah hi.

A nuam chiah kei, 'Kipah huai e leh' chih toh paikhiat ka thuah a, a tutna lam zuan a ka pai leh 'Pa Sang' chi a Numei aw nalhtak a hong kisam ka za a, mak ka sa mahmah hi. Kuate tanu a dia aw...chi kawm a ka daak kimvel leh den a Court a ka din lai a Judge nu ana hi petmah hi. Nui seusau kawm in, a khut in hon sam zauhzauh a,ka va pai leh a ' Refreshment' hawmte uh hon na pe dek a, 'Bangzah kon pe di' hon chi malam hi. Ken le 'Non deihsak zahzah' ka chih leh Nihvei bang hon petuan kha thepthup aka, Nihvei hon deihsak chu ahi peuhmah phot chih di ahi.

Ka tutna a thu kigente leh la kisate ngaikawm leh Kimuknuai kawm a ka om laitak in, ka kiang ah hong tu khat om hi'n ka thei a, himahleh ka na ngaihsak pah kei hi. Thugen lunglut tak a ngai bang a ka om leh ' Lunglut na chia, den a Pa Sang kon chih na heh hia? Bang kon chi sap di?' chi'n kamsiam tak in hon houpih hi. Ken le Ka etphei leh Margareth ana hi a,' K.Kamchinkhup thugen a ngaihnop law vele, ka behte uh eive...hehe..Non sap khak dandan anglai naubang ka na pom di' ka chih zeihzaih leh 'Lapau siam na chia, USang kon chi di aw' hon chi a, ka lu ka sing suk ngaungau lel hi.

Margareth lawmnu le hong pai nawn a, bang hiam gen in hong kihou saihsaih uhi. Margareth in,' Usang, na Camera toi nang a hia? Lim i kila uh aw?' hon chi a ken le,'Hi, kei a ahi...lim non kilakpih nuam ua leh ahi houh ke, ka lim na inn ua sazu hawlna di bek in zattheih mahmah inte' ka chih behlap leh 'Zozen eive Usang,ka lukham kawm a ka koih thinthen dia deih ka hi' hon chi bang zaw,ka BP a sang zot aka....!!

Lim ka kilak zoh un, a lawmte'n hong samkhe nawn ua, ka ki-entuah ua ka nui cheuh tuak uhi. Ka mit in thildang a munuam nawnkei, 'Love at First Sight' chi a Sapte'n ana gensekte uh a dia aw ka chi vungvung zozen hi. Margareth omna lam ah ka mit a kihei tung nak a,ka etkhak chiah, aman le hon na enkha chetchet zel hi. A Omdan tak bel, aman le hon na en-en hihtuak hi.

Zan lah Sawt deuhdeuh mai, Dak 9:00 pm hong ging hial tak in, program hong bei thei khongkhong a, mipi tampi lak ah kei le kihenlut in awl-awl a kiphu nainai kawm in, Gate lam ka zuanta uhi. Margareth te bel amau buai in abuai lai uh, himahleh va houpih a mangpha khawng vakhak bek dia hoih hina pi, ka Sisan in a ngamkei mawk hi.

Huai nitak innlam ka pai bang nuam tuam hileh kilawm zouhial hi. Tedim Road i chih uh, Sehnel Road ka sak leh, huai nitak in bel New York khopi a kongzingte bangmai a maam in ka thei top hi. Inn tungphet lupna a lumkawm in, Margareth tongsuah ningzu-khuaizu bang a khumte kon ban ngaihtuah bang zaw,lungsim a nuih heuhau louh hih didan dang a omkei. Ka kilimlak bang uh ka enzel a, Zoom theih na tantan a zoom in lupna tung ah kei kia in ka phaphet kei hi. A Sam vom, sau ngihngiah, a puansilhte lah chu ngou phihphiah in, a puan teeng in Zomi Nungak ahihdan a lang chiansak mahmah hi. A awm lak hong puak piit-peet a, 'Babri Masjit' bangmai a bou litlit pen chiah chu, 'Pucca' ahi mai ve..! Ek bang neikei leh kilawm hial hi.
Margareth in, 'Ka ek Second Hand Noupi Dimkhat ne inlan, i kiteng aw?' hon chi leh chu, 'Baltin dimkhat hi le-le ka negai zou di?' chi ut phial leng kilawm hi. Ka Digital Camera a alimte ka etzoh in, maimit sing mah leng 'Projector' bangmai in Margareth melhoihnate hong kikapkhe zungzung ta hi.
BUNG - II

MARGARETH melhoihna in ka duangtham gubang hon zen ana hi maimah hi. Zomi Namni nitak a ka muhnu bang a melhoih om nawn di'n le ka koih kei. Bollywood, Hollywood leh Maniwood te le bang ahi tuan ua,Zollywood ah Margareth pang leh Priyanka Chopra leh Katrina te bang in a minthang kei di,a chihngam huaikei.

A khenuai vun apan in a luzaang sam tanpha hoihtak in velsuak mah le 'Reject' na di himhim om di'n ka gingta kei hi. Bangziak a khatvei ka muh patna a huchi tuk a ka lungtang luahdim zou ahi dia aw, bang dawh-ai tawi a tel hiam, thelsiam kei veng..!.

New Bazar a Sazuakna uih litlit, ui leh thou phe nuainuai lak a Salei di hi awm tak a ka na om leh a sak a lampi ah, nungak Duang Ching mahmah khat hong kisawi phei ngiahngiah ka mu hi. Kei le thou leh ui lakpi a huai nungak melhoih et ka deihkhop kei, kong ah ka va pawt hial a, ka et hoih leh Margareth ana hi maimah hi. Phamsa Thangboi Mangte in a sak,' Oho....Nang nana hi maw?' chih la ka lungsim ah hong omlua ahihman in,ngaihdeuh a ka oih khiat ngiahngiah mawk leh zumlua ahi ngei dia, ka nung hon bet ekh leh ka khanglou a, ka nu'n ka nung hon beng a,' Thouta ve Sang, Zan nitak Zomi Namni Concert a Va hah laam lua a gimlua maw?' hon chi ana hi maimah hi.

Itna simthu le kilel nailou a, Margareth in ka lungtang Kumpinu hi awmtak a bangziak a hon hichi Vaihawm khum tel adiam? A Contact Number laak louh tawp in le a Facebook User Name kidong khaleh ka chi vungvung a lah kikhel ahi ta...!. Ka hun teng amah ngaihtuahna di'n ka zang a, ihmu lou zen in ka ngaihtuah zel hi.

Zanchiang zalna laikhuntung pan in lailung in Margareth ka gel zel a, a tongdam nem leh a dung etlawmte ngaihtuah in ihmutna di ka hun tamzaw ka zangbei gige hi. Margareth in a lailung in hon gel na diam! A lungsim guk bek a hon gel di khawng in ka kipehoih khemkhem sek hi. Hong nem ve maw Margareth,nanglou ngal kei zuan nemzou di omlou eive...!

Mi zatam lai ah Margareth lou kei zuan hon nemtu di midang himhim a omkei. Singdang naubang sangthei kei veng, Margareth ka hah ngaihtuah luat ziak in...! Zomi Namni zoh ni 5 a paikhit, Nitaklam dak 3 vel a, Zomi Namni a ka kilimlakte uh Creative Photoshop a Sawpsak dia ka paisuk leh thakhat thu in Margareth ka muguih hi.
Hiai hun chiah in zaw, ka Zumlou theikei. A ziak ahihleh kei Nasep van toh kibang Khekol leh Puan-ak silh ka hi a, amah ahihleh a School Uniform toh Smart tak a hong pai ahihziak ahi. A School Uniform apan in, Ebenezer Academy School a kai ahi chih ka thei ngal mai hi. Foot-Path kibawlthak liklek tawn a aduang hon hektou ziahziah ahi a,ka hah etluatziak in, 'Slow Motion' a hong pai bang in ka mu hial hi. Ken le Foot-Path ka tawnsuk tei a, himahleh Mehzuak atamluat ziak in Vegetable Path a suak a, Mehzuak te ka pelhna lam ah Gari khat bang in hon phukha dek zozen hi.

Gari in hon phutkhak dek pen Mehzuak te ziak ahi pen mai hi. A ziak ahihleh, amau Khe a paite paina di loudeuh a zuak le uh Gari in hon phukha dekkei ding hi. Ka hehtha hong suak guih a, ka Phone, mi lak a le toikhiat dia zumhuailua himahleh, 'Zogam.com, Zogamonline.com leh Phualvatimes.com' te a ka upload nuam ziak in, Lim ka baan lak ziahziah mai ta ve. Huchia kei limla a ka buai kal in, ka na mitsuansa Margareth tunna lam ka thei nawnkei...!!.

Creative Photoshop ah ka lim Sawpsak di teng Sawpsak khin in Tedim Road zul a Foot-Path ka zui suk zel hi. Foot-Path nang a van koih di atam khopmai.Himahleh Daikilkal a mite gen di a omkei, Innsawng sang taktak neite' gen dia kikoih hileh kilawm hial hi. Foot-Path te,  a gei a Dawr omte Vaihawmna gam hong suah hial chiang in zaw, ka lungsim ah Margareth ka mangngilh khazual hi.

Khawllou a pai ka hihman in theihlouh kal in New Bazar a Bus parking ka tungsukta hi. Bus Parking gei a Nidang a DustBin lianpi omna ah Waiting Shed khat kibawl om a, huaimun ah Pasal bangzah hiam om uhi.Hoihtak a ka et leh Aak puul dek mah bang diaudiau lel uhi. Margareth zong a kineih ka hi hia, ahihkei leh hehna di zong chih ka kithei kei, himahleh kik ka sawm naikei hi.

New Bazar Bus Parking a lutphei a Mission Road a Pai a, Public Ground a Football kimawlte va etzual di chih ka tupdan ahi. Mission Road ka kaanphei dek chet in, ka Phone a Message tone a ka koih, 'Excuse me Boss, U have a text Message' hong kichi a, kindeuh a ka et leh a Number Vuak +91-90895*5437 kichi apan ana hi a, ka et leh 'Pa Sang bang hih e?' chih teng kigelh leuhlauh hi. Ka ngaihtuahna a saupai khopmai. Zomi Namni nitak a Margareth hon sap dan ka ngaihtuah ngal hi.

Margareth di'n koih mah leng denchiah midangpi hi khaleh chih ziak in,' Kon theih chiah kei e, nawn kigen thei diam?' chi a ka reply leh Minute khat le paimanlou in,' Kong kigen ngam kei, ka zum' chi nawn leuleu hi. Zumna di zaw omlou lua hiven, kei migenthei daikilkal a mi ka hihlam hon thei le zaw...ka chi vungvung sam hi. A message ka thuk nawnkei a, nitak annek zoh hong hih tak in, Message hong lut nawn a, 'Usang na heh hia? Zomi Nami nitak a na kihoupih nu ka hi. Na number zongzong ing a tuni a na Class te uh khat kiang a ka lak ahi' hon chi petmah zaw, ka chimul bang thou sungsung zawzen hi.
BUNG - III

MAK ka sa mahmah mai a, 'Nang Margareth hi taktak maw? Ka number kuakiang a na lak e?' ka chih leh ' Hi Margareth ka hi. Hon thei lechin nawn text nuam nawnlouh di ka lau a kong kigen pahlouh ahi aw Usang. Na number ka lakna hon hilh leng na hehsan kha di..hehe' hon chi hi.

Bangtan hiam ka ki text nung un, 'Na number mi 10 kiang a kan ing a atawp a na Class te uh numei khat in ana neikha a..' hon chi a, ami hon gennuam tuankei. Ken le ka kan teitei tuankei a, 'Ka Number na deih khak zenzen ziak in ka kipak' ka chih leh 'Nang number penpen i deih ken, Zanlam a Dorcas Hall kong a i kituah a na number hon ngen di ka chih leh Mehzuakte lim na hah lak lua a, ka paisuak mai' hon chi hi.

Footpath a Mehzuak te ziak a Nungak kichaan loh dektak chu ahi mai ve..!. Margareth kiang ah,' Footpath a mehzuakte ziak aka, huai a Zomi Namni nitak a i kilimlak te uh Creative Photoshop a Sawpsak dia kisa keive, ka chih behlap hi. Bangteng hileh Mikang (English) te'n apau ua,'Better late than Never' chi uh hiven maw chi in ka kihehnem thei hamham uhi.

Hunte hong pai zel in,kha 2 bang hong ching tak in Ka ITNA LONGPI uh TITANIC bangmai a Tum di'n kisata hi.Ka Khualzinna uh subuai thei di atam khopmai, midang in hon sukbuai thukhat hitaleh, bang dawh-ai hiam, tuun leh Zua te' kou private long sung a hong lut mawk uh? Huih toh kithuah in alang lang ah hon mut tuahtuah tamai uhi.

Lungkhamna tuipi kihawt kal ah, ka IT 'Nanau' chi a ka sap zel Margareth in lah sih tanpha a, atongchiam te pellou a zuiden di ahihdan hon hilh zel hi. A khenchiang in, Sweet Fall Shillong a om bangmai a mite mitla, Ngaloi Water Fall a va tawmkhiat pih mai di bang ka ngaihtuah sek hi.

Bangteng tuak le ung le,ka ITNA long uh atum kei peuh leh chi in, mailam ka nawt zel uhi. Phamsa Muana Ngaihte in ,'.....Daltu Muanhuai,Tuun leh Zua te....' chih la asak chenchen khawng ka ngaihtuah vungvung sek hi. Selung khuambang ka gel chiang in, sanggah tualniam kei di'n sinlai nalua hi. Margareth kiang ah,' Na limbelh tuun leh zuate' vabang pil hile uh zaw, nunnuam a ngabang kilengkhawm di hiven maw ! Tua lah bang dawh-ai tui dawnkha ka tel diam ? Tuun leh zuate daltu muanhuai a suah tak mai uh...!' ka chi zel a, kou hihtheih omlou ahihman in, 'Sian gawmlouh a gibang khen di ka bang tamai uhi.

Muhchiil pan a ka tongsan ngaihnou, Margareth in lah a nu leh pa thute sel ngamlou ahihman in, haksatna tuipi kihawt ka pumpelh didan uh omlou suak hi. Kimuh chih lah omlou ahihman in, Muan Hangzo in a sak,'....Ngaih laukha aw hong leng in.... Ngaih laukha aw hong leng in la'n...na vangngaih tang lungzuang heh hong nem aw..' chih la mitsi diaudiau a asak khawng ka ngaihtuah a, a phuaktu le kei bangbang a ana omkha ngei ahi chih ka muchian mahmah hi.

Laa teng bang, kei a dia kituak vek abang hial hi. Maimit sing leng lah ka ngaihnou mah ka mu zel a, ihmut ka sawm zohpeuh leh ka ihmu theikei. Lunggimna zankhua zaw a sawt thei khopmai. Ka va hoh masak lai a ka nute nasep hon dot ua 'LOUKHOH' ahihdan khawng ka gen ziak bang ka ngoh khemkhem hi. Hi leng himah inte, huchi lou hileh Lengtong Pauno in,'.....Kei zong mi bang a hau hileng......' chih la ana phuak hial kei ding hi. Itna leh Deihsakna zaw a khen chiang a Sesum a lei ngai sek ana hilim hi.

A Kha a sim bang kimulou a ka om tak un, keile ka lung anuam kei a, sih leh sih chi hial in nitak khat kong kisa ta hi. A Inn kongkhak uh kiu in ka lut ngal a, a nu leh a unu (Pasal neisa) toh amah ana om uhi. A U nu'n,'Hong tu ou..' hon chi a keile munkhat ah ka tusuk ngal mai hi. Margareth in ahihleh a nute maivil bawl hia chih ka thei kei. Huai nitak bel Exam a zoh ziak ua le ka va hoh ahi hi. Margareth in, 'Tuni kai maw?' hon chi a, 'Hi kai. Nang lah, na hih hoih hia?' chih toh ka thuah suk ngal hi. Aman le,' Theilou' chih teng in hon dawng a, adang ka dongsau nuamkei. A Nu'n lah Ka Veng uh hon dot khit sa hina pi, hon dong thakthak zozen hi. Huai nitak bel anute ana siam thepthup zel hi un ka mu hi.

Ken lah gen di thei samlou, Margareth lah hou ngamlou in ka om leiluai a nuam ka sa chiah kei. Huai nitak ahihleh 5th April, 2013 ahi a, Zitawp nitak leng ahi bok hi. Bangtan hiam tawkham zen a ka tut nung in, 'Interview' chu zou ka hi nawn photmai hi. Ka pai in hon text a, 'Usang ka lungkham lua, ei kimu nawnlou di' hon chi mawk a, lamdang sakna toh ka dim ngal hi.

A ziak ka dot leh hon hilh nuam kei a, a ninawn Kiginni zingkal apan a message himhim ka mu nawnkei hi. Nitaklam ninem hun,Pathian in Adam leh Evi te a va veh hun di lak vel in, 'Execuse me boss, u have a text message' hong kichi riahriah nawn a, kinem tak a ka et leh 'Airtel' number ahi a, a last 4 digit 5632 ahi chih ka thei mialmial lai hi. Kua ahi dia aw chi kawm a ka et leh ' Usang, Margareth ka hi....ka nu te'n Phone ka toi di hon phallou ua, ka Phone hon laksak (suhsak) uh, tua ka lawmnu Phone kon zat zual ahi. Ka pawtkhiat di nasan hon phallou uh ahi,Kon ngailua..Ka sizou di' chih teng hon khak hi. Kenle diip kisai litlit kawm in, Message ka gelh zokzok a, a lawmnu Phone a hon thuzak zel di leh 7th April ka Birth Day ahihdan ka hilh hi.

BUNG – IV
LEITUNG a mimbang ka pian ni,7th.April hong tung petmah ta hi. Zing ninou hong suak in, ka Varandah uh hong salhkha phihphiah zaw,ka ngaihtuahna in hiai nizung pe'n ka Nanau Margareth himai leh ka chi vungvung sam hi. Dak 7:00 am vel in ka Phone ah message hong lut a, ka et leh ' Usang, HAPPY BIRTHDAY, ka boss te theihlouh a kon message guk ahi,hon reply se ken aw, neklim leh Pathian ni zatnuam....' chih teng hon khak a, lungkim tak in ka Phone ka sakhau ah ka guanglut ta hi.

Ka Birth Day lah Ka itpen toh zangkhwm lou di ka hi uh chih achiang khopmai. Huchia bangbang hiam ngaihtuah a innsung a ka omlai tak in, ST@Sonthang Tombing (Ka nuneu ta) in hon message a, 'Jaipur a om, lawmte Muanching hong tung a, tuni i va hoh diam?' hon chi hi. Ken le Kindeuh in ka Reply a,' Va hoh le poilou, hilele hohbaih deuh le maw?' ka chita hi. Ann khawng nezou in Sanggampa hon tot di ngak in,TV khawng ka na enta hi.

Hun bangtanhiam ka ngak nung in, Sanggampa le Nungak 2 toh a Gari ua hong taitung in, Lawmnu kianglam zuan in Ka taitou vengveng ta uhi (Old Churachandpur lam ah). Minute bangzah hiam ka tai nung un,ka tungtou ua,ka Message ua leh Lazil ahihdan hon hilh hi. Muanching mi Chihnuam tak ahi a,ngaih leng ngaihhuaih mahmah ahihman in, tangval bangzah hiam ana kalpuk khata hi.

Muanching toh Maman (A Naunu Pasal' sanggamnu) toh Lazillai, Biakinn kong ah hong pawt ua, zilzoupah di ahihdan uleh, tomchik hon na ngak di'n hon ngen ua,kou le mi inn khat ah ka na ngak uhi.

Minute 20 khawng ka ngak nung un, lazilzou ahihdan uh hon hilh ua, kou le ka nungak tonpihte uh munkhat a nawse zual in,Chennai a om Nemching@Ency Tonsing te inn ka va siik zual uhi. Huaimun a ka om sung un, a minthang Ngaloi Water Fall phak di thu ka gendawk kha uhi. Ngaloi Water Fall kichi amin in za-za mah leng atak in ka mu kha ngeikei, huaiziak tak in a guk in ka na kipak mahmah hi.

Lamka apan Nungak tonpihte taisan zual in, Ngaloi ka va pha ua, Ka pian apan mite gen minthang Ngaloi ka muh patni 7th. April, 2013 (Ka Birth Day) ahi ta hi. Mi atam mahmah mai a, Gate a lutman Rs.5 chih dan ahi hi. Ka lawmte'n tulai a mitawm ahi.Vuahtui khawng hong tam leh mi tampetmah di ahi hon chi uhi. A etnop na di himhim ka mu kei, guam lak i et chiang in lah 'Deihlouh Paih' atam mahmah a,paak sesua uh ahihman in, a etnop pen suak dek hial hi. Hiai Water Fall apan bang a kibawlkhe thei dia? Chih ngaihtuah sang in, koi ah lim kila le a nalhpen dia chihte ngaihtuah in, a hoh teng 4 (Sang Quptong,Son Thang Tombing, Crosby Maman Valte leh Muanching Valte) lim ka kibanlak uhi.

I Neih sunsun te uh a kepdan siam mai le zaw, sum tampi seng a bawl ahih ngal leh chihlouh ngal gen di ka thei kei, et di om mahmah lou, mi lim kila khawng et chimhuailua ahihman in, Ngakik apan kou le ka kikta uhi.

Muanching in,Birth Day lopna chidan hia, Zarda hon pia a nidang a hai ngei le hilou,ka hai suk zialzial leh zaw, ka sunglam ka zarda hai in a zial suk ngal a,ka dangtawng khawng a ataang om abang hial hi. Muanching a kisuanglah di lau ka hihman in,a khamlou dandan in ka om teitei hi. A khawnung a ka theih thakthak leh Chennai a om Nemching@Ency Tonsing in, Muanching kiang a Order a piak bang a kei hon haisak ekh ahihdan ka theikhe thak hi.Zarda hai asia ahi zenzen kei, hilele ahunphet theih a hoih chihman thu ahi.

Koimun peuh ah om in mite'n a va zot gige na mun uah om mah leng, Margareth ka lungsim ah vaibang thamden hi. Huchibang kawmkal ah,Ngakik apan ka paikhiat nung uh sawtlou in Muanching te inn ka tung ua, huai ah Tui khawng dawn in ka khawl zual uhi. Khawl zual chimah le ung, Muanching pen Margareth bang a bawl ka hi hia chih theihlouh in, guikhau a ka tutna toh gakkhawm ka bang maimah a, ka lawmte'n hon na paisanta uhi.

Nitaklam ninem zul in, Inn a ka u te'n hon Call ua, annek hunta ahihdan hon hilh uhi. Pathian ni ahihman in, mi kuapeuh in ann ne baih ahihman un, kei le ut leh utlouh gen om nawnlou in Innlam zuan in khaubang ka chiahta hi. Inn ka tung suk pah a, ann khawng ka nek sung un khua in hon mial khum man hi.
Nitak hong hi a, Lai le simlou in Muanching toh ki text zual in mangpha ka kikhak pah uhi.Margareth hong kilang nawn pah mai,Thousilen zaaklou a ka lup leh thoukangte'n nek dia limchi hon sa ahi ngei di ua, Miiksi bang a hon zawng sawm abang hial uhi. Malaria ana vei ngei ka hihman in,Thoukang teng ka gimneih pah a, thousileen zaak in Phone a la play kawm in ka lumsukta hi.

Thoukang lah tam, zankhua lah sawtta ahihman in, ka bilbuk a thoukang te'n zaila hong oih ging uh a ngaih khop mai. Ka la ngaih ana paipai ahi ngei dia(Ken Margareth kia ngaihtuah) , Thoukang la hong pai daldal hi. Hiai la,phuak awm ka sa mahmah mai, kei a di bang in ka na koih pah lawlaw hi. Ka bilbuk a zaila hong-awi, ka ngaihnou hi peuhmah leh chih khawng ka ngaihtuah duanduan hi.
Thoukang la ngaikawm a,Margareth le ngaihthuah kawm (DVD Cassete bangbang) a om ka kisak lai in ka Mitvunte ana ki kiss ta uhi (Ihmu ta).Ka mang in Margareth ka na hoihmuh khop mai, 'CHHUNGI TONSING MEMORIAL PARK' sung lah laitual ngabang ka na lengkhwam uhi.Tutna sau 4 om a,1 ah ka tukhawm uhi.
BUNG - V

CHHUNGI TONSING MEMORIAL PARK a tomchik om ka kisak sung un, Tungsolkha in ka omna Park uh hon taan vak phingpheng a,lungkhamna di himhim a omkei.Midang tampi le hong hoh beh ua, amau bel loupa lak khawng ah tu in nektheih leh dawntheih tuamtuam ne a, dawn in om zaizai uhi. Ken bel ka ngaihnou ka tongdam loungal nekpih zoh di ka nei kei...!!

Hun tomchik sung om ka kisaklai un, Dak 8:00 pm lam bang hong ging tou velvual man hi. I gam dinmun in zillou ahihman in Pai dia ka kisak uleh, ka sakhau apan 'Pengpelep...' hong kichi khe vongvong a, kha vak toh ka Ringtone a kituak khopmai.Ka Phone ka Pick-up dek leh Ka khanglou guih a, Alarm ka set ging ahihdan ka thei chian hi. Zalmang leltak ahihlam kon thei khia a, ka lungsim khat hi heuhau sim mah leh lungnopna kiching ka nei kei. Ka ngaihnou in bang mang aman tel diam aw, chi a ka lu beng kauhkauh kawm in ka thoutou a, thumna nei in Ka thoukheta hi.

Huaini bel Bandh ziak in Lamka khopi ah gari tai a tawm tuan mahmah mai a, AUTO service te leng a tai muh di vang mahmah uhi. Bandh ziak a College kikhak di chih ahihziak in ka mang a fuhsim toh Margareth kiang phak di simthu kon lel ta hi. Ann ne zou, dak 10:00 am khawng hong ging tak in, awl a God Gift 2 (khe) neihsun a liim sesim (Khedap sesim) toh kong pawt dokta hi. Ka vante lah Mangtom pihna van di hileh kilawm, ka khedap khawng lah mi khenkhat a dia Ek toh kibang hial ahihman in, ka zumsim mahmah hi.

Bangteng hileh, Itna in khentuam nei lah hilou a chi kawm in ka ngaihnoute innlam ka zuan zomzel a, Zuzuakna inn khenkhat le ka tawnkha hi. Suun himahleh Zudawn chu a tawmtuankei.Peg (mi chihdan) di a dia aw, zumlouh deuhna di ahihkhak leh ka chi na a,ka pian apan Khamtheih ana hihkhalou ka hihman in,ka ngam hial kei. I gam uh zaw,Christian gam le chihngam huai nawnlou eive chi nulnul kawm in maban ka suanzel hi.

Bangbang hiam ngaihtuah a ka paipai leh theihlouh kal in Margareth te inn ka tung a, Kongkhak kiuh keuhkeuh in Innsunglam apan dawnna ka ngak hi. Nihvei-thumvei ka kiuh tak in dawnna bangmah ka za kei. Kongkhak ka hong mawk leh Lupna ah Margareth unu'n a nau uh ana khim a,awl in 'Naungak a thoh di ka lauh ziak a hon dawng ngamlou ka hi aw' hon na chi a, ka lu ka su ngaungau lel hi.

Margareth ahihleh Room apan hong pawtkhia a, Innsung lumlua ahihman in,Varahdah ah ka tupawt uhi. Margareth kiang a,'Bang hih e, Ihmu maw?' ka chih leh 'Laisim ka hi.Nitak ihmut suak pahpah a' hon chi hi. Ken le,' Na laisimna hon subuai kha kei ve maw?' chi in,College lam a hihdi poimoh nei ka hihdan ka gen a (Bandh om lele,Office kikhaklou),dencia laisim thei nawnpah di ahihdan ka gen leh 'Na omlai kei dia, laisim nuam leng le...' hon chi sam hi.

Ken le den a Peg lou a paisuak ka hihman in mibang in ka gen di ka thei kei. Margareth in lah ka houna teng hon dawng. Ka hou kei leh a sam zuut-zuut mai ahih cia, Zu dawnlouh bang kisik huai dek kha zozen hi. A diktak a gen in zaw, Nungak hai deuh te'n, Pasal khamnei philphel a banglou teng a kiang ua a siatkhiat chiang ua, ngai mawk uh ahih cia, kei a di'n mun omlou ahi maimah hi. Margareth omdan apan inle a 'HEMBIAK DAWH-AI' hong dawk panpan ta hi.

Hunte hong pai zel in, keile a kiang a hoh di ka thadah deuhdeuh mai a, nikhat ka va hoh ni sunsun in, anu ana siam mahmah thepthu hi. Himahleh, hiai le 'Hembiak Dawh-ai' ahih khak di ka lau mahmah mai hi. A omdan uh a theihhak mahmah mai. Kei le 'Margareth Sathau a kikang tuam lah hilou a' chi in ka hoh nawnkei. Kholak a ka kimuh chiang unle a kibu mai a, ka houpih ngei kei.Ahehsan bel ka hi kei zel hi.

Kei adia ka ngaihnou, ama adia kei Kuaisonmark (?) hi di'n ka kigingta hi. Kingai i chih zaw, Itna i kipiaktuah cia kingai hithei lel ahi a, khat ngaih leh itna vuak in a bukim kei. Margareth in hon ngai nawnlou ahihdan ka thei, himahleh ka kiang a bangmah genlou ahihman in, lungduai tak in ka om zel hi.Ka lung abuai mahmah mai a, nahnel tung a Margareth duang etlawm tak ka enzel a ka kihehnem zel hi. Laithon ka gelh a, asung a thutuun teng gelhkim zoukei mahle tamlou kon taklang di.

'' It luat Nanau,
Dam a nuam satak a na omngei ka gingta a, hiai lai kon khak hi. Theibang sen a mel kitheilou himah le, lenchiil tongsan ka ngahnou na hi aw nau. Vangngaih simthu i sut chiil in, tuun leh zuate'n gibang khenzong leh khenzou lou ding chi a tong na chiamte theibang huut ta mai maw? Kumsawt kivei zong leh ngilh ngeikei ning..!.Lung kituak a, zan khosawt pi, gammawng sing bang i kawilai nite sul hong heikik leh chi'ng e nau.Hon ngilh ngeikei ning, Kumsawt kivei zong leh....

Nang adia Sihtanpha a Ginom,Natheihsa' chi'n ka zou a,ka khak hi.

Bangmah dawnna ka mu kei, a Birth Day July 20 ahi a, BirthDay Card khat sumneih sunsun a lei in, lawmte khat Tuangpu@ V Tuang Guite toh ka va hoh ua, Room lam ah ana om hi. Hong pawt zual dia ka sap leh ka buai hon chi a,a tawp in hong pawt khongkhong hi. Kitchen Room ah alutsuak vatvat a, tuikhawng va dim in,Tuangpu'n hong tuzual dia a nget leh 'Nasep nei ka hi' hon chihsan hi. Bangmah genlou in ka pawt a,ka pawt nung in,Tuangpu'n Card a va pia hi. HEMBIAK DAWH-AI luansiam ka BYE-BYE ta hi.

-Beita-
0816 – KAKIPAK - 2013