Nungak leh tangval hisam uchin ua, hichi om ngeetngawt den tel di na hi umaw? Ngaihsutna khuak piak a na om ngal ua, septheihna khut-le-khe bukim na neih ngal uleh a phatuam thei dideuh in leng zang ngal ta unla. Huchi lunghin a hin ngeetngawt mawk a tuh na chi-le-namte’ adia vulh thamanlou lawdeuh ngal na kei ua. Innkuan leh nam-le-gam a dia phatuam semtu hihnaak sang a houh puakgik guantu hi zomah. Bawng-ek nangawn tuklou a hichi omtel.

Tulai khangthakte vanzat hoih nei in na kiningching ua, himahleh lungsuak (creativity) leh kithalawpna na neikei uh. Nou ma a khangte’n vanzat gina a neikei ua, himahleh lungsuak leh kithalawpna anei uh. Amau hun leh nou hun teh in theihna leh vanzat ah tong-le-laam in a kikhia hi. Himahleh sepkhiatlam ah amaute tong-le-laam in na phakei uh. Huchi napi in na zumkei ua, na ginatlouhdan uh kitheilou in na kiphasak zomahlai uhi. A hawmpi na hihlam uh kitheilou in na hi eu-au lai zomah uhi.

Na tawndan uleh na pi-le-pu’ thilte uh na simmoh ua, na nelhsiah ua, bangdang simmoh leh nelhsiah hilou in noumau mah kinelhsiah na hizaw uh. Midangte’n ahon nelhsiah bawl chiang un lah na lung uh ana mahmah a, anou-le-nou le kinelhsiah kua’n hon nelhsiahlou mah dia eita? Nou-le-nou kisimmoh ngal in na kiim-le-paam un hon zahtaak a hon tung-et ding in na lam-en ua hia? Nang leh nang kizahtaak phot inla, huchi in na kiim ate’ a ding in zahtaakhuai na hi kei dia hia.

Na lapawlte khawng uleng hong zuak zelzel un, phattuamngaihna in k’onna leisak zelzel ding. Himahleh ka khamiit luat louhziak adiam ah ka ngai peih kholkei hi. Mi’ khah ka zaak chiang in leng a lathute’n khamuanna ahon piak sang un thangpaihna leh hehthasuahna ahon pezaw hi. Saptuam khat, veng khat, nam khat hibuang uchin ua, na saptuam sung, veng sung, nam sung ua piang lasak ding banghang a hichi kitaaksap tel na hi ua oi? A petheipa’n sak di ahon piakkei leh sa teitei dahmai le uteh ei voi. Ngen le uteh hon pe khamoh di hia. Huchia na nget ua a hon piakkei leh phamoh salou alel kei dia. Mi saksa teng va sak dawldawl gige azum le zum tellou na set umaw. Huchia sak ding maikhe zou mahmahlou na hih uleh na tha sente uleh na sum-le-pai sen tengteng un meithai-tagahte panpihzaw le uteh kithaman zawlel ve.

Mi na kiim ua na simmoh mahmahte uh, apau nangawn uh chiamnuih na ding leltak a na muhte nangawn uh amau hihtheih lamchiat awlmoh in akisuuk mahmah ua, lamchiteng ah a hihthei, asiam apumdimta ua, tuate’n amau hihtheih chiat ahon suah chiang un na kamka heuhou ding ua, na tuike nuih liauluai ding uhi. Nou lah kideihkhop mahmah in, kam a hi phaanphaan napi in ‘hiai lampang’ chih chiang a lah akiva ding omlou, ‘huai lampang’ chih chiang a lah omtuanlou. Na kam uh omkei leh va-ak in hon tuah peetmah ding ahi ve. A cha in na chavaih uh.

Teep-le-muan le na paakta lawzen ua, iip in na iiplahhuai uhi. Na kuva mahmah uh le kham in ka kham. Aneu-alian, amei-apa in haita luluk uteh. Huchi tel a thanuam na hih uleh tha leh sum senna ding phatuamzaw dang le atam vele. Mi leng mihing khat hisam ua, huaite lou a tutan a khophat theih uleh nou bang hituam na set ua oi? Bawngtal’ ekneel haina khaguh piak a omtuam na hi ua hia? A ngolveilou sun leng hunpi khat a omzek chia zu mah a thupipen a koih. Zu in bang hon pia aset a? Mi’ simmohna lel hilou maw na lohtaak? Mi’ simmoh leh muhsit bang ut hetlou laitei, lah mi zahtaak dia omthei mahmahlou. Na khamzek ua lah hipah phaanphaan. Nemnom gouh, zatna bei hon. Chiing duai a saat a saat zialzial di’n na hoih uh. A bang dia hai le hichi tuhkhaak khol na hi uhiam chi mahmah ke.

Numeite lah kikhangkaang (changkaang) sak a phaphetlou. Mi’n na bitna ding un kizepdan kilawm in kizeem un chile ulah theihsiam sawm khuuk omlou, seel ta lawtlawt uteh. A pot dandan a pawng a, a theep dandan a theep khawng i muh chiang a ei leng i suangtuahna in naa semlou sa na hi tha-it uh maw? Mi va boh hial ding in i sia-le-pha theihna in ahon khaam chihman hive’n. Himahleh sia-le-phatheihna in a khaamzohlouh mi tampi om a, tuate suk thathohlouh bitna ahi diam chilel akei ua hia. A nang bitna ding nang mahmah in na ngaih poimohkei leleh kua’n phamoh sa ding sa na set oi? Khovel a pasal huaizah zouzai numei khawng pawngsuallouh ding chia thuzoh baihlam zaw hia ahihkaleh nang na silh-le-teen tungtawn a kiveen baihlam zaw? A kihoihzepte’n tuahsia tuaklou chi le hisam khang, himahleh kive’n ding nang mohpuak ahi chihman thu hilel.

Na innkuante, na tanaute, na chipihte a diang a zum tuntun na hi ding in avom-akang na delh lawtlawt a, alak uah na kiphalthang khin hi. Theihkhiat in lah na om thouthou ua, huchia kideekzou mahmahlou na hih uleh na innkuante uleh na tanaute uh a dia zumna na hih sese sang un na pindan sung uah manta pum khawng toh khialsuk le uteh bang a akilamdan tuanna? A sau na deih uleh a sau, a lian na deih uleh a lian. Sum mahmah delh na hih ule lah manta pum in sum hon pekei peuhmah ve’n chin, na kipalthang touhzel mai ding uh hi’n teh. Ta bang na hon neih zenzen uleh na tate uh huchi di’n na phal na uhiam i en di uh aw.

Numei in numei ka hi chilou in na pau gaihgaih ua, kiniamkhiat nadan na theikei ua, uzawte leng ubawl nadan na theikei uhi. Mi tuisik suah ding nangawn na thasial tuntun uh. Na pi’n a louma a awlmoh a, zing nisuah a akuan a, nitum a ahong tunkiik bang in na maizaang na awlmoh a, siangthou thei bangpen in na koih hi. Huchi hinapi in na lupna kil a maimomlen hahsiang ding ahihlam na theikei. Na huangsung uh siangthou tak a koih di’n na khut na liik peihkei. Mehlim na duh a, huansiam ding a kisin na peihkei. Na pasal dite uh zaw ka hehpihhuai thei mah ve ua.

Noumau a peuhmah, mun-le-mual hi in min hitaleh, na simmoh bawl ua, namdangte a peuhmah na ngaithupi uhi. Na gam ua hun-awl zatna ding a mun kilawm leh nuam tampite zuunlou in namdang-gamdangte mun na delh doidoi uhi. Vai khat sai le utehlah sappau hiam tellou a saitheih hetlouh na sa ua, saptuam toh kisai bang hiam hilelah Hebru hiam Greek hiam tellou a hihmoh na sa uhi. Namdang pau-le-haam zang a, hihdik leh lunggeelsiam na kisak mahmah lai un na lungtang uh nuaisiahna haakkol a ataan lam langsaktu ahizaw hi.

Lailam (literature) a na dinmun uh en ve ua, hah ngam na’ng leng ahi a hia? Mi’n skul leh kolez a sintheih ding a ahon bawlsak nung ua leng sin ding neilou a mi a kawm hilimlou na hi umaw? Nou tung ate en mah dih uh, amau khomkhom in thu-le-la hunkhop ana piangsak uhi. Tangthubute, kumchin tanchinbute leh laibu himhim amau hun a kisun chihlouh muh ding bang na nei ua eita? Na Zoukhankhual bute uh, na Tongluang-Tangkoute uh koilam tunkhin na maimah ua? Huailai a stencil a gelh siatsiat a, laisunkhawl khawng a haksa tak a khawlha lem chiatchiat a bawn ana hihzoh uleh, tuhun a tablet khawng a gelh ziahziah a offset khawng a sutsut ziahziah ding hita napi a koilai a mangsak na hi ua? Sappau na awlmoh ua, skulte khawng ah naakpi in na kisinsak ua, ahi ding mah leng ahi. Khovel a i taatzohna ding in siam mahmah kuul hi. Himahleh naupang lungsim kisiam lelte amau’ pau-le-haam musit ding zen a na kichiilna tung uah demna ka hon nei hi. Paudang leh haamdang kisinsak unla, himahleh noumau a ngaihneuloh hial ding in bel hihkei un. Mosi’ nu’n Mosi tuh Pharo innsung a mi himahleh Hebrew mi ahihdan chiantak a Mosi a theihtelsak bang in sappau siam ding poimoh ahihdan naupangte na theihsiamsak kawmkawm un noumau’ pau mah keep leh zut poimoh ahihdan kiteltak in theisak un.

Tuma kum zakhat sung a khantouhna na ngah tengteng uh buk semsem a, zai semsem ding hinapi tu in na keusak gawp ua, na vulsak khin uhi. Lam chituamtuam a zaw khang ding a ana kisa saam hive uchin. Na khangthu uh suutmah ve ua, saupi leng ka chikei, na pate’ khang lel uh suut un. Bangchituk a ana khangkang uh hiam chih na mu ding uh. Himahleh huai tengteng zingkal a daikai, nisuah a thenggai bang lel ahita. Tu hun a khovel pilna na neihte uh leh na vanzat neihte uh ana nei hi maizen le uh khantouhna kalteh (development graph) ana tung (climb steeply) mah ding hive’n! Amau hunlai a a sepkhiat zah uh kimkhat leng nou pilna leh vanzat a kiningchingte’n na semkhekei lai uhi. Huchi in leng zumdan na theikei lai uh.

Na nam uh khantouhna kalteh (graph) na ma ua lui hileh naa sa in na awm uh na tuum ding uhi. Khantouhna kalteh a sangzawlam zuan a kalzel lai tuma kum sawm-le-nga lai veel a sangkuamtak tungta tuh tu in a taw dengsuk ding in a kisa hi. Mi na innvengte’n na kiakniamdan uh mu in na nunglam uah ahon nuihsan ua, na puuksiat hun ding uh taang in adai khiinkhian uhi. Nang lah huai bang khawng theisiam a patau ding in pilna neuchik beek leng na paaikei lai hi. Lamka kholai a gari thakthak khawng a tai vuvu hiam, lawmte’ lak a mobile phone thak mantampen tawi khawng thupiitna in na ngai a, huailah na puukna ding a hong hi ngal a. Na pa’ neihsa in nuamtaal inla, nang khang ahong tun chiang in sum laihsuahna ding neilou in, lah sum deih tuntun in dik-le-diklou khuallou in sum na zong ding a, atawp chiang in zaw pulh in na puul zeelzuul ding uh. Salam hileh khotaang (civilization) hileh.

Na pawlpite uh leng amau sep ding sem hiathiat peih leng a omnawnkei ua, omlouh zeen sang in chia ding maimai a hita uh. Sep ding atheih sunsun uh leng amau sep dia kilawmlou ahi zawmah laideep hi. A pawl et a zaw thil teng keem ding kichingtak om a, lailam hileh, pupa’ tawndan hileh, khotang hileh, khangtou huuthuut dia kilawm hive uchin; lah a muihkuan ngen na hi uhi. Heutupa V.Siampu in hiaitan ahon makaih nung a tua amah ahaat nawnkei leh maw na ZAA uh leng na muihsak ding uh? Mi huaizah zouzai lak a a awlmoh a akeem ding omlou na tel umaw? Na ginaatlouhdan uh kimu unla, zum tuntun un.

Khovel’ khantouhna zaalzou in thu-le-la khawng baihlam taktak in na kikumthei ua, tua ding in leng pawl tuamtuam na bawl nguut uhi. Himahleh bang chitel na hi uhiam ah thuhoih-lahoih gen a khantouh vai kikup tiptip chih om himhimlou, thu kiluikhia a ginaatkei semsem leh a kum ding tam semsem. Ana san om deuh a, hichi bang thilte ana khoihphate leng hichi na hih maimah uh zaw, lung in a lungziinhuai. Mi zaw na phakeideuh uh aka.

Skul na kailai un khangthu na sim ua, Gupta-te, Mughal-te, theih leng na thei mahmah uhi. A hong khankhiatdan uh, a lutlai uleh ahong muihdan uh ngenteltak in na sui ua, ‘Hiai kumpi ginaatlouh ziak in a lalgam akeekzaak a, amuihta,’ na chizel uhi. Tua mah bang in tu a khang omlelte tuh na nam khangthu ua, ‘Puksiatna Khang’ chi a chiamteh a om ding na hi uh. Tua ding na utkei uleh hiai ka salhnate limsak un.

Nungak-tangval i hih ngal leh om ngeetngawt louh a, bang ahia i siamna, i hihtheih; i innsung, khua, nam adi’n bang in ka pangthei dia chih zon ding ahi. Thil thupilua ahikeita zong in phamohlou. Neu chikchik hong kigawmte’n thupitak hon suang ding uhi. Huchia hih ding thei mahmahloute’n leng hihlouh ding beek theih ding ahi, Lamka a Zogam Sammetna a kitaak bang in. Ahoihlou lam a nu-le-pa leh makaite’ buaipih ding in omkei peuhmah le hang amaute naakpi a panpih kihi pah hi. Jesu’n ‘kuapeuh hon doulou tuh ka lam a pang ahi,’ achih bang in.

Vanzat a baihlamta a, tuate a phatuamthei pen ding a zatna ding ngaihsun un. Thutak hileh, chiamnuih siangthou hileh, hihtheih lamlam hih souhsouh un. Na hun awlte uh mawk zatbei louh in a phatuamthei bangpen in zang un. Na lungluut kibatpih mite zongkhia inla, muhtheih ding semkhia un. Heutupa Chinsuanthang leh a lawite’ maban sunzom ding kua na hi ua? Amau bawlkhiat ‘Slogan Ninja’ chihkhawng tutan a le na pahtaakpen uh hilou hia? A summuh na’ng sese ahikeita zong in, na lunglut ziak leh phattuamngaih ziak in sem in.

Noumau gam a mun-le-mual kilawm taktakte puah unla, a neizaw deuhte’n hun awl zatna ding in tuamunte zuan un. Zodawnlam a mun etlawm taktakte puahpha unla, khopi a om khangthakte’n tua munte ah na hun awl un kisukhalhna ding in zang un. Khotang hi in saptuam toh kisai hileh, vai na sai chiang un nou pau mahmah lunggulh un. Pawlpi hiam, vai bang hiam hitaleh, mi hitaleh, minsak ding a om chiang in noumau min mah sa un.

Na tawndan uh keembit un. Na khanglui leh vuallui late uh tu a kepbit ahihkei leh na mansuah peetmah ding uhi. Tuate’ keembit ding a pawlpi omte’n kepbitdan atheihkei uh leleng a lunglutte kipawlkhawm in keembit zok un. Tunung chiang a hihdik na kisakna ding uh ahi.

Lasak ding nei ngellou a mi’ saksa na sak dawpdawp sang un Pathian thu toh kisai lemchiinte (movie, drama) hih zaw un. Sapte’ bawlte khawng lah na en ut thei mahmah geekgawk ua. Nou le mihing thou nei ve ua le, bawl ve ua. Korea-te’ lemchiinte’n naupangte susia na chi uhi. Huchi ahihleh a korea lemchiinte lah khamzou peuhmahlou ding na hihchiang un na naupangte uh lungsim zou ding Pathian thu toh kituak bawl un. Hinkho siangthou a manphatdan tuate tungtawn in langsak un. Na naupangte un korea lemchiinte en a, tuate ngaisang a atheihkaal uh hileh, atheihlouhkaal uh hileh, azuih khaak naakkhem bang in na thilbawlte uh leng ngaisang in ahon zui khamohkei ding uhi. Veng khat in lapawl a bawl ziak a lapawl mah bawl teitei ding chihna om hia? Veng khat in hiai ahih uleh nou bang lampang na hih ding ua chih ngaihsun un. Na tha-le-zung uleh sumsente uh pammaih law mahmah ahi. La mah na chih teitei uh lelah noumau a piansak sawm unla, panla un. Sawm un. ‘Khalam thil ahi a, va mawk hih theihlouh ahi’ na chi ahi maithei. Huchia khalam thil noulak a piang ding a omkei leh sasa le uchin leng bang phattuamna a om tuan dia?

Lailam a ‘i khangkei, i khangkei’ na chihchih khawng uh noumau’ pau-le-haam ngaina ding a na naupangte uh na chiillouh ziak uh ahikha ding. Huaiziak in skul khawng ah kumchin kimawlhunte bang, kalchin kitaitehna hunte bang ah nou pau mahmah leng telsak un. Thugelhte, lavuite, tangthute, lemchiinte; hiaite in naupangte’ lungtang tokthou un. Laisim kia thupipe’n in leng ngaikei un. Naupang in bang hihthei hiam chih zonkhiat pibawl zaw un. Kimawlna, tumging, lemgelh leh adangdangte; hiaite khengvaal a mitung a na kivawkkhiat theihna ding a kongkhak hoihzaw a omkei hi.

Michih in na kivatna lamchiat uh zongkhia unla, tua na kivatna uh tuh muutkuang un. Mi, siamna leh kivatna mahmah nei, ahihhang a amah a sepkhiatdan theilou na om uleh midang hiam, pawlpi tuamtuamte hiam in zatdan siam unla, manphatak a zatdan geel un.

Na lak ua pawlpite leng kiphawng halh un. Lailam saite’n pau-le-lai ah bangchi’n i khangthei ding hiam chih awlmoh a nei in tualam a khantouhna tunthei ding mite phawng unla, tokthou unla, kithalawpna guan un. Tua bang mah in pawlpi dangdangte’n leng na huapphaakna chiangchiang uh tokhalh unla, ma sawnpih un. Naa khat pawlpi khat hiam, mimal khat hiam sep dia a gikluatleh kigawmkhawm a sepkhawmdan siam un. Hileh na gintaak kheel un na thil hihtheihdan uh na mu ding uhi. Na khantouhna ding uh ahih naakleh thasialkei un. Nakiim-napaam un ahon tup ma un kilamtou meng un. Hahkaat unla, tawlngak haatkei un. Puuksiatna khang na hihlouhna ding un kisuuk un; chia guh dawk zen a hon salh tawitawi ding ka utluat hinapi in akei mahmah bang leng bangmah ka hih tuanlouh toh noute sal ding a chitna himhim neilou ka hihdan kihaih hetlou in ka hon sal hetkei zaw hi.