Hun bangchan a hem Ukhrul ah zin theina ding lampi ka hawlhawl lai in ka mu lemchang theipua, vangphat umtak in All Tribal Students’ Union(ATSUM) te’n 2nd Manipur Tribal Cultural Exchange Programme (Enlivening our Cultural dynamics) kiti chu Ukhrul mun ah March 4-6, 2011 sung nei ding a hung vaisawm ua. Zia hun pan theina lemchang ka mu ziak in phur takmai in keile ka kisingsai. Ukhrul a hileh Manipur Mal-sua lamkai ah um a hia, Siroy Lily ziak ah mite hiat alaw a, Imphal a kipat in Km 82 vel ah gamla ahi’. A zawtna lampi chu Manipur sung a dingin a hawipen pawl in kangaitua a, himaleh lampi a kawi lumlet ziak in leh tanggam (hilly) a hiziak in dawigual ah a kihat theilo ziakin Bus ah dakkal 3 lam bang a lut zo hi. A cheng mite te chu Tangkhul (Naga) a hi deu ua, nam lian ahiziak ma un piting mama in ka mu’i.

Ukhrul a chun ka hiatkhak mi a um puai tileng; 2003-06 lai vel ah Shillong ah College ah ka classmate teu mi 2 a um ui. A min uh chu Ngarang leh Aphy ahi. Ngarang chu ahileh tangval feltak, mi pau tamlo ahia, mi piting taka hi. College ah ka lawipha pen khat ahia, ama’n le a hung ngaina mama hi. Aphy chu mi ngou, dinsang leh mi gawng lam deu a hi. Ama chu nungak feltak ahia, Kochuam ah mi kimang tak leh mi thutak mama khat ahi. A piting a, a ho nuam a, a pawl nawp bawk hi. A chet dan te’n mi lungthim azo mama a, tangval tamtak te ngaisan a law hi. A luck mama ti ding hina! College graduate nung chu ki contact kha talo in, khawilam nawt ah bang gual ah khawsa ti chu hiat but ahita puai.

Lamka lam te chu Churachandpur District Students’ Union (CDSU) te malatna chia ding ti ahi. March 4, 2011 zingkal lam dak 11 ah CDSU office, Lamka Bus Parking ah kipan ding ti himaleh lemchang zaw ding ngaituana’n CDSU Information Centre, Upper Lamka (near public ground) ah sunnung lam dak 12 vel in ka kipandawk thei ui. Keu chu CDSU executive member te, CDSU parents’ body te leh Cultural troupe te kigawm mi 80 vel ka tingzo ui. Gari chunga chun thil chuamchuam ka holim suk ua, chawmlo kal in Imphal ka tung ui. Tichun ka taizel ua, sunnung lam dak 2:30 vel in Ukhrul District sung Mahadev kitina mun ka tung ua, zia chun ka kingak khawm ui. Kingak khawm kawm ah ka chuannau gari (Winger) chu a driver pa’n a hung check leh a fan kitan a mudawk a, siam ngai ding ti ziakin ki nungle in a siam in a chia hi. Gari siam ah chiate chu a hungtung thei ta mawng mawng puau a, nitak dak 5:30 vel ahita, khua a thim pan tai. Zia phat a chun gari dang (Pic-up) khat hire sawn in dak 7 vel in ka hung kipan dawk thei kit ui. Ka Winger uh chu pick up ah theng in ka hung ki hawt suk natnat ua, ka holim uh a tui ziak adiam ah lampi sau lam le ka he man puai.

Zan lam dak 9:00 vel in Ukhrul ka tung ua, chawmkhat ka kichawl dam ui. Hiat khak khat to a um kha diam ti’n kei chu ka dak velvel a, ka lawite chule um dinga ginchak na neilo hinapi’n ka mukha diam ti hileh kilawm in ka dak velvel hi. Zia khawmpi zintun tu (Host) Tangkhul Katamnao Saklong (TKS) Nungak-tangval te chun ann ei siampiak ua, ann chu gilva takin ei neksak ua. Dak 10 vel in ka giakna ding mun uh chu ei zawtpi ua, mi chia ka tam ziak uh leh ka vaigei ziakun ka giakna ding uh chu a fel ziang thei puai. Hotel mun chuamchuam in ei khen ua, kei uh mi 10 vel chu 2 Brothers’ Hotel in ei tunsak ui. Ki sukthian na leh chawldam nung zingkal lam dak 2 vel in ka imuthei pan ui.

Zingkal chu vaima deu dak 8 vel in ka tho ah. Kisuthiang vatvat in chiana ding umle hilo in ka chang in ka pawtdawk hi. A gam umdan entha kawm leh melhiat te mukhak um diam ti hileng kilawm in ka vak velvel hi. Ukhrul town sung lampi te chu a siam laitak uh ahiziak in vak vel chu a nuam paw mama a, Bolero chu taxi ah a mang ua, zia chu mangcha’n nawpna munmun chu a phak thei hi. Ka chia masat penna ahia, khawitak chu khawitak mun ahem chule ka hediak puai. I hiat sun chulah Siroy Lily ahia, zia chu Ukhrul town akipat in Km 30 vel in a gamla, zia zaw chuleh tang sangtak kal ngai kit nalai ahi. Hiat khak/mel hiat khak bang um hileh chu va vak thei mama ding ahia ti’n ka lunggel hi.

Ukhrul TNL ground ah anne dingin zingkal lam dak 10:30 vel in gari’n ei pawdawk ua, ann chu a min nai deulo ziakin Ukhrul gound ah chun kavak velvel ah. Zia mun ma achu Programme mat ding ahia, platform hawi deu kisiam in, Manipur thingtang mi nam chuamchuam te puan achun a kizem hi. TKS Nungak-tangval te chu malzin te nek leh chak ding buaipi in a buai thei mama ui. Tui dawn ding ah ka chia phei leh Nungak jean tawka cheng, sweater puan-ak ak leh a lu puan ah tuam khat hin coffee a hung chawi phei a, mel hiat khak ei diam aw tia ka et-et leh a hung kihei phat achun katei… “Aphy…you???...” Ama’n le kintak a hung enphei in a maisua achun maksa meltak leh nui hiau kawm in chibai ka kibuk ua, a gen ding bang ka kichu hial ui. Ka gensa gual in Aphy chu Kochuam ah mi kimang leh feltak himaleh zia lam kai ah pang ngai dingin ka gingcha himhim pua, mu nuam mama himaleng le mu dingin chu ka gingcha himhim puai. Kum 5 lam bang kimu talo ka hi ziak un lunghel a um a, lungmuan a um bawk ah… a nuam mama hi. Gen di tam maleh hun tam a umlo ziakin chawmkhat ka kiho zaw un lim ka kila’u a, ki mu zel ding ti in ka kikhen ua.

Ann nek ding chu a min nailo ziakin programme ah pan masak ding in lawi upate chun a hung vaisawm ua. Keu le chia phei in ka chutna mun ding ua chun ka kichu tau ah. Chief Guest pa GK Pillai, Union Home Secretary chu a hung tun zianglo ziakin lasathiam (Artist) te chun la a hung sau a. District dang te’n lasa thiam neilo adiam uh tithei ding hial khawp in lasa te chule Lamka lam mi te ngen ahiu. Kailalmuon @Muan Hangzo, Dony, Kamboi Baite te lasak ngaithak chu a nuam a, zia ni hin thiam diak hileu akilawm ui. Hiatlo kal in keng bang ala kitat detdet ziang dan ahi. Dony diakdiak chu ka hiat patna ahiziak in thiam kasa mama a, wow..Lamka nungak ziagual aw hawi le um ahi maw ka ti hial hi. Sap la ahungsak diakdiak chu Shakira ahiziang hi.

Chief Guest pa chu a hungtung khawng ah, Cultural troupe te chun ala vaidawm ua, programme chu a kipan khawng khawng hi. Thomas Taishya, President, ATSUM in vaidawnna thu agen a, Advisor ATSUM Dr John Pulamte in ATSUM nasep tawh kisai agen ban in Apao Haokip, General Secretary ATSUM in report chawmkim takin apiai. Cultural Dance chu a masapen in Mizo Zirlai Paawl (MZP) te a lam masapen ui. Mao, Thadou-Kuki, Anal, Paite, Tangkhul leh nam chuamchuam 30 val lak in 15 vel akipat in nam lam mu nawp umtaktak te suklat ahi. Zia nam te et zinglai ah ka ngaituana um chu, thingtangmi laka le ei Non-Naga te lam hi atak (originality) hi vat deu abang kasa, Nagate ahileh chu a kivan dan teu leh a lam dan teu chu ataktak a bang diak hi. A gun a, et thatnawp a um bep hilo in lungthim a khawi zaw ahi. A nal leh kilawm lo chu bangma ahipua, a tak hina pen kha ngaisan um kasa zawi. Ei lawi in chu iha theng (modified) talua un ka mu, track bang kimang in zia chun i chawndan diktak pen uh a kisulang zo kasa puai.

Khawmpi ah Zin-gun GK Pillai chun North East thingtangmi te’n chawndawn kitup taka la kepbit thei ziak un ka hung pakcha mama hi ti’n agen a, zia chu hawitaka kembit dingin le chialna abawl hi. Masawn leh khantona dinga lekhasim tam pawimaw ahidan agen a, a hung kipatna Kerela state literacy rate 98% lam bang tungzo ahidan agen hi. Zia chu khawtin ah library umthei ziak hi’n le agen hi. Functional President DS Poonia, Chief Secretary, Manipur inle Manipur govt in gamsung ah masawnna nasep (development works) chuamchuam neite suklatna anei a, chawmkim takmai in thugenna azo hi. Programme chu zin-gun zosia’n thu agen zaw un khak in a um a, zia nung a chun lasakna, nam lam suklatna leh kipawllim na chuamchuam nei ah sutzawp ahia, nitak lam in programme a kimangzo thei pan hi. A mun chu hui a hat mama ziak in mit leh nak in a lel mama hi. Himaleh, theitawp sua’n mipi chu tawmngai takin a kipang hamham mai hi. Nitak programme achun sun sangin mi atam diak abang ah. Programme chu lasakna, lamna leh kipawl limna chuamchuam ah mat ahia, thugenna vang chu umlo ti thei phial ahi. Tamtak te chun nuamsa takmai in music git cheng leh a lam dupdup ua, khenkhat te chun dak eu-ou in a en gegu ui. Mi lam dupdup te ka et lai achun ka ngaituana thilkhat ahung kilang ah; mi a lam leh lamve thei chu pha a hidiam a hiloleh thutak deu mai ah enthatu ah pan? I kipakna te bang le i share thei leh kipak um diak hileh akilawm kasai. Bang cheng hileh I umdan leh tawidan chiat chu eima thu ngen ahi kati kit thepthup zel hi. Nitak program chu khela takmai in dak 11 vel in khak mai ahitai.

Zia programme chu Lamka lam te’n kava sulim mama ui ti ding hina. Lamka lam apat kipan te lasak chun mi a sulim diak abang a, a mipi lam te le Lamka lam mite umna mun chu a dur diak hi. Midang inle Lamka lam te chu zâna khat leh ngaisan na khat nei uh hi’n ka mui. Va ki maingal talua lampang ahidiam vang chu kahe pua, intek tak in kava um thei ui. Non-Naga te’n CCpur mite a mak asak uhle a awchat mama khat uh chu ahileh nam chuamchuam hingal ah pau kihetua thei vek hi ahi. Zia chu CCpur nawpna le a hia, I vangphat nau le ahi ban in Unau hina a sulang diak hi. Ei a dingin le ki atna leh kiletsakpi kham hi’n ka ngaitua hi.

March 5, 2011 zingkal achun dak 9 vel in ka giaknau akipat in annek na ding mun ground lam chu ka zuan phei ua. Ground achun ka nek ding uh kisiam chu a zaw nailo ziak un keu chu Lal, Mami, Dony leh Khuma tawh Coffee dawn dingin Coffe Bar atinau achun ka kichu ua. A dang khenkhat chun gari akipat in Lamka vangkhua ti la ngaitaka play in a lam zuazua ua. Coffee ka dawnzaw uh chawmkhat zaw achun ann ka ne ngal ua, an nekzaw achun ka chang ah munkhat ah ka din leh Aphy a hung phei a, ka holim ua. Ground pang langkhat lam achun awl ah vak phei kawm in ka holim ua, nunlui mualliam nung te haw gen in ka lim mama ui. A sepna uh office leh a chenna inn uh a gal in ei etsak a, khatvei a office uh bang taw tha dingin ei chial hi. Kenle ka nasep na khenkhat te ka hil hi. Chia ta ding ti thu lawite’n a hung gen phat un Aphy tawh chibai kibuk in, thu kihetua zel ding ti in phone no.te kipe tua in ka chuanna ding Bus achun ka kal hi.

Bus sung ah ka kichut achun College kai lai te bang mittha’n a hung kilang dundun a, hiat ngailo gam ah chia himaleng ka lawi (classmate) nu ziak achun lungmuang tak in ka umthei a, ka nui heuhau zaw zen hi. Langkhat lam achun lunghel bangle aum zel hi. Thil tamtak ka ngaitua na’n a hung kilang hi. Zillai i hilai in khawlu-khawchang hephalo in hun a la kimang a, zia hun chu kichai in I maban (career) ding khutvit in a kingaitua kit hi. Lawi leh pai te bangle a ki kantha tua man ki umlo in, mani a ding buaipi in a kisa vetvut hial hi. Pitin lam a kimanaw deudeu ah, bangkim in a ki titak(serious) deudeu a, hun pawimaw dan a kihedawk deudeu hi. Mani thil vaiguan(plan) dan gual in thil a um chetchet thei ta pua, inawplo na mun ahle chia angaita, I nawpna mun chule chia thei le ahi ta puai. Lunggel asang a, lunghel na ding atam hi. Lawi leh pai khenkhat chu ginchak umlo hialpi a chiana lam ah lawting mama a um ua, khenkhat chu ginchaklo pi bangma tiang tung zolo le a ki um hi. A chang leh khawvel chiadan bang le hiatthiam hak mama chang atam a, mihing kinepna leh ngaitua na bangma ahilo dan a kilang deudeu hi. Mauna ngen hi ti la sak nawp hun a tam mama hi.

Hiatlo kal in gamla pi kala tung man ua, kei hi bangbang ngaitua ka hisek de aw ti ah kei leh kei ki awimaw kawm in ngaitua na chu chawlsak phawt gua in imut ding dan ka ngaitua hi. Ka hiat manlo kal ah ala imu man hiding dan ka hia, ka khatlaw in Imphal Airport lam bang kala tung man tau.

Ukhrul apat in dak 11 vel in ka hung kipan dawk ua, lamkal ah zuntha tilo khawima’ chawllo in ka hung tai theng zarzar ua, nitak lam dak 4 vel in lenna vangkhua Lamka khawpi chu ka tung ua…. Aw…ka pianna gam, ka lenna, gamdang zosia sangin la hawi pen hi, a nuam pen hi Lamka vangkhua…..ti ah la bang phuak nawp a um hial zel hi!!!!

Published in ME on 11/3/2011