Kum 7 nung a i lunggulh leh utna mahmah mun leh mual ah i hong zingthou bang zaw,.kuamah dang en leh hazat ding a omkei ngei mai. Nipini ana hi a, zingdak 4:30 a i khanloh leh khua a na vaksiang singseng khin a, kifelsak deuh a i thohkhiat leh ka nu ann huan leh ka pi biakin a zing devotion hoh a na kuankhin ahi chih ka thei hi. New Lamka ka nutsiat lai a Hebron a om ing a, tua Pethuel a va om ka hih leh i omlouhkal a khanna lam tuamtuam a vengsung lampite, kongzingte, innte na kilamdang ahihman in ngeina banglou leh hamhaih kisaksim in a om mawk hi.
Zingdak 9:30 a Naupangte Sunday school kai ding ahihman un ankuang kikhop ka pa’n honpi a, ann nekhin naute kilawp leh phurtak in SS kai ding in a kuan ngal uhi. Dak 10:30 a Piching Nipi Skul kai ding a kisa in, dak 10 a kuan, pastor quarter a bang malam dia kisasim himahle ung meeting banghiam om a batziak in ka bang kei ua, Biakin sung a kou bialte tutna dia kisehna mun ah ka tu uhi.
Nipi Skul sinsakna ladia Pastor H Ginkhochin hongdin in hon mu a, “Delhi a i saptuam a va sem unaupa Ginsuan hong kikhawm thei a, amah heutupa Kapmin’ U ahi” chi a hon pulak in mipi mai a hon dingsak phut a, sansim tuaituai in ka dingkhia hi. Huaitan ah hunsak le hi chihsim lai in ‘Tuni a i zillai tangvom ding zilna, aman hon makaih henla, Delhi a i saptuam toh kisai kamkhat/kamnih gennop a neih omleh hong gen ngal leh’ chi a hun hon piak mawk chiang in kisuanglah kawmpi in ka va dingkhia hi. Delhi a EBC Saptuam nih omte akipan chibai bukna saulou ka gen a, EBCC Delhi a saptuam member inn omzah, milip phazah leh Nipini sun hun a kikhopna khatvei kia kinei ahihdan gen in Tangvom zilna in ka hun ka zou hi.
Sun hun in unau-sanggamte hong pawtkhawm khiukheu ua, kipak leh kilawptak chiat a houlim leh kithuahkhawm in hun ka zang uhi. Zing ann ka neklai ua voksa hong kikhum, inkuan mi 10 vel kihiven, 2kg hun inteh chi a ka lak – nitaklam ann huan huntan in unau-sanggam hong hohkhawm teng toh a pok in kon huan u chu,..nek nop zaizai vanglak e.a mi a sim in mi 32 vel ka hi ua, ka kineklim chiat zawkmah u toh a satak tankhakna’ng in mehpok a liau hokhok mahmah chih ding ahi. Hichi khawng mahmah eivoi a nopna chihsim in a omlel hi.
Ka nu le pa’n Ngathal khotaw a Kanan veng zuihsuk nilouh nung a tuilou pari bangzah hiam pel in Tuitha luipang ah kanglou ana bawl uhi. Omsung ngeingei a lou va kuankhak ding chi a kou nupa kikup sung in a pu leh pi makaih in naute gel nikhat ava kuan man uhi. Hong tunkik ua naute report ngaihkhiak bang tuh nak nop lua, a zingchiang mah a va kuanpah uthuai khop in hon genthei uhi. A lampi tot uh, tangkuang zui a sausimtak paina bang, tangkuang chitheilou tengkol peuh hon chih chiang un a kipahpih ding a tam semsem hi. Tuitha lui pang ahihziak mah in amau tuh Beach a chi mai ua, kou beach a va hoh, river le a taktak a kimu a chih chiang un inkiim-inkiangte khual chih omselou in ka nuipuak zuazua mai uhi.
A himhim in Lamka ah Sa (meat) man a tam kasa na e. Kg. a ser khat ngen hizomah kia hilou, 200/- nuai man omlou tel in chin, eikhawng a dia innlam chihman a sameh va nek khak vakhna di – a thulel a le kawkhe mawngmawnglou a vele. Deihsak leh ngaina a hon na chial leh nekpih ding a om zeuhzeuh a, amaute deihsakna zar in Bawngsa, Voksa, Aksa leh Ngasa meh bang houh va meh kha kha vial ve ung aw..
Summer Vacation a Lamka a ka om sung ngei ua Tanau leh sanggam nai zawdeuh a theihte inn aban a sikzoh/bat tantan sik himhim ka sawm khat uh ahihman in tunnung ni 3 hal in ka kipan ua, Paneu, Nuneute, Ni leh gangte, Pu leh Pite, Puzonte, Makpate, Sanggamte leh lawmngaih khenkhatte kiang a “chidam-ludam a kum 7 nung a innlam hongpai a, nou toh kimutuah thei a i om Toupa hoihna ziak ahi” chi a Toupa min lou leh kampha zang zel in kal ka suan ua, hichibang a hih in niteng bang a pawtkhiak lemtanlouh hun a om toh hun a hek vial mahmah a, a ni a sim ni 14 (kal 2 sung) hoihtak a beizou hithet hi. A mun thu ah – New Lamka sung dia le Vengnuam tawlam, Khominthang apan a khung Bethel Veng tan huam, Pearsonmun, Bungmual a le Hausa veng, Siloam Veng, Zoar Veng, Lanva leh Tangnuam tan huam ahihtel chia tuhun khawng a i ngaihtuah thak leh huchidi mah hi chih thakthak in a om a ka.
A kallak a ei sawmdan hi masalou pi a lawmhoih leh tanau nai khenkhat toh lampi a kituak, kampha a sawtlou i kidinhou i chihsung bang le hun tampi himan zel ahihchia, nikhat a inn 4 ka sikzoh ni un tuh nitak ka tawl zou mahmah un ka kithei uhi. I hohna mun peuhmah a naupang i tate vual ana omleh Question and Answer kipan hipahpah maidan ahi. “Ama min bang? Ama pa/nu kua? Aman nau/u a nei hia? Amah bangzah years? Amah Sunday school a bang class? School a class bangzah? Amah, kei adia ka bang eite? Amau toh ei bangchi kiclose? Chih dotnate za di leh dawng dia kiman simpah a ngai zel hi.
A lemtanna tantan Paupu Auto-te a tuangzel, a lemlouhna khe a inkuan a kihon zuih naihnaih,. A tangpi a nitak ann nebaih in dak 5:00 khawng a i vakkhiak leh a chiinchi thou a, nitak dak 9:00 tan bang i pawt khak ni in kongzing khawng a dai dikdiak thei sim hi. Mahni insung chiat ah zaw awlmoh leh poimoh sem a hak kiukiau a kihichiat dia hiven,..lampi dung bang thawmhau huai in a kithei hi. A ziak ngoh ding ka theikei a, ka gintak khat – Electric hoihtak a vak hileh i lamlian leh vengsung kongzingte a luunlou tuan din ka theikei hi. Electric lah a vakni a le zan dak 10 a mitzel, a vaklouh ni a le zan dak 10 vel mah a hong vak zel.. Nikhat hal a vakbaih, nikhat hal a vak hak chizawle houh a dikzaw diam ka chisim. A vakni leh vaklouhni chi nawnkei le.
Electric mih zan, poimoh ziak a pawtkhia, i kongzingte i hon zui taktak bangzaw zukham a awn diaidiaite le a mohsak huaikei un ka thei. I lampite selua, mial taleh a lampi na hoih letuh chihzia deuh di hi a, leikeu, a pawng zek hinteh chi a i sik leh tuivung kiukeu la kana hi maimah. Lam gei a tuilawng kilhna bulk hat khepi muk a i hon suih geih le tuh i nakngek tan bang hong natou zou hial a kei maw. Alkatara a kizutna nung, kipuahzoulou deuh lampi zuih sang in suanghum kisung lel, ama khom a mam lampi/kongzing nuih telhuai ka sa zaw a, huaiziak mah in khe a ka zuih ding ahih nakleh lampi suanghum kisunna munte ka tel hamtang hi. A omzia bel – I kongzing lampite a kizohna sang a a kizohmah deuh a nop laitak hizaw chihna.
Ka hamphatna uh tampi lak ah hichibang a LOU bawl a, meh leh haichi neng na tuh a na kaikhawm zou lai ding nu le pa hat leh chidam ka neih lai uh ahi. Mi tampi a khua, a inkuante kiang tung sam hinapi a nu –le –pa om nawnlou bang, om zenpi a semthei nawnlou, sem zou nawnlou bang, inkiim lel a huanhai bawlzou nawnlou ahihlai ua kou nu le pa hon na makaih zoh lai man un ka kipak kholdiak uhi. Banah, lou kuanna leh lampi tot tangkuang ngatchik sau simtak zuih ahihna ah, khua sia in lei kawt taleh haksa mahmah ding kia hilou, kizui theilou ding ahihlai a tuilou bawlte tui, a hunlel a kikhah in hon subuai kha kei a, ka va omsung ua ka loukuan khak ni chiang un lampi a kichian in a nuam mahmah a, thadam ka kisa uhi.
Related Link: Summer Vacation - 1