“Melhoih ningtui kidawnlou; melse ningtui dawn ding le om tuankei. Melse ningzu sang in melhoih pengzu limzaw na’n chia!”

hovel ah mihai omlou, ngaihdan kibatlouh manlel hi. Melsia om kei, hoih dan tuamchiat. Kimaivil in, lungsim kizongkhia in, lungsim munkhat pu in om chiat le a gilou leh phengphi omlou ding hi. Himahleh, hiai hun in bel khovel a bukim kei di. A nop kei di chih a chiang. A sam khat a om, ‘Migilou’!. Ahi migilou a minthangte zong a deihlam uh sem in, a lungsim dantak uleh a lunglutna lam uah paipih thei peuhmahle ei a dia amau(amah) kaan a migi, nunneem leh polhnuam omlou ding hi. Huaiziakin, lungsim kizontuah, kimaivil leh kimai-et tuah chihte poimawh petmah hi. Mihing kipahna i chih houchik ahi a, hehna leh lungkimlouhna te leng tuabang mah, athupi tuan kei.

Adik lel a gen in zaw a gilou leh phengphi deuh himhim le ki-om mah. Lungkim theilou, heh nilouh, muk puak kenkun den! Mi kipahhun na ngawn a le kipak lou, heh beuhbauh, thawm bang ngaih pha zozen. Pai vauvau...a hehpihhuai khop mai! Migilou, hehhaat leh lungsimse-te amau leh amau kisu lunggim lel ahi uh, chohtak uh ahi! Hehpihhuai bang ka-leh sakkiik zozen a lah mau’ deihtelna ahi zel a... Mel-le-puam i bawl theihlouh hang in lungsim leh ngaihtuahna bel kibawl theitham hi.

Hun leh kumte a kihei dungzui in i kho-hei, om dan leh gamtat zong kikhek vialvial sam hi. Mihing hihna zar in i gitlouh deuh hun leng om tham mah. Himahleh, niteng-hunteng a gilou den na ki-om laitel ahihchia. Hiai mite pen a ki-deal pihte a di’n nuamliai lou hi. Kisel pih lelah sel zoh di vual hi mahmah lou, a by-heart sa gen mah bang zungzung. Radio on toh kibang! Kei bangchu ka hehchiang a pauthei vetlou! Gen di haulua hinapi’n ka kam a kipan hongpawt thei hetlou mawk hi. Huaihun chiang in nehnou baih mahmah lai zo-mah dep, kua mah ka selzou ngeikei mah di! Kamhaat in bel kua mah zou ngeikei ning, ngap le neike’ng. Chiamnuih maimai a kisel neknek bel kua-mah lau sam ke’ng. Hon chou-chou ka chou; hon lau-lau ka lau!

Pasal gilou sang in numei gilou pen a thuak haksa zo hi. Paunakte ah intung keh leh numei gilou ana tehpih himahlou maw, a bung a chang le theinawnlou manzel i ka hia. Huan, Numei gilou phungkhen i chih leng dik di’n gingta tinten ing. Dikmah hi! Banah, pasal-te om gegu napi a numei thuneih luatna, numei vaihawmna inn sung pen a atung in hoih in a kilang maithei himahleh nikhatni chiat kilkhat beek ana sawi deidoi teitei nuam hi. Hiai ka gen hang a numei-te ka thusim kei ka chihna hipahlou hi. Numei lu-tang pasal; Pasal lu-tang Khrist.

I diklouhna leh ki-awilouhnate pen tangtak a kigen, a gentute a ding in nuamlou bangsim mahleh a zatu’ a ding in kipahhuai zaw hi. Huchilou a, hem gen duanduan hiam ahihke’h, sim-le-mal, suah-le-tum, kilkawm teng a densuak nung a i zakpat chiang in kibawl naksang in hehziak in ki-uang zaw nuam hi. Tangtak a i maitang mahmah a hon awilouhna-te uh hon tai zialzial i chihte hon it petmah, hon it ziak ua hon tai nilouh ana hi dan uh eive. En bel i theihsiamlouh man in i ning kia hilou, hontaitu nu/pa kimu-dah giap a hiven! Ninghuai zen a hon tai di neihpen hamphathuai lua ahih dan theisuah thakthak ing.

Ahi, A Sung A Kamkei Kual hial zaw a thuak tute’ a ding in a nuam liai kei hial di chih theihsa ahi. A gitlouh kia hileh pha dawm deuh di hiven, phun haat lai zo-mah! A kipahna di lah zonkhiat but tellouh. Akipah di deih a, alungsim lam hidia i gintak i hih a lah a hehna tokthoutu lel, heh-beh! Second khat beek keitung a a kipahziak a anuih mai siusiau khatvei beek mule’ng kei a di’n khovel bukim na’n chia, huai bek hi kei a dia khovel a bukim louhna. Ka tung a akipah ziak a anuihmai mule’ng ka damsung kum leng kibehlap zou ding in um tinten ing.

Midang kiang a kipak a anuih ging bel za mun mahmah ing. Anuih ging ngaihpha ngial lua-lua hi. Thawn zoizoi zozen in misu pa-tau thei di hialkhop a ngaih ahi. Himahleh, kei tung a a kipah ziak a anuih lam thei ngeike’ng, kipaksak zou mahmah lou hi’ng. Suk bel su-heh mun mahmah ing, ahihhang in ka suk-hehna san, a hehnaziak bel theizou tuang ke’ng! Ka mel in amah tawng hikha ding hi. Kei a hong muh peuhmah leh nui siusiau lai na-ngawn tawp geih, hehna in sunzom ziau lel hi. Bang chi dan melpu ka hia chia limlang a ki-en, maiphiat siang hiuhiau chouh le deihkhoplou, kipum sil sahbon 3/4 hial di khong kinuh, a hoihthei bangpen a ka kichei in zong ka mel a muh chiang in kipak tuanlou, heh veve hi!

“Na hehna uh ni in tumpih ke hen” chih leng thei lo-tel ding hi. Himahleh, zuinuamlou hia, zuilou in a theilou bang in om miumiau lel hi. Zuih ma-lak ah a hehna pen ni in suahpih, tumpih; khua in mialpih in vakpih hi. Hiai zong deihkhop chi mahmah lou lai! Hichibang mihing khovel a om di’n na gingta theihetlou hi ve’ng, tua-lah kei toh hinkhua zangkhawm hi maimah! Ahun! Ahun! Hichibang mihing hial zaw khovel a di’n hiai kia le a hun, tam ka sa lai. Adang zaw piang nawn mahmah kei heh! Itna kichi himhim neilou mihing, mihing’ mel a putziak a ‘mihing’ ka chihlel ahi. Ganhing chi le’ng le chikhial kisa kei phial ingh! Itna himhim neilou ahih man in. Kum kilawm hunkuamtak zang khawmta himahle ung hon it-tuak mahmah lou hi. Hon itlou mah hi! Ka omkhop sawt deuhdeuh ua leh hon mu dah deuhdeuh bang lai dep hi. Sihna hial tuakle’ng zong a khitui malkhat lek na-ngawn le pawtlou di hi. Mimuh dia kilawm chihziak beek a amit a achil a taat a anuaisan gilgial lel leleng kei tung a ahih din hunlua, ka phulou hizo-mah lai hi. Ahihhang in hiai le kilam-en tuan ke’ng!

Alawm-le-vual banah ama’ lamte a honghoh chiang un bel siam sawm in phaphetlou hi. Siam petmah hi. Mite’ ngaih in zaw siammah in teh himahleh a sunggil lam meima pen a muhlouh ziak mai uh ahi. Ken bel huai a meima pen musuak peuhmah ing. Suk damsak sawmsek mahle’ng sukdam sakzouke’ng, amah-mah leng suk dam ut-lou hikha ding hi. Su-dam ut le bel su damtheilo ding ahih man in. Nek-le-dawn, silh-le-teen a ahon tuamkoih dan bel gen zoh vual hilou hial hi. Paunou’ la in “Eih-hang phamawh kei chi dam peuh le’ng” a chih dan a “pha-mawh kei ka chi dam peuhleh” chihlouh kan gen di omlou hi. Ka tung a a gitlouh dan bel gen zoh vual hilou a, a sunggil meima muloute’ a di’n le git dan genvual hilou zel hi.

Kideek-dek mahle’ng kideek zounawn ke’ng. Ka thang kisai dia hunsawtpek a kiman mansa a om giugeu pen sawtkuamtak kisailou a ka koihzohnung in hiaini in bel koihzou nawn mahmah lou hi ing. Susai petmah ing. Hiai ni na-nana in chu lam dangtak in keile ka dangnaal mahmah mawk hi. Ka lungsim a ka puak gik saak zozen te laikhia a ka bu-denna hialle zaw a gen di a theitam kholsam kei. Himahleh, A Sung A Kamkei Kual na-nana chu a gum khopmai! Ka kibohtuah ua, ka thawm ging uh a ngaih lumlum telmai! Inkim-inkiangte’ patau in a hong delh kheukhou ua, mipi’ mai a ka kimaitang kawk zialzial uhi. Inn kuan khat miteng theih a hichi ompen zumhuai chihlel in le a zumhuai dan a genkha kei, “Tazou! Nakzumhuailua akei!”

Kua-mah thugen le ngai zosam omlou a ka kimaitang kawk zialzial lai un ngamkhat in ka zun suah chihtak in hongsuak guih a, huchi’n keile khanglou in zun ka va tha hi. Ka lupkiiknung in leng ka ihmu theipahkei, ka zaalmang maimai himahleh ka om a lemtheikei, nuam ka sa kei. Hichidan a taktak a tuahkhak di ka lau, ahaksat didan ka mukhollua.

Pathian vualzawlna ziak in unau pasal 5 ka pha ua, 3 in koppih neita mahle uh inn sung nuamlai suse tu a panglou a, inn kuan nuam leh kituaklai huaisang a hoihzaw, ki-itna, lemna leh muanna banah Kristian Innkuan ahong bawlpih lai man un maute’ tung leh Pathian tung ah kipahthu ka gen hi.

22/July/2013