Hun leh nite hong ki dang zel a, thil lamdang taktak mai, I khosung uah ina gingtaak ngeilouh, I mang ale ina mat ngeilouh, thil lamdang taktak mai I gamah ahong tungta hi. A zawngte zawng lam manawh deuhdeuh, a haute hau deuhdeuh, I hinkhua te uh lamdang taktak mai a hong tungta hi. Himahleh, hichi kawmkal ah hiai tantan honpi I BIak Pathian vualzawlna lamdang taktak mai, I theihlouh kal in, ina tangzel uhi, Hiai te ziakin Pathian a thakin I phat ahi.

SUANGMANTAM KISELGU chih thupi konzang a, a suangmantam vasui sawm ihikei a, Pathian vualjawlna a goutan TATE tungtang thu bangzah hiam, theihsa le himaithei, himahleh bangzah hiam, katheih khiak thak a awm manin, kikumle ichi ahi.
Neulai in tungman khawngin iki mawl zel a, hiai tungman a keuma in, I deih bang I bawl a, gentehna a Car ibol utleh car dan ibol theia, lenna I suaksak utleh I suaksak a, I deihdan dan in isawisa thei ahi. Hiai tungman I ut dandan, I deihdan dan a I sawisak mah bangin, Naupang a neulai uh, Tungman toh kana tehkak ahi.

Naupang hih a neulai in, Nu-leh-pa’n hong chih dandan in ana awm uhi, I neulai a Tungman a kimawl a I sawisak bangin, NU-Pa te’n itate uh Tungman bangin, I kepbit theih poimawh ahi chih theithakle uthuai kasa ahi. A hoihlam a ichil siam leh, tate’n thilhoih thei ding a, a sialam a I paipih khak leh, tate’n a sialam ana paipih zelthei hi. Hiai i gen nasan ahihleh, Naupang hih a lungsim uh siangthou lo mahmah ahih manin i hilh peuhmah, la hiam, thu hiam ichi hiam, i hilh peuhmah uh a let tadawng in hong kalsuan pih ua, hinkhua a ding in, hongzang tou pah uhi.

Naupang a neulai hun hih NU-Pa te’n I kepbit zohlouh a, a ut dandan hiam, amah utna hiam a hinkhua izatsak pah leh thil manpha, theih ding teng theilo a Hinkhua ana zang toupah, pal toupah ding ahi ding chih theithak le ichi ahi. Hiai stage hun hih SUANGMANTAM toh kana tehkak a, a manphat dan, amau apan thil KISELGU bangmah le awmlou a, Siangthou law mahmah ahih manin, Hiai hunah a theihna lam hiam, lunglut nalam a ipaipih uh hih poimawh mahmah mai ahi.

Ei lamka context sung bang enzualle, tulai Nu-leh-Pa te’n,I khosak nading buaipih in sepna bang ineichiat ta ua, Nu-leh-Pate’n itate ki enkai man nawnlo, awmpih neichiat, I awmpih te’n itate bangteng khawng ana hilh di’ing uh a, chih kitheilo, hiai hun ah I tate’n I theihlouh kalin, a hinkhua uh manpha taktak maite uh a chan maimah uhi. A hong khanglian ua, I theihlouh kalin, tun louh ding tantan ana tung ua, huai hunchiang I gentheih, I saktheih uh a awmkei huaiziak in Naupang a neu apan a chiil siam hih poimawh petmah, amau apan a aki selgu SUANGMANTAM bang a manpha hih mansuah keini ichi ahi.

Ennawnle I society sungah, I society uh selua ichi hiam, awmtak, ten taak nawnlo chiin khatvei vei I kampau in ina zangsek kha uhi. Kei ngaihdan inah, I society sunga thil hoihlo tam law mahmah ina chihte ukha, I innsung ah kivel thak in, ki enchain le eimah ihi a society sunga thilhoih le hoihlo, ei ah hong kinga mahmah in kathei ahi. I tate bang I innsung a bangteng hih a chih ki enchain le ina gingtaak louh pipi in I innsung ah a awmkha maithei hi. Huai ziakin, ei I innsung, I tate, tute, enkol zoule I society sia aki chichi theilai diam, chih ngaihdan nei kahi.
Naupang HINKHUA hih I innsung a ina kizat dan zir inle, hong khangkhia hi. Huaite tamlo enzualle-------
1. MI GENSIATHAT inkuan a hong khanglet leh, DEMNATE’N hinkhua a zang hi.
2. Mi DIKTAT inkuan a hong khanglet leh, ZAHTAAKNA lungsim hinkhua zang hi.
3. ENNA inkuan a hong khanglet leh, HAHZATNA hinkhua azang hi.
4. JUAUTHEI inkuan a hong khanglet leh, KHEMHAT Hinkhua te a zang.
5. HANGSANNA inkuan a hong khanglet leh, KIMUANNA ngamna hinkhua anei hi.

Hiai teng kon baan gensuk a, a dangle tampi a awmlai di’ing, Naupang hih a neulai hun uh, a manphat dan I theih thak uh poimawh kasa a, I insung I mi gensiat hiam, juauthei hiam a I family ua ina kizat khak leh, I ut leh utlouh thu hilou in, I tate’n le Hong zuipah uh ahi, chih theithak thak le uthuai kasa.

I tate uh hih a manphatdan theithak le uthuai kasa a, I NEULAI hun uh a poimawh pen in kana koih a, I nute’n, pate’n hong hilh teng, a Bible chang hongzir sak teng, I skul kailai a, lehkha hong hilh teng uh tuni tan inle a mangkei a, huaiziak in Hiai stage hunsung hih a manphat bangin, I Naupangte uh suangmantam toh kana tehkak hi. Unau kuapeuh mah I suangmantam kiselgu pholh khethak di’ing in ikichial thak thak ahi.