Ka Vei Mahmah Thil ~Muana Tunglut
Kuapeuh Zomi zosuan kichi ta phot michih in lungtup leh lamet a i neih chiat uh tuh i Zo hihna mawk lungkimpih hiam himai louin Zo minam tuamtuamte tuibang luangkhawm a, ngabang i bualkhawm hun ding ahi chi lehang i genkhial khol kei ding uhi. Tua jiak mahin tuni'n i omna mun chiat uah tua Zogam Pallut Ni ding ngaklah in i kikou vengvung uhi. Ahihhangin, tulaiin tua i lungtup leh lamet, Zogam Pallut Ni ding dal thei ding thil tampi hong kimung lellel om a; namdang pasal neih, ta neih tawm, nau sukkiak, nau nei theilou dia kibawl, siamna pilna teng namdang/gamdang laka va zang bei, Zogam pemkhiak san, Israel a kipia, gam neilou banga kingaihna leh simleivai leh namsung paidan theihna tasam, namdan/tawndan nelhsiah leh pau kitheihtuah louh chihte lak ah i Zo minam khanmohbawk lian mahmah 'damsung kum tom' lua chih pen I sutbing deuh sin ding.
Ministry of Health and Family Welfare, Government of India in India gama Vaite pung hat lua pen dalna dingin Family Planning kichi pankhia a, a tup pen 'ta neih tawm' ahi hi. Himahleh tuni'n ei Zosuan te'n Vaite kisa i di uam ah hiai Family Planning ina pibawl mahmah ua, 2012-2013 adi'n a bawl hoih pen hihna lawmman peuh i sang maimah khawng uhi (Mizoram in India gam adia Family Planning jui hoih pen sang a, Churachandpur District in Manipur adia Family Planning jui hoih pen sang). Huchibang a naupiang i tawm hiaihiai lai un, a si kitawm tuan lou a, huai naksangin teksih apan lasih in i kesuk ua, kum 10 sungin i growth rate uh 21% apan 17% in keniam a, tuabang jel a I paitouh jel leh 2021 ah 10%, 2031 ah 4%, 2041 ah -3% i hi ding ua, I gam uah namdang pumdim pah ta ding ua, i gou teng luah gai ding ua, Zomi kichi pen tangthu mai suak nengnawn ding hi.
Lamka khopi sunga hanmual 12 leh Aizawl khopi sunga hanmual 9 apat misite kum akipan sutdan in ei Zosuan mimal khat damsung kum tangpi tuh kum 57.9 ahi. Khovela damsung kum tam pente East Asia ahi a, kum 89.3 dam tangpi uhi. Huchi hitaleh ei Zo suante kum 59.9 kia dam maimah ding maw? Mizoram a misi tampen Kuva leh laijial jiak ahi a, Churachandpur District a sihnate bel a jiak tam mahmah a, tuate lah Zu uang mahmah hi. Hiai i damsung kum tom lua pen in khang kibansam bawlthei hi. I damdawi inn neih sunsunte uh fang lehang damlou a tamzaw tekse lam hilou in kum 30-45 kikal khawng hi maimah ua, i gamsung uah pitek putek muh ding vang panpan ta hi. Tuabang jel a i paitouh jel uleh, i minam in pun malakin kiam lam nawt tou jel ding ua, hun tomkha chik sungin eimau gamsung ngei ah namneu kisuak hithet ding hi.
Huaijiakin, nampi khat suah taktak i tup uleh, i misiamte leh gam-le-nam makai te'n panlak hun mahmah ta hi. Hiai i milip tawm luat jiakin tuni'n khopi thupi leh suanhuai kinei nailou a, i gamsung natan ah nasemtu ding i kidaih kei uhi. Hiai anuai a bangin panla thak lehang uthuai hi:
1. Damsung sutom thei - kuva, laijial, khaini, dummuam leh zanah apan khamtheih bawlkhiak himhim peuhmah khaam bikbek ding
2. I nam adia poikhoihtu lianpen leh hon nuaimang thei hiai namdang pasal neih tawpsan ding. A nei teitei om leh i gam ua pan nohkhiak hiam omsak louh tup teitei ding
3. Zosuan Zomi ka hi chi peuhmah te'n i gam ua inn leh lou neih chiat ding
4. Zosuan nupa kop peuh te'n a loupen a ta 7 sanga tamjaw neih teitei sawm ding
5. I minam sung ua mihausa deuh te'n polam a inn nalh taktak lam mailou a, mahni khopi a lam chiat ding
6. Gamdang a luang phum mailou a, mahni gama siluang vui chiat ding
7. Mahni gama nasem guaitu te'n namdang guai mailou a, eimi mah goih sawm ding
8. I gam ua sumsinnate eimi mahin kivaipuak ding. Namdang kithununsak louh ding.
9. Nau sukkiak, nau neilou dia kibawl chihte tawpsan ding
10. Ei-le-ei kar a dan mumal leh tawndan ngelnget tak paipih ding.