Ka room kong hong ki tuum ging bom bom a, a hon khawng ta zaw zen ven ka pillow delh phah tawh, tuanglai teng in le hong zeel ta ven! Ka ngaihsak louh sawm hang in, ki tum bom bom zom zel ahihman in ka nawl khin thei nawn kei."Ka ihmu ut lai, bang a!?" chi a lup na tung apat ka dot ge ga le, "Thou meng ou, ka thawmhau lua" chih aw ka hon zak chi'an ka u in hong phawng hi phiangsan ven. Kin tak a ka lupna apan ka thou a. Amah inn pua a om hi ven. "U bang thu om a?" chi'n ka dot kawm in ka frak pant ka teeng a. Ha nawt kawm in ka u'n thu om dan hon gen chian a "Eh khai, hiai dan ana hi maw vial mah mah oh!". Ka u amah kia a inn ngak a om, thawmhau kisa chuh ahi peuhmah, ka sungkuan teng ka pu te inn a pai suk vek ana hi dan uh hi. Hamhaih sim leng ka diam "A tak tak a maw u?" chi'n ka dong thak thak san hi. Tua ni bel 24th June 1997 zingkal dak sagih pelzek ai veh.
Tua zingsang kho omdan ka et chian Lamka khopi leh a gaal a khua muh theih om sun sun teng kho niim in a luah suak vek vuahpi zu ding bang khop hial a hi. Ka 
inn veng ka inn paam te muh ding om lou khop hial a bang. Kho lak leh bazaar ah mi kua mah muh ding a om mang kei. Biak inn gate ki kalh lou. Ka ngaihtuah kik le a zanitak a kava tel na ka phawk kik thak*. Ann huan inn ka lut a, meh leh buh huan sa om kieh keih lah ann ne ding mi om ta lou! Ka u kiang ah, "Zanitak a thau ging ka zak lam tak thei mah veng aw!" ka chih le, "Saikul a thil tung thei lou ding nei mah veh, ki patau gawp. Ki ihmu thei lou aka hiam zinglam dak thum apan a". Singpi dawn kawm in ka u kiah (ki theihmoh bawl in*), "ipute kiang na pha nuam hiam kei inn ngak in ka na om dia?" ka chih le, "Ann huansa i ne dia, kong i kalh di". Ann kon ne ua bangzah mah takpi leng ka ne zou kei. Ka gamtatna kho nung thei kha lou a na hi dan ven. Kisa in ka pute inn kon zuan uh hi. Lamkal ah lawmte toh ki tuak in ka u toh ka kikhen uh. Misi luang kua tak post mortem bawlsan lel uh ahih hon hilh ua lamka DD inn ah. Ka lawmte kiah "Huai mission compound a pasal mi nga te bang loh ta uh a, thu thak om hia?" chi a ka hem dot le, "Beita, tua ki panta" Ka chi hummul thou sing sing veh aw hon dawn dan un. Ka pu te inn gate bul kong ah ka ding a, reception a tute ka en a dahmel pulou kuamah leng a om kei uh. Akawnbah tep khu lat lat kawm a ka hip zat zat le (L)VK Joshua in ka liang ah hon kawi in, "Zou veng lut na bul ah va duty un" hon chi a. "Aw le sir" chi'n ka lawmte toh ki zui phei nai nai un ka va duty uh (khut vuak a duty ka hi uh chuh ngam thou. Hiamhei nei lou ihih mai mah chia).
Seppih ka veng YPA heutute reception a tu te kiah misi te min ka va dong a. A list hon piak uh ka en a, aw Toupa! (Oh! my gosh!) Zan zek hilou hiam hiai sungkuante te toh naa ka sep khawmpih! Kiginni ai ve le awi ana lua ka theisiam kei.Khaam vuallouh in ka mit tui hong luang zuih zuih mai. Ka ki sel thei kei, ka nul a hitamah le a hul thei kei, poina mai zen e aw! Ka pu te inn ei ve ka muh tawp. Awi ana lua! Ahi thei kei! Khoisa vung vung kawm in ka en zel a hon list piak uh. Zan zek hilou hiam Sang kon kithuahpih! (amah bel unau ua aneu pen, sanggam nih leh a pa hiai buai na kal a hon beisan!). Ka result suah bek le thei taan la! A hi thei kei, kon phal kei ka chih hang in dakkal 12 bek hi khin a thiltung a hita. Poina mai zen e maw na pa bek dam le ka chi chi hi. Zan zek a ki mu naa sem khawm, a u hi'n apa hi leh, tua om nawn lou, amak tel mai khovel hih! Ka heh tha lam lam hong suak a. Bijang kho sung khawng a va dian suk bang ka nuam mai tua hun tak zet in.
Buailai thu zaw gen mangmoh kei ning amun a tual a om kha i hih mai mah chia! Ka ning leh ka iplah tam si e! Lamka khua vengsung a duty masapen leh bunker tou masapen khat leng ka hi ding chih bel 24 june '97 a thil tung leh ka gamtatna hun hiven na chi kei maw gen khial lawm lawm kha kei ning! Misi luang 9 tak ka pute inn a hon tun uh, tua lai a Zenhang Lamka community hall a ex MLA Hangkhanlian leh heutute tuam tuam in suunna neih hun in tua misi luang 9 te phum na'ng ka hon tou pan ta ua (hiai ni in lawm koi ah na om?). Aw khai anak eng nop louh. Thau ging ka za a, ka kho dak vel vel a. Tua thau ging Tuithapi lam a hi! Khai maizen! A tak tak a maw! Ka ngaihpha thei kei sim veh aw. Ka nau leng huai lam phalvak ma diang suk hi dan peuh ve'n. Ka dak ka dak a, a phattuam na'ng him him a um ta puoi! Saikul a thiltung lungphawng tamkuam tak in delhsulk stranded ana dan ve ua le Tuithapi a. Vokaden!
Misi luang phum na'ng i hon tou chu katareisei saktiman in le leisai a truck load dim thum val zen a puak theih vum men mon mai. Zou veng te lah hong ko dawk talou ujamching thubawl a lauh uh a diai mah! Kou veng tangval tuam tuam chi mai ni, teng in kon tou ua. Mittui tak keuh keuh kawm a han i hon tou bang zaw nuam mah mah kei. Sawlhat thu leh i dam na'ng a bang hi le le ka ut ta lou zen. Ut le ka ut kei. "Het Zogam tangval" chih khah ki hanthawn na khat hi zel ven tua hun in. I biang khawng hon bet puak fek fek chiang ua ki nawl khiin thei nawn lou a tel ka. Agal a Tuithapi ka en zel a ka khawl kal in (hu chi kawm kal in central lamka, upper lamka tangval te hantou di'n hong tung uh hi). i tangvalte (zet theisiam mai un) hong tung a hi ta hon chih tak chiang in kha muanhuai kisa ve ung aw. Huai army khat kaplup pa ziak a phengpi suah ai chu la.
Tua lai in sungkuan un tuilou bawlsan lel. Buhchi ki bawl/pawi pan ven. Kho om dan tawh, mi leng omnuam lou lungphawng chiat ki hi ven. Ka veng sung mipi leh khosung ka et et chi'an nuam kasa mah mah kei. Heututen khopi sung a ki om, mun bit zaw a ngaituan kei in, na teen na inn mun mah ah om in. Kou na buai leh na mangbatna ah kong tai ding uh hon chih tak chi'an ki lungmuan ve ve dan hi'n.
Hiai ni 24-06-1997 zaw ka mangngilh ngei kei ding*, i nam i gam vai in bang pi leng i khankhiat theih na'ng tok suah khawng hi leh ka deih mah mah. Dahna, sih le man gentaak louh inn ten lou ten mansuah tam pi tak om hih ka thei. EVENING POST sim kal bang ki ngaklah sek ven a nung lam in. Mi sangnih milip khawng leh dangka crore 3 val khawng hi lou ding hiam galvan leh a dang dang in i bei sak mai mah ua! Ka lawm it mah mah hon beisan (a tuah uh zaw ka gen ut kei) a luang uh muh louh tu ni tan in om! Minute 10 nung a na ki houpih, a nung in aluang mu le chin bang ngaihdan na nei ding!? Mihing hinna a deng deel dan lawm lawm tel! Gen ding tam ei. Hizah in zou phot mai ni
Dedicated to my beloved mom (24.06.2004)