Public Private Partnership (PPP) model pansanin Ccpur District Hospital etkol hileh a lawhching diam

Manipur Government in Thoubal, Ccpur, Bishnupur leh Ukhrul a district hospital omte Public-Private-Partnership (PPP) paidan pansan in mimal leh pawltuam (private) kiangah kum 20 sung piakkhiat sawm ahihdan, Expression of Interest (EOI) March 25, 2013 tungtawn in suahkhia. Hiai thu local/ regional newspaper khenkhat in April kha bullam a ahon suahkhiat ua kipan, mipi lak ah hong kithehzak in, SSPPNet ngei ah leng suutkhawm di’n puaklut in omkha hi.

Tomchik a genin, Public Private Partnership (PPP) i chih chiangin khotang phattuamna nna khat sepkhiakna ah Government in gam/ leitang, venbitna leh enforcement si in mimal (private company) in etkolna (management) nna si in pangkhawm uhi. Hospital PPP mode a koihte ah Government in ana bawlsa gam, building, equipment a pung delhna (profit motive) toh operate ding in private company pia hi. Mahni employee lou manage chih thil haksa ahihmanin, ana semsa Government employee-te suankhiak hiam huai company a laklut hisek uhi.

March 25, 2013 ni a EOI kisuah hiai thugelh pek tawpna ah ettheih hi (Annexure). Banah, The Sangai Express, 25 April 2013 edition ah hichibang kigelh:
“The meeting for finalising the State’s plan outlay was participated by Chief Minister O Ibobi, Deputy Chief Minister Gaikhangam, Health and Family Welfare Minister Phungzathang Tonsing, Chief Secretary DS Poonia and other high ranking officials. The Planning Commission team was headed by Deputy Chairman Montek Singh Ahluwalia. Planning Commission officials suggested the State Government officials to adopt public-private partnership (PPP) model for projects and schemes which would be taken up in the State. They even suggested that the same model be adopted, if possible, for the projects and schemes which are already under progress but not yet completed”

 MPCC Spokesperson & Minister Shri M. Okendro:
“…The initiative to run hospitals under PPP model is aimed at better delivery health care service to public. There is no question of privatization of hospitals. The PPP model would not be applied to all departments of hospitals. It would be limited to certain sectors. Private parties would be allowed to install medical equipment like MRI machine, X-Ray machine etc which could not be procured by the Government and minimal fees would be charged for using such equipment…..

Planning Commission tawsawna Manipur Government in District Hospital 4 (li) PPP a koih dia pan kichiantak la ahih dan muhtheih. Tunai a Manipur in health sector a pahtak loh thama na semhoih [Infant Mortatlity Rate (IMR) niampen] ahihna ah Planning Commission in le “tua na poimoh uh quality hita ahi” chi ahi khading. A lim in tau leh hak bun bingbiang mahleh a Manipur sunga tengte’n bangmah tohlohlou kisa uh ahi ngei dia, mi tamtak kiguih sakin bildohhuai kisa chiat. Hiai Government panlakna toh kisai a dotna tampi omte: (a) Government health policy pumpi bang hipeuhmah ding – Government Hospital dang bawl sawm; Community Health Centre puahphat a tamzaw bawl sawm? (b) MPCC spokesman gen banga PPP mode in diagnostic equipment vuak huam hi taktak ding hia, ahih kei leh hospital management pumpi? (c) Diagnostic equipment lel huap ding hileh PPP ngai tel ding hiam? (d) Hospital management pumpi huap ding hita leh semtu Government employee-te bang loh hi ding uh? (e) EOI piaklut hun 24th April beina sawtta, bangzah lut mawngmawng ahidi? etc. etc

Hiai dotna tampi omte’ dawnna theilou; hilehleng minautang damlou etkol ngaite, neih ziak hilou poimoh ziaka district hospital a puaklut himai, hospital in le a etkolman piakzoh di ziak hilou etkol ngaihziaka ana enkol a i theih uh, tua private (company) in summet delhna toh etkol dia piakkhiak  himai ding awlmohna apan suak houlimnate hiai ah akizoma simtheih di’a gawmkhawm ahi. Ngaihdan kigente atangpi a lakkhawmin minautang damloute adi’a puakgik guan hia muhna leh Govt. pen mipi dawnzaang khop dia a regulatory role semkhia zou dia muanzoh-louhna (trust-deficit) hideuh pen hi.

Aban i sawnma in atunga dotna omthei taklatte Manipur-a media saite’n hon pholhkhiak ua mi nautang sim theih dia hon luikhiak uh i ngen ahi. A bukimzaw a theihna in panlak ding dan chiangsakin, kullou lunghihmohna, kimuanmohnate veng saka, mipi leh Government sepkhawmna hatsak hi. Hiai atunga background leh ngetna om lungsima koih kawmin, District Hospital PPP mode a koih dia Government panlakna toh kisai SSPPNet a houlimna a thukup lungluthuai taktakte abanah sim in.

BANGZIAKA MANIPUR GOVT. IN  HIAI PPP HON PIBAWL ZEZEN AHIDIA AW
Hiai anuaia-te ziak ahikha diam:

1.  Privatise honghi leh bel, no work no pay cih line kia in le'ng quality dangsak in work culture khekzou zek maithei chih gintakna ziak.

2. Medical Department omlel pen a 'System' himhim segawp leh a sep ding bang uh sem kha theilou a a om ziaka Public-Private Parnership tungtawna puahphat sawm ziak himaithei.

3. State dang khenkhat ah PPP lawhching ahihmanin. Etsakna di’n, Delhi ah power supply BSES in a laak ma leh laak nung, quality of supply (provider) kikhai a, lah electric bill zong huci sangtuan venvon khollou.

4. Manipur ah kivaipuakna, a system kise dimdim. Health care hi in, skul etkol, water supply leh thil tengteng phial a fail, ahoih zaw option dang om nawn mahmahlou ahih ci’a, a vaihawmtute'n ahoih zawkna ahih khaakleh chi a, chihmoh man  a PPP lampang hon ngaihtuah uh leng himaithei.

5. Privatize hita mawng leh zong state solkar in bangtanhiam a hospital thuneih khum diing, alek-aval (kilawmlou tan) om dek leh solkar in action laak theihna ciang thu nei veve diing ahihmanin, hiai PPP pen poi lawmlawm lou a akilat ding ziak.

6. PPP model khawng improvement bawlsuahna dia aloutheilou - phetlou in full privatization bang le tua i hospital uh condition sang a teelhuai zaw… Asung thu taktak thei leng bangzaha buah a, bangzah kinemanga, bangzahta a mismanagement kihinghawi hiam cih zumhuai zah hithei! Khangthak leh Christian community te laka hicibang example sianglou leh ginalou kepkep sanga; paidan thak liklek, siangthou, diktat leh efficient healthcare management, kingakna taak om vanglak leh solkarte lungdeih "Medical Tourism" khawng leng piang baih zaw dia, a genthei deuhsawn I cihte’n leng banpha thou di uh, cih upna apai ziak zong hithei.

7. Mobile phone khawng le ei lawi Senior Govt Officer te aa sanga hoihzaw, changkang zaw ngen hi e i ta-naute’n atawi uh! Innlam vacation a I pai ciang in leng zinpak ci a ei puakte khawng thring, cheap hon cihsak ut simsim bang hi uh e....

PPP AHOIHNA OMTAWK LEHLENG, MANIPUR AH LAWHCHING LOU DING HIVEH AW
Bangziak in:

1. Pilvanhuai leh lauhthawnghuai bel solkar nasem lou, mizawng leh gentheite'n koilam naih ta ding. MLA/ Minister akua-akua in tagah gentheite khual a nasem akichih chiang ua zong "very selective" petmah himai, amau voter teng zong huamsuak zou taktak tuanlou, akinaihpih leh phatuam thama pangkhate khawng huamkha zoulel hi ua, mipi vantang gensaktu ding neilou mizawng daipamte adia haksatna a kibehlap diing gintakhuai zaw.

2. PPP mode in District Hospital 'run' hita leh,  private entity leh Govt of Manipur(GoM) in partnership a hospital run ding cihna hi a. Private i cihte missionary hilou ua, profit motive a service pia ahi ua. Hitaleh, cost plus a charge uh ngai ding cihna ahi a, Subsidized lou a service man tamlaw dia, mipi vantang in 'district hospital naih zoulou ding. Mipi vantang naih zohlouh District hospital neih khasiathuai mahmah ding. Subsidize a loutheilou hong suak ding hi. Subsidize i cih some one foot the bill. GoM in subsidize man a private party kiang a reimburse ngai ding hi.  Hita leh, GoM in sum anei diam? Neilou ding. A neih ciang ale a hun a pelou ding. Private business entity adi’n cash flow a poimoh mahmah a, Manipur ah Govt functionary te facilitator hilou ua, extortionist ngen hi uh.  Huci bang khovel ah private party in sawt daih zoulou dia, hong lungkimlou ding uh, hong nuak uhiam, ahihkeileh, hospital hon gawlmeek ding uh. PPP mode a run na dia tua staff omsate leh facility tuamtuam na ki-withdraw khin lakloh ding hi. PPP mode a lah continue thei nawnlou, tua ki-run dan a run nawn dia re-mobilise zou nawnlou ding; huai hun cia, tua solkar skul teng a defunct bang a district hospital bang le defunct ding hi. PPP mode a run ahihleh, huai i maban ding uh himai! Tu’n dinmun a hoih kei. Ahihziak in, huai hun ciang - hospital a defunct hun ciang a, tua dinmun ngai ngoihngoih ding i hi uh. Huai hun cia, 'heutu' kici leh 'prominent citizen' te lak a lah, 'hospital/ skul defunct thil hithei hilou, acceptable mawngmawng lou, hoihtaka a function sak ngeingei ding ahi' ci tentun ding omlou dia, a kipil sak zaw dawmdeuhte'n "Manipur zaw hici mah hi" ci nengnang zomah lai ding uhi.

3. PPP mode hoihlaw mahmah napi in, mun bangzah hiam (like Chennai airport) ah hiai pen lohsam sim in akigen mawk hi. Aziak bel, controling rights tungtang ah Govt leh Private consortium te kal ah buaina om dek hi (news khawng a muhdan in). Manipur, adiak in, Ccpur district ah healhcare facility ahoihna a om kei hi. Govt chimohtak ahihziak leh asemte ginatlouh/ chihtak zohlouh ziak ahi taangpi hi. Lamka en nawn zualta le: Private Hospital - Sielmat Christian Hospital, Sielmat leh People’s Health Foundation, Mualkawi kichi om a, huai leng a neizou deuhte’n naih tuan khollou in, Imphal (Shija or RIMS) ahih kei vanglak leh state dang kinaih zel hi. Anei zoute adi’n bel Lamka (Manipur) a healhcare facility hoihlou in gen anei kei a, himahleh, anei zouloute adi’a kouzanna ding ngaihtuah ahi sek hi. Private hospital khat in CGHS rate patient te quality treatment apiak theih le bel hoih law mahmah diing hi. Himahleh, Manipur I chih terrorist infested state ahi a, thuneihna (power) 2 sanga tamzaw paikhawm helhel na state ahi. Khut taklam Govt ahihleh veilam Helpawlte ahi zeel! Hichi bang kawmkal ah private hostpital or PPP mode lamzang taka apai diing lam-etna chuh ziim mawk bang ahive.

4. Zing leh thaiciang in government hospital i neihsunsun uh tanlawh ding a kisa i hihmanin limtak pankhop hun hi. Thu omdan i et leh azekai lam bel hihtuak peuhmah in ka mu a, dahhuai ka sa hi. Ka awlmawh mahmah bel: district hospital kia hilo thudang tampi i ki-ukzia hong pumkhen thei ding, gentehna in natural gas/ oil tawhkhiat ding tawh kisai EI-A te pawl bang, thupiang ding teng amansa a omma a banghanga mipi (public) in kithei ngeilo, a theite'n bang hang a mipi theih dinga puangkhia ngeilo i hiam ka ci hi. Nung lamin thau (oil) tawh khiat nading tawh kisai i gen vengvung ua, a sungtawng taktak ah bang nasepkhiat nei zo taktak i hiam cih kithei ngeilo hi. I politics saidan leh nam vai saidan a puatham bek a sai den I hihna hong kilang hanhan ka sa hi; nidang a kilang lo cihna hi hetlo in.  Ka naupan diaklai ci leng 1980s bul lam in PHC (primary health centre) ka khua uah building hoihpipi hong kilam a, a semte mundang gamlapi panin cihtakna tawh ong giahkuan zel uh hi. Dispensary bang tawlkhat hoihtak mah in kizangthei a, khua kiim a om mizawng tampi in phattuampih uh hi. A sawtlo in PHC building te leikha in ong netum a, a seemte melmuh ding ong tawm hiaihiai a, a sawtlo in kuamah kimu zo nawnlo hi. PHC building a siat hangin funding bei tuan ding in uphuai hetlo a, a sem ding te kimu ngeilo, dispensary a za ong paite (medicines, instruments and equipments) kua khut ah lutkhin hiam cih lah i theihsa ahi. Government funding paidan en le’ng inn kilam peuhmah, ahih ke'h equipments and instruments kisamte leina ding a vangkim in funding om zel a, building sia ahihleh a lamna ding zong om ding cihna hi.

5. Social security system om ngellou a mohpuakna zohlouh ziaka healthcare privatize chih zaw abdication of responsibility ahi. Socialism leng a saidan ahoih leh phattuampih luat theih ahi. Venezuala example la zual le: Hugo Chavez prez hih nungin nasatakin healthcare reform abawl a, Cuba gam doctor te lalut in mi gentheite chhawrphak dingin medical facilities a bawl hi. Kum 9 sung vel in health index lamah masawnna lianpi nei uhi. Govt in a privatise di omte - commercial venture neih deuhte - transport, communication, higher education, transport (not road/ highway), power distribution, etc. Healthcare in our context, privatise kei lehang, puah sawm ding in kisa le.

6. Ei lak ah, privatisation ngen a thilpai khin ta le hilou hiam, chi nuam sim lampang   ka hita! Power/ Electrict tawh kisai privatisation kipan lellel. Govt. water supply bangziak a gina ngeilou? Gina hileh private a tui zuak/ supply te  bang chita ding? Govt. Skul te hoihlou? Hoih hileh private skul a kua kaita di la? Govt. /Public health care hoihlou? Hoih hileh private clinics te bangchi ta di la?  Govt./ public service a ginatlouh ziak a private  enterprises or involvement te  a loutheilou ahi I chih leh adikna chiang ommah  e, HI-LE -LE   bangtan hiam nung in bel  tua private enterprises te’n  Govt. utility-te ahong hoihluat khak di lehlauhuai sata uh hikha diing hi! Aziak bel, amau sumdawnna hong sukha thei ahihtak ziak in. Govt. policy I chih takngial bang le  a thu pai, a pau zouzoute ngaihdan khawng  hilel lim a ,  hoihlou pumpi vek  zaw chituan khang, mi bangzah adi hiam a bel hoih lua (hauhsak beh theihna khawng ana hizel  aka?), quality of service   thutuam  in koih zual le!   Hiai a I gen dandeuhte lungsim a nei a, public utility-te shortcomings/ problems capitalise a interest group  bangzahhiam te  purpose serve  na di lel khawng a  hiai bang thilsawm  hong om  himaimah le zaw maw. Poilaw di eimah ve!!

7. Kineeksiatna mun leh, semtute'n phatuamngai taka nasep omlouhna Manipur gam a Lamka ah, mizawng leh gentheite adi’a haksatna kibehlapna maimai hi ding ahi. Zodawn/ Singtanglamte, a tamzaw tham ading banga membership laak haksa law mahmah ding hi. A saitute'n information bang le pe khollou lai ding uhi. Tua a omsa bawl hoih louh ngal option hoihzaw om hetlou hi. Minister pu in tum taktak leh, a bawl hoih zohlouh na'ng omlou hi. Power le a neih beh ngailou, tua aneihsa teng in le daih law mahmah ding hi. A kuul leh, Mizoram Minister te hih dan bang  in - NGO te, Saptuam etc te panpihna leh seppihna ngen leh himai hi. PPP mode sese lou a CCPur District Hospital Minister pa'n a bawlhoih zoh keileh, amah a solution hilou a, a problem ahihzawk ziak na himai mah thei hi!!!

8. Iiplah di zawng in en di ci le’ng ei SSPPNet memberte leng iplahhuai tak zaw I hi uh. Muanmohna, launa, gintak-louhna leh guplouhna a pumdim I hitasim mai ua! Laisiangthou in "Do not judge" acih lai in, eilawi in gintak thu tawh judgment ki-pass geihgeih sim ciat... Bangteng hileh ei gam a sep di tam hibang zah kal ah, I sepsuah sunsun uh zattaak, kingakna taak in hong om leh ciciat hihang e maw. Basic needs - Water supply, Power supply mahmah leng sutuah utlou a, hospital changkang tak neih vakinep luat zel le zaw haksa simpi himah ei. Hiaiziak khawng a Net member te lungput le negative pai ahikha di hi.

9. Mipi lam apan bangmah solkar theih/ lauh tham dia pressure bawl zou/bawl thei ki-om lou chihna ahi, tuta dih in. Management leh service hoihzaw mawk leh zong, i mi leh sa tamzawte'n zang zou tuan lou ding ahihleh bang phatuam ding ahia? Tua leng a neizoute'n Sielmat e, Shija e, Poly Clinic e zuan ziahziah ua, azawng-daipam teng in District Hospital naih ngai hilel! Hiai nasan hong ki privatize leh azawng-daipamte'n koilam naihta ding?

10. CGHS approved panel a om private hospital te’n CGHS card holder te govt approved rate in treatment apiak ding uh ahi, himahleh, hospital tamtakte’n overcharged bawl sek zaw-mah uh. Delhi a private hospital te ah CGHS Card neiloute market rate hivek. Hileh Lamka a Govt sepna neilou mivantang, mission workers, pensioner leh tagah leh meithai te’n bangmah concession amu kei ding ua…

12. EoI bawl ma a public interest bang ci bang a protect ding cih mechanism bawl phot ding ahi a, a bawl lam uh theih a omlou, bawl khollou uh hi ding in gintakna ka nei. Public forum or assembly beek a discussion om photlou a, Tender suah suk geih cih mawk, a 'affected person' dite bang in thei nai hetlou ding uh hi a...!?

13. PPP mode a lah function thei taktaklou, lah contract cancel hilou a, District hospital function mulmal theilou a hun sawtkhop om cih bang om thei. Solkar thil hihna a hucibang om nuam mahmah. Narendra Modi te khawng makaihna nuai zaw le hucilou maithei.

14. Experiment bawlna mun ah panglou in, mun dang ah hon hih phot uh henla, alohcin zenzen leh, CCpur District a hih (implement) hileh deihhuai.

15. Privatise cih khawng a 'top' lamte principle & integrity neih ah ki-nga mahmah. Money bag te buanpuuk olsam 'top authority' neite adia hoih hetlou. Huan, a regulator ding, a monitor tu ding Health Deptt te ahih uh a gintakhuai a, regulator leh monitor sum a lei theih bang hita zenzen leh, mipi ading in vangsiathuai petmah ding.

16. Water supply leh healthcare khawng zaw tutadih in privatise nai kei le cihhuai mahmah. A next target ding water supply himaithei hi. Zodawn/ Singtang lam i taisan kheukhou bang un, cikciang hiam in Lamka zang le mi vantang adia khosak zohlouhna mun hong suah a, i taisan kheukhou uh akuul khak ding lauhhuai sa ing.

AHIHLEH BANGCHI PANLAK HOIH DING AHIA:

PPP mode a nasep I chih Central govt in tulai in hon hahzat a, social sector leh infrastruture sector bang ah kihah gen diak hi. Ahoihna leh a hoih louhna omtham a, Delhi a kigen minthang Airport leh Metro bang leng PPP mode ahi uhi. Metro bang ah leng Airport line pen fuh hetlou se, adangte bel hoihlua, khovel pumpi a leng minthang ban ahi uhi. Huaiziak in Manipur govt in a thilhih dek pen ahoih di leh ahoih louh di genchet theih ahikei. A paper ah, MOU leh TOR khawng ah, bangteng kigen in kigelh mah leleng, ahih dektu Manipur Govt ahihziak in 'trust deficit' asang mahmah hi. EOI a kigelh Technical leh Financial Criteria en chian lehang, a district sung apan qualify kuamah omlou ding hi.

Health Care Industry a Hospital minthang taktak ana run theita Manipur polam ate a lunglut om zenzen di uam? Delhi ah CGHS rate a treatment piak di a kichi a, hiai hitaleh tulel a Shija te rate toh bang achi dia? PPP mode a hospital run ding revenue sharing model zuih ding kichi. Revenue kia hilou a cost leng share ding hihtuak. Bangchibang a ki-share ding uh ahia chih le mivantang in kithei nai tadihlou. Huaiziak in hiai proposal hi a hoihna leh hoihlouhna om tuaktuak ahi hi. Quality of service, sanitation leh cost of treatment khawng bel pung ngeingei di’n gintakhuai.  Civil Society/NGO hattak in etpih in pressure zou le hang senna pung zek lel a leng quality sangzaw neihtheihna lampi khat chu ahive…

Tuabang lungtupna leh deihna taktak sepsuah ut I hih ulebel- Amah Montek Singh Ahluwalia te khawng khazap nuaia project guang bang ahih zawkmah utawh: India gam a Private Hospital management leh healthcare a min tallang deuh lawlaw te khawng in, Corpoarte Social Responsibility (CSR) item din Partnership Manipur ah hong sem un, ci a tha cial hih lampi om mai thei maw ..... Huan, EOI a turnover Rs 2.00 crore criteria ciceuh khawng lou deuh, Rs 100.00 crore lam bang te cial hivet le uh. I goal golzaw uh "Medical Tourism" khawng nana cater di cibang I hihngial un cu, capacity liantak neite lawlaw in hong sem uhenla, a project & plan ah expansion bang le tel hen la, world class quality tawh hihsak mai leng cu - Mizoram te bang leng Lamka hospital ngen utzaw didan uh hi’n ka mu hi – a gamla foreigner te genlouh in leng.
    
A lauhthawnghuai mahmah bel, Agency sehsa a omziak a proposal kiguang ahih maimah khak ding ahi. Ahihlouh tawp in paw-lam apan interest ahong omlouh khak ding. Bangteng hongtung mahleh, vuahzuk ding theikhol kei mahle uh vainiliap toh kigingsa a pawt pilvanhuai pen achi ua, hiai thu ah leng stakeholder khat hihna zar a kigin-kholhna a om tuh pilhuai ding. Bangchi banga paklak hoih ding ahia le...?.

SSPPNet houlimna ah maban panlak dingdan lampi hoih taktak kikawk muh hang:

1. EOI bang suahkhiak hita ahih lebel a thu saupi paikhin chihna chu hipeuhmah di’a, ei adia hoihzaw ding hia hoihzaw lou ding chih khawng sui hun mahmah didan eive. Health Minister kiang bang ah a thuchiang dot di’n hoih mahmah maw, bangchi bang plan nei ua, bangziak a hichibang a hon hih sawm uhiam chih  khawng. Press/ Media te bang inle hoihtak in interview leh analysis khawng hon bawl le uh chihhuai mahmah phet!

2. Saptuam liandeuh e.g. EBCC te khawng in na response le uh ahoih pen mai diam maw..? Ngaihsak louh a le kuahiam khat in nala thou di ahi a. Midang hiam mimal hiam in hon la lelah, a khonung a aphun di atamzaw member te hithou kha ding hi a. Privatized di ahih taak lehleng EHA or any other Christian/Mission NGOs te'n la le uh chihtakna a omzaw deuh diam?

3. Tulai a govt in policy leh project poimawh thak a launch dek or kheng lamdang ahih dek chiang un general public leh stakeholders te consult in, wide publicity bawl sek hi. Hiai hospital PPP model a privatise ding thu bel awareness campaign a omlouh ziak ahi ngei dinga, Lamka leh a kimvel a mi nauteng in theilou himhim mah hi un ka koih hi. Hiai District Hospital te zaw Govt nuaia omtouh det a, ahi theitawpa puah hoih ahih ding ahi. PPP mode bel atuam in bawlkhiak hileh ahoih ding. PPP model cannot be a substitute to governance.

3. Lamka i cih Minister pa inn-le-lou omna, amah constituency ahi a. Huaiziak in, Lamka damdawi inn hi in skulte hitaleh, ahoih ding amah prestige issue a aneih ding ahi a. Damdawi inn bang le (amah a Minister ahi a), Lamka aphak ciang in inspection va bawl zel henla, Medical Superintendent leh DC nu kiang bang ah kha khat a khat vei beek report n’on piak ding uh bang le cih theih hi. Staff neu lamte, Superintendent sang a thu nei zaw om ahihleh, a system dysfunction cihna ahi a, amohpua leh a bawl hoih theitu Minister pa himai hi. EoI i cih expression of interest cauh ahi bok a, Govt commitment le om nailou ahih ciang in, Lamka pen cancel phot henla; ahihnopleh mun dang ah hon hihphot henla, mundang a ahong lohcin leh, CCPur District Hospital ah teething problem om hetlou in, hon introduce leh deihhuai mahmah.

4. Sum omlou lah hi hetlou dia, tua a omlel Govt Hospital pen hoihtakin upgrade/improve hizaw henla - a hospital with specialists/ updated Check-up/Test facilities; privatized hospital dang khat solkar etkolna/control na nuai ah subsidised fee/rate in bawl thak (neih beh) hileh bang achi dia?

5. Primary Health Centre (PHC) leh PHSC khawng tamsem koih in hoihtak in puah le zaw phattuam law ding eimah ve. New Lamka Vengnuam/Khominthang lak ale PHC khat om ahihtuak a, District Hospital va naih sese ngailou in, kizen mahmah hihtuak, innlam pailai a naungek immunization khawng hihsak di chi in kuansek mah ve uh aw. Hiaidan in Lamka khopi, village authority ngen a kipua a, village a kikhen tiltel hive hang, PHC/ PHSC tamsem omsak hi henla, zodawnlam ah le tamsem honbeh hileh chu hoih mahmah kha ding. Health Minister lah ei-a ahih laitak hizomah a!

6. Khuacih ah PHC, ahihke'h LP/JB school lam zou pah ding in bel ki-um kei ing, hilezong nasem (employee) hihzah tak kawmkal ah a citak, nasem ut ding mi 10 beek ahih ke’h mi 20 beek kithutuak in khua khat bek ah nasepkhiat theih taktakna ding lampi bawlkhia in, model village danin semkhia photphot leng mundang ong peh pelmawh dingin ka ngaihsun hi. Eisung bel ahoih leh asia na khat peuh kihonzuih noinoi pawl I hihmanin na hoih khat pankhia taktak leng adang ong piang khia zo dingin ka lam-en hi. PHC/LP/JB/High School a asemte mahmah in ong patkhiat ding uh lah uphuai lo phot ahih ciangin minam level ah - Zomi Council or Tribe level beek ah 'national priority' danin na i sepkhiat kul hita lo hiam?

8. Lamka damdawi inn a syringe zat ding natan patient in kilei ngai, chihte i ngaihtuah chiangin zaw himahmah lou! Can we get a worse deal? chih in om. Lah... maingal taka ei duhzawng mehpok, mehmawl khawng tawilut a i kiveh theih a, accident tuak leh emergency cases bang a lomloma paw-lut a, i om theihna khiaklahhuaipi hithei zel. Abang-abang hileh (govt. policy & programme) obstruction sang in bargain lam kizil hun hita. District Hospital privatise himah hen, huai toh kitonin Community Health Centres - Lamka, Singngat, Saikot, Thanlon, Tipaimukh leh Henglep ah koih beh hihen, chih bang I pansan/ dinna lai hileh bang aci dia?

9. Zogam leh Zo minam damthei in khangto hen i cih takpi leh nasep taktak hun hita lo hiam?  Laphuaksiam V. Paukhansiam in gam ngaihla aphuah khat ah: 'kua hiam ding diing, kua hiam kuan diing I gam adiing in' a cih bangin mimal kidong in nasep khiat hun hita lo hiam? MLA/ MDC i sawlte'n hih lam tawh kisai bang panlakna nei uh hiam? Cable i neihte'n mipi ettheih dingin live discussion dan bang a hunhun in ong nei uh henla, newspaper i neihte'n zong hih lam tawh kisai interview ong bawl thei zel le uh bang aci dia? Panlak theihna tuamtuam ah pan i lak hun hita hi. I pankhop kei a, mimal phattuamna ding bek zong in minam leh khua-le-tui vai ah a i dai om det niloh leh zing leh thai ciangin Zodawn ah om i mite hong cimawh ding uh a, Lamka, Imphal leh phaizang ah inn hoihpipi, sepna kician neite leh sum tampi neite khamuang in i om theihloh hun uh ong om veve ding hi.

THUKHITNA

I khawsakna mun, I nektak zondan atuam dungzui in I ngaihdan leh I muhdan atuam ngei ding. Etsakna di’n unau Gangte te'n, 'Santing-New York aki khe e' ana cihna uh kum tamkuam apaita; eite’n 'Delhi-Lamka aki khe e' ci pan ta le adiam maw! Delhi a thil kihih dan leh Lamka a thil kihihdan saikak I bang sim mawk ua, i gam dinmun a cianglou deuh I di uam, cih bang na ngaihtuah ing. Healthcare zenzen sang mah in, mipi nautang poimoh, tuidawn, meivak, lamlian cih teng bang leng, Delhi toh kikhe mahmah lel hi. Law and Order cih bang gen zawmah lai le, akikhe seem ding. Ei gam khawng zaw adik lel in, phaijang lam ah Gunda Raj ahi a, zodawn/singtang ah Jungle Warfare ahita dih lai e...duhthusam bang le midang sang a niamsak deuh, lametna bang tuh as good as nil sim dan a koih ahoih hi.

Damlou etkawlna lam nana bel, thildang sang a i hoihna lam uh ahi zaw-mah diam? I pianken ua kihehpihna leh lainatna haute I hi ua, dam lou veh, tutpih, buaipih etc.ngai poimoh te I hi uh. Natural gift. A tunga I taklat bang in tua a omdan lah hoihsa mahmah lou, ahihziak a ahoihzaw ngim a kikhenna lah lau zel! A kiseel/ kinial te ka muh dan in, Delhi Khawpi a nuamsatak a I khosak na uh a sawt law-ta a, i gam I cih zenpeuh reality toh kigamla law-ta houh I di uam maw? Duhthusam tui (ideal) law-ta a, aphattuamna di om ngellou na mun a, kuamah direct a akap khak louh dia 'musep' thautang a kapkap mawk khat I hi maimah dua’m maw…

Bangleh-bangleh, hiai issue apan sinlai lian, gol leh poimoh mahmah kisin lellel ahi cih I theih tek uh hoih di. Huaiziakin, kingaise kei in (kipese kei in), ahoihpen mah ei di’a koih dan khat nei mai leng houh i hampha piil pen mai di uam? Deliberations leh views te’n mimal theihna leh ngaihtuahna/ suangtuahna te zasak in, awareness hoihtak pia a, huan thildang, developmental issues khawng leng i et didan uh bangzah hiam hiai issue in ahon lamlah ding gintakhuai. Issues i appraoch didan uh kisinna hoihtak leng ahibok hi.

Medical Tourism I cih central Govt tungtawn a India pumpi a promote nasepna ahi a, Western leh gam khangtoute sanga i hatzawk theihna lampi khat a muh ahi. Aziak tampi a om a, sen-le-pan a mundang sang a kiman zaw tham, doctor te lah siam mahmah ngen, tua tumlam gam a doctor siam a kigente bang le tampi India mi na hita uh ahi. Damdawi bang lah India a bawlkhiakte mundang a leng zuak ngam leh deih hita ahihman in, Healthcare lam a India namdang, adiakdiak in China cih khawng sang a hatzaw thei, tumlam gamte bang leng dem pha mahmah pah dia lamet ahi hi. Huai paitou zel a, Manipur Govt in leng, improve sak didan ngaihtuah, improvement hong om leh, inveng Burma lam, Thailand lam ate bang le Delhi a va zawtzawt sang ua, ei kiang hongpai lel ding uh hi, cih ngimna hitangpi zaw maithei.

Manipur Government in EOI 25 March 2013 peka suahkhinta. Hiai tawh kisaia lunglutna pia, mimal leh pawl kuakua oma, kuapen telkhiat ahia chih tanpha thu kiza hetlou. Hiai tawh kisai Local/ Regional newspaper ten le gelhbeh di neinawn nai tadihlou uh abang.

A ngaihven thei pawl, Press/ Media lamte bang I omleh phatuam tuan maithei. SSPPNet ah kihoulimna ah member muanhuai khat in hichibangin gen, "Lamka lama omte'n bangmah saupi kithei lou, Minister/ MLA khat in a chih ahihnak leh ahi di sa a koihmai pawl atama-kitam lai hi ei.  Society adia bang hoih ahia chih nasan a theilou kitam lai…” Ngaihtuahtham ching.

I District Hospital uh PPP nuai a mimal leh pawltuam in hon enkol ding uhia, ahihkeh, Manipur Govt. mahin enkol toulai ding hia, bangmah kitheisau tadihlou. Akoi abang hitaleh, Dr. A Venkat Raman leh Prof. James Warner Björkman pangkhawm in 'Public/Private Partnership in Health Care Services in India' chih pansana article a gelhna ua pat ngaihtuahtham ching khat taklang in I zawhbawl diing:

"……a government that fails to deliver quality social services due to lack of basic administrative capacity would not be able to contract either clinical or nonclinical services. The first step must be to improve basic administrative systems."

Let His will prevail, and peace be upon Manipur!
……….

Team: Lamka Will Live Again