Ann huan inn ka lut le nu Ching in om pih in kon chi hi lou hiam bang diing a na hong pawt khiat la! Chau ka sa sim a houpih tam louh phot hoih kasa a hi. Bang hiam damlouhna nei hiam Bliss in chi a ka dot le, a neu apan damthei lo khollou ki kem tou zel amah leng a kihat sak a. Zan a biakinn sung a hong kipuk le a kuapeuh in lung himoh sim ka hi uh. Na hong hoh a na ki thuahpih theih kon kipahpih lua. Na hong pawt zel zel ding aw chi kawm in ameh mal a kava huh hi. A pa uh leng hong tung ta ngei a, inn sung hong lut kawm in kua mah om lou uh maw ka hong tung kik ta ei. Ka nih un innpi lam ka zuan ua, pa Thang na hong dam maw? Dam ing e ka gari tuanna uh gimhuai sim a, koi fan le hon on phot dih uh kong ki tawldam sak phot ding chi’n tutphah sau ah hong lum zaw zen hi. Kou leng aksa meh bawl sunzom in ann huan inn lam ka zotsan nawn uh hi. Meh khawng huan a ka buai lai un Bliss a room apan hong pawt khiat lam ka na thei kha kei uh. Nu, ka pa aw ka za a hong tungta hia? Bawi, hong tungta a e tawl a kisa a innpi ah a lum va pai in a chi a aman leng innpi lam a mitsuan ngal hi. Kou leng nitak ann leh meh huan sawtlou nung in nek theih din ka min uhi.
Nu Ching, na telephone uh ka zang nuam innlamte ka thuzak ngai ka chih le, va zang lua in na hih ding mah ahi kitheih kholhsak poimoh lua. Ken leng ka innvengte call in ka sungte kiah honna gensak unla, anne sa a hong kik ding ahi a hong zekai mai thei. Honna lung himoh kei un ka chi hi. Phone ka koih suk zoh in Bliss ka et le, hon nuihsan a. Bang chi na hiam non nuihsan a ka chih le, na fellua na hih khempeuh ahi mah na gen a. Ka pa kon phawng dia, a kisil na'ng ka nu'n le tuilum suang zou ta. A hong man phet phet chian ann i ne ding uh. Nang le na kihahsiang nuam le ka pa bathroom zat ma in ana zang in hon chi a, awle chi kawm in bathroom ka zuan hi.
Ka man siang vek taak chiang un, ann kon ne ta ngei ua. Nidang toh a kibang kei, apau zaw sam le om tuan lou in. Mi anne a pau het kei le limsa chih na ahi ka chih khiat mawk le hong nui nai nai ua. Bliss in le na hong pau khiat kal ngaklah ki dai den ahih bang. Ken le pa Thang tu tung election (2000) zoh nung bang a chi deuh Thanlon constituency chi'n a hon dawng tei tei di dan in ka dong hi. By-election zoh nung a dan om deuh in tun zaw a dan dan om chi lel in hon dawng hi. Anne zou kei leng pai din ka kisa hi. Bliss in, kuva na duh le iva hai diam? Ken kuva hai lou. Laizial na tep hiam le? Tep lou. Raja na muam ut hia le? Muam lou. Nang na duh hiam le kuva ka chih le, sameh chiang khawng in ka hai lel huchi lou in ka hai khol kei hon chi hi. Tu sun a kon gen laibu na sim dia kon deihsak kava la zual ding chi'n a room a va lut zual hi. Pai aw le kong khak kawm in chi'n ka ki zui pawt ua, khua leng mial ta hi. Unau melhaih hun a chih uh hi mai lou ding hia. A kuva hai ding leisak zou kong kha kik ding chi kawm in a khut ka letsak a, Bliss kon it pen mah. Hong damsiang pah ding na hi. Thumna ah konna phawk ding. Ki khelah tak in a gate bul uah mangpha chi'n ka kikhen uhi.
Innlam zuan a ka pai kawm in tu sun a Bliss toh hun ka zat khop dan khawng leh a om dan teng khawng ka mitkha ah hong lang dun dun hi. Ka veng uh ka tun in lawmte nungak hel dia kisa hong pawt uh toh lampi ah ka kituahpih zomah a. Nang le koi a hoh na hia, nang kia a nungak hel ngam na ta maw chih khawng in hon chiamnuih uhi. Ken le damlou veh a pawt ka hi, hel nuam un le chi kawm in ka kikhen uhi. Inn ka tun in ka sungte tam ana om het kei ua, ka u te khat kiang a i nu le pa te la ka chih le, i nipi tunitaklam apan buai se sim in chin huai lam ngen a hoh ahi uh. Poina e maw, na hoh ut le kei inn ngak in ka na pang ding ka chih kawm in ka room ka lutsan hi. Bliss hon laibu piak ka en pah a, sim peih huai kei na e ka chi lungsim hi. Deihsak tak a hon piak ahih ziak in ka hon sim pan ngei hi. Pek nih tan le sim zou lou in ka ihmutsan kha hi.
Zingkal ka thoh in vuah a phin nit nit a, lupzek lai bang ka ut hi. Ka thoh in ka nu leng hong tung a, ka ni ahoih deuh hia tuzing chi a ka dot le, daktor pa'n zaw sawt a daih kei ding chi mai mah a ka lungkham lua chi'n inn sung hon lutsan hi. Ka nipi bel kha nih paisa a damlou sisan poimoh, huai hun a mu zok lou mangbang tak a omlai un, mi khat in ka pethei ding chi a piak uh le a khonung a sisan sianglou ana hi mai mah. Hehpih huai kasa mah mah. Annek zoh in ka nu kiah ann hek sak din ka kuan dek a, naa dang sep ding om le hon hilh thak in chi kawm in ka kuan khia hi. Ka ann hum sai ip dim hoih mah mah herocycle a guang in vuah phiin nuai ah ka tawl hi. Ka ngaihtuahna a Bliss hong lang in bang a chi de aw, kho phat louh sim toh chih khawng ngaihtuah kawm in. Ann heksak zou ka kik lam in houpih ka sawm a PCO apan in ka call hi. Anau nu'n a pick up a, na u bang a chi tuzing ka ngaihtuah lua a ka chih le, hoih lota tua le tuilim a kisil zou ahi, na houpih nuam hia? hon chi a. Aw poilou tom kha apau peih le ka chi a. Bliss leng second bangzah hiam nung in a ka aw ka za thei ta. Na nau in hoih lo ta hon chi a, kipah huai lua. Lian, na fellua mi na awlmoh dan khawng hampha ka kisa. Na hong pawt ding hia? Tua annhum heksak zou lamkal a khawl zual a kon call a hi. Ka nipi damlou in chin huai lam ngen a ka sungte om uh, inn ngak a pan ngai di in zingchiah kong pawt ding. Hong pawt thei le teh zaw ka sanggampa le hong tung den deuh in Mumbai om pen hon chi hi. Va pawt ut sim mah leng, nasem leh damlou enkol a om ka hihziak un inn ngak a pan ngai ding ahi, zing chiah ka hong pawt tei tei ding chi'n ka phone ka koih hi.
Ka veng uh ka tun kuan in misi dak ging ka gaal zak a ka ki guih hial. Ka ngaihtuahna ah ka nipi ahi mah mah ding chi'n a ka cyle tawl bang le kinoh gawp in, inn ka tun in kua mah leng ana om kei uh. Ka inn vengte pitek inn ngak a om kiah ka sungte koi a om uh a, ka nipi hia den a misi dak a khet uh chi'n ka dong a. Bawi, poi mah mah e den lam deuh a chi le ann heksak dia na kuan touh leng kon gal muh, na pai tum zoh in na sungkuante'n na nipi bei dek chi a kong a khak uh ka mu. Poi kon sak pih lua. Hiai ah na inn chabi uh hong nusia ua, nang kia inn a na om sa'ng hiai ah om tadih phot in chi'n hon khou hi. Ken le tua pitek kiang ah, bang teng hi leh ka anntang innsung ka va tun dia kong kik ding chi'n ka pawt khia hi. Anntang innsung tun in ka puansilh ki kheng in tua pitek amah kia a inn ngak a om kiang ka zuan nawn hi.
Ka nipi tanchin khawng ka theih dan dan a gen kawm in, pi na telephone uh ka zang thei zual diam ka lawmte ka thuzak ut zual ka chih le, va zang lua in ki thuzakna ding mah i neih a hi hon chi hi. Ken leng Bliss houpih le hiai hon chi pah hi. Den a misi dak ging ka za a nou veng hi mah maw? Ka dang hong awk mawk in ka gen ding ka thei zok kei. Ka nipi ahi ka chih le, poi hon sak pih mah mah a. Kong kisa ding ua, ka ni toh a gaal din kong kuan ding uh. Nang kia a inn a om ? Hi,e kei kia a om. Honna ngak inla na inn uh kon tawn ding. Dakkal kimkhat sung a hong tung ding ka hi uh chi'n phone a koih hi.Bliss te hong tun ding ngak kawm in tua pitek hih ka et et chiang in bang hiam amah mimal a theih utna nei hileng kilawm in pi na tanchin non hilh thei diam chi'n ka ngen hi. A buk tep hon muk khu liah liah leh khuh thauh thauh kawm in bang na thei nuam a e bawi chi'n hon dong hi. Ken leng thumu kisa in, itna thu ka chih le hong nui bem bam kawm in kon hilh ding ka itna masa leh tuni tan dong. Ka neu apan ka kithuahpih leh lawm a ka neih toh ka na ki zui den ua himahle ka kiteng kha kei uh, amah leng a dam lai a hiai a ka om lam thei himai zen le hong pawt ut lo mah mah ding. Kei bang in aman leng zi nei tuan lou chih khawng hon gen le hichibang om thei ding hiam ka chi'n kei le kei ka dong hi. Tukvelh a kava dak leh Bliss leh a ni ka inn varendah ua tu ka galmuh a, tua pitek kiang ah ka lawmte hong tung ta ua misi gal a kuan khawm ding ka hi ua omnuam in pi chi'n ka pawt khia hi.
Non na ngak sawt sim uh hia chi kawm in kong ka hong a, khua ahoih louh ziak in puanlum ka silh beh hi. Si inn lam ka hon zuan ua, lampi ah ka lawmte khen khat toh ka kituak ua hon chiamnuih zomah uh. Si inn ka tun tak chiang un bangkim felsa, misi galna program leng kipan ding ahi ta. Dak3 vel in si gal zou in inn lam ka zuan ua, nitak lenkhopna ah leng ka hong tel ding uh a chih ziakun nitak ann ka inn uah ka nekpih hi. Ka nipi suun petmah ka hi chih Bliss in leng a hon thei lua, a hon houpih tam kei hi. Lenkhop zoh in a inn tan uh kava kha hi.
Inn ka tun kik in ka chi a hik mul mul a, ka nu kiah damdoi ka ngen hi. Ka sanggamte a tam zaw misi inn ah agiah ziak un ka thawmhau sim mah mah. Ki tawldam sak chi dan in ka lum pah ngal hi. Zingkhua hong vak in ka nu'n hong phawng a, na nipi te inn lam ka hoh dek a zing ann ne ding in hong pai suk un hon chi hi. Ki hahsiang zou inn na ka sepzoh in ka nipi te in ka zuan hi. Sun lai tan ka om a, inn ka kik in ka inn vengte'n den a numei khat in hon houpih nuam a hon call a hon na chi pah a. Ken le amin bang a ka chih le, Bliss hon chih kawm in va houpih ve nungak te khawng bang in hon houpih nuam chu. Ken le thumu kisa in a phone uh ka zat sak hi. Ka call le Bliss in ana la geih a hon call lou ding na de aw ka na chih hia hon chipah hi. Nitak chiah hon houpih ding ka chih zaw hia chi kawm in na damsiang ta hia, tuni bang na hih a, bang na chi sim a chi'n ka dong hi. Ka hi tangsim a damdoi ka ne pah a, lum kawm a laibu ka sim le ihmu kha. Ka thoh a kon call a hi. Eh! Kon laibu piak bang tan na sim ta a hon chi'n hon leh dot a. A hi mah ka gen a, ka pat sawm sawm a lah ahi thei kei. Kon sim suak ngei ngei ding ka chi. Zingchiah hong pawt inla, ken kon sim dia nang ana ngai khe le chin chi'n hon zawn a, ngalsam huai zaw hi kei heh. Dam le zing chiah ka hong pawt ding, annek lim ni le chi'n phone ka koih hi.
Tua zan in deihsak tak a Bliss in laibu sim ding hon piak sim din ka hong kisa a bangtan mah le ka sim zou kei. Laibu pek tawpna apan in ka sim pan thei khong a, pek sawm val ding khawng kon lehsim chiang in lunglut huai kasa thak mawk hi. Zan sawt sim ta mah le a bul a kipan thak in kon sim thei ta khong. Kim khat bang ka hon sim zoh chiang in zinglam dak2 bang a ging man hi. Ihmut phot sawm in light ka off hi. Ka ihmu zok thei tuan kei ka thil sim ka ngaihtuah tuah kha a. Ka khanloh in dak 7 bang ana ging man a, inn naa ka sep ding om louh ziak in laibu sim ka hon sunzom nawn hi. Zing ann nezou tua laibu sim sunzom in dak10 gin dek kuan in Bliss kiang a hoh di'n ka kisa hi.