A ni leh a hun hong tun tak hial chiang in, Va hoh tak tak di e maw?" chi'n ka lawmpa ka dong thak san a. Ai mah kei dia, nang a hun suan suan na hih chiang a hon paisan leng taan di na hi aw hon chih ge ga vial le, pai va hoh ni le. I hoh ding na hilhkholh sa hia chi a ka dot thak nawn le. Ka ban hon su puak fek zomah. Ka nu kiangah, pawt na ding khat ka nei ua annek hun hon lap lou mai thei ka hi aw chi kawm kong kithawi khia uhi. Sunnung lam ni nem kuan Pathian in Adam leh Eve nitaklam teng a aveh hun toh kituak khawng leng ahi mai ding e. Nalh lo lou in ka kizem hi. Aveng uh ka tun un ka diip khawng hong ki sai lulut dek mawk veh aw. A inn uh ka tun un, a sungkuan un ana kim thrap ua, varendah ah ana tu nei nai uhi. Kou hon ngak a de aw khawng ka chi lungsim a. Ka lawmpa'n kimeltheih tuahna hon neihpih zoh in tua nungak Bliss in hiai lam ah hong pai un chi'n a innkong ua loupa tung a ka tu zei zai uhi. A huangsung uh nuam a, a let banah huisiang atam a singkung khawng bang le a hau mah mah uhi. Sawtlou nung in anau nu'n singpi hon tawi a ani (aunty) leng hong pai in thu vantang tuam tuam ka houlim uhi. Hoih tak in le ka en ngam ze zen kei. Pau deuh ve kizah kai sak dek na chia chi'n hon hohpih pa'n chiamnuih ven, hi chih the thu di le hingal nai kei veh ka chi num num lel mai.

Kon muh ngei khawng na bang e ki chi tuah in ka nui zai zai uhi. College kaina khawng ka ki dot uh le, kibang ana hi. CCPUR College a first year sin tuak, stream ana ki bang kei lel a. Ka lungsim in good ka chi hi. Ki maingal dek sim ta houlim bang tui mah mah chih lai in anu hong pai in, ann nesa in na pai ding uh aw hong chih le, eh tuah phat chi na hang e a first time di'n ka chi a. Ka ki en tuah kha sim, ut la balang utlou lah balang sim liai luai in ka om kha. Ka lawmpa ka dong a bang chih ding ihi hiam ka chih le, ken anu kava houpih thak dia hon khouh tei tei ua ann khawng a suang man uhle tuh i yes ngai ding hon chih kawm in a ann huan inn hon zotsan hi. A ni’n le, eh ka puanphoute ka va tuah ding, ana tu un chi kawm in hon pai khiatsan nawn zel. Tua chu kou tegel ki mai ngat chiah la hi lou, gen ding ka thei zok kei. Ki hei phei kawm in Bliss, den in kon muh khak ngei na bang non chi a, a tak mah hiam? chi a ka dot le. Hi, Bethany skul ka kai lai a lampi a kipel tuah sek ihi banah kou na veng uh hon tawn gige hon chih tak chiang in kisuanlah na khat ka nei mawk hi. Neu fel lit let, nuihmai zou gige kasa. A aw suah leng nem ngiei ngei, hon zou kasa lo pah mawk nikhat kimuh pat na din gentaklouh dakkal kimkhat le ching pan ham ham zomah hia. Na lawmpa’n hon gen sek in chin, hong pawt ding ka hi uh chi chi na in chin, na buai a ahi dia na hong pawt theih zok kei ua khawng hon chih zok mah le, ka tei aw kisuanlah huai sawn sawn na e chi in ka nui threm thram mai louh adang um ta lou.

Honna theisim sa khat tuh ahi peuhmah a nuam tuam ve ve. Ka lawmpa le ann huan inn apan hong pawt khiat kawm in, ann i nek ngai ding eiveh amau ann suang khinta uh hon chihtak chiang in kei pen mi inn khawng a ann pawng nek meng meng lou a di'n kisuanlah huai ka sa mawk hi. Bliss kiang h lengla kholh siam dan khawng gen in kipahthu bang ka gen khol zaw zen hi. Ni leng tum kuan ahi ta a, khomui zul kuan mi inn a hoh ann ne suak ding chih pen hon deihsak na khat ahi diam aw chih ka ngaihtuah lai in innsung lam i zuan duam hon chih le, sawt khoptak tua loupa tung a tu ka hih lam bang ka thei kho nung. Innpi (Common room) a pa leh a lawmte le ana om ua, ann huan inn lam a i pai zaw ding uh chi in ka kizui lut uhi. A nu'n ah sawtlou nung a man siang pah ding a hi in, na gil uh akial hiam chih bang i hon dong ua, kou kon panpih theih om lou hiam chi'n ka let dot kik hi.

Khua leng mial dek sim ta, ka nu kia pawt na ding nei leh ka zekai khak ding dan ka hilhkholh ziak in pai hak zek leng le poi ken teh chi'n innlam te ka ngaihtuah kha lawm lawm kei. Ann ne ding in hon sam ua, ani, a nu leh pa dinnig table lang khat lam uah a tu ua, ka lawmpa, kei leh Bliss lang khat lam ah. Apa toh ki mai ngat zomah a, ka zum sim mah mah hi. Bliss in ann hon thuk sak in meh bang adangte sawk ma in ka kuang ah hon thuksak zawk mah le, hon hoih bawl tuam na e, kipak chihlouh ngal gen ding ka thei kei. Thuvantang khawng houlim in leh maban a khawmpi (tuailai mission 2000) nei dek ka hi ua, laazil khawng leh namlaam zil in ka buai thei mah mah uh chi kawm in nou leng na hong tel kei ding ua chi'n ka chial hi. Uthuai ka sa kon sawm ding uh aw chi'n anu’n hon dawng a, Bliss ka etphei zual le, ka hong tel ding non tonpih ding ua le chi'n a lu a su ngau ngau hi. Huchia anne kawm a ka om lai un, ka biakinn laapawl zilna dak ging ka gal zak hi. Tuzan zil louh di a de aw chi'n anne lai ka khawl de du khak le, Bliss in bang chi e? hon chi a, eh laapawl zil ding ka hih lam ka thei khe guih a hi. Fel chi na uh chia. Nou vengte laapawl sak siam hon sa hive ung aw local channel khawnga ana ki en kha sek in chin. Kipak ka chi hi. Ann ka nek zoh un, ani toh sau khop tak a hong kha uh hi.

Kou leng ka lawmpa toh inn baang se lou in biakinn lam ka zuan suak uhi. Ka tun un lapawl zil ana pan ta ngei ua ka group pih bass te zilna mun (lenkhopna buk) kisuanglah sim kawm in ka lut uh le, eh hong zil lou ding na di ua tuzan chi’n sinsakpa'n hon muak a. Nungak kava hel uh le anne sa a hon paisak tei tei un chi’n hong zekai kha ka uhi. Khai gingta mah mah khang hon chihsan lel uh. Ken le, en ve ua jacket le ka silhlouh in a chian mai hilou maw phalbi lai in t-shirt kia toh nitak in kholai na pawt ua hia chi kawm in lazil kon zom uhi. Tua zan lapawl zil nuam kasa a, ka nui heu hau kha kha. Dak8:30 bang hong gin hial chian a tawp hak lam ki hisim. Lazil gawm ding in biakinn sung lam kon zuan uhi. Li vei khawng kon sakkhawm chiang un, lapupa'n tuzan bang in i kuan baih ding ua zingchiang zan chiah singpi hon sponsor ding om ahi hon chih le lapawl zil a kuan teng in khut ka beng nai nai uhi. Thumna hon nei in ka hong ki khen chiat uhi.

Tua zan light a pai louh nitak ahi a, khua a mial mah mah. Inn ka tun in ka sungkuante'n mei phu ana awi lai ua, kei leng ka va tu pah hi. Ka nu'n a, vot sa lou na maw tu tan tan puanlum le silhlou. Na gil kial lou hia aihkaleh koi hiam a nekna hon nei maw? Ken le ka nu kiah, ka pawt dek in kong zekai kha mai thei kon chih thei nawn lou maw ka chi a. Huai na chih lamtak theih ing a hi le le tua dak9 bang pel ta, lup hun phial ta eivoi. Ken le ka nu kiah kisuanglah sim kawm in tunitaklam ka pawtna ka gen a, ka pawtna ten ann nesa a hon pai sak un chin zekai sim kasa a biakinn a lapawl zil dia kuan suak ka hi chi kawm in, koi eh ken meiphu kon sing di chi kawm in ka khai pawt hi. Dak10 bang hong gin hial chiang in light hong vak ta khong hi. Ka pa'n a vok ann ding hon suangpah in ka nu lum ding in kisa hi. Tu zan kimawl (footbawll pek) i en diam chi a ka pa ka dawp le, sawt zaw kon etpih zou kei ding tuni ka nasepna ka tawl sim a hon chi hi. Ken leng aw poilou chi kawm in ka ute omna lam innpi a tv en dia ka pai phei lai in ka ute khat alumkhin khat in nang le tulai pawt hat sim hive teh aw hon chih kawm in a room light sumit din hon sawl hi. Dawng het lou in ka sumit sak hi. TV en pan light hong mit daih a ka na lum mai di chi in ka u te mangpha khak in ka room ka zotsan hi.

Zingkal bang ka thou baih sim zo zen a inn naa panpih theih dan dan in ka mounu ka huh hi. Annek zoh in ka lawmpa kiang va pha zual ding chi a ka kisak lai in misi dak hong ging veng veng a, kua hi ding hiam chi'n tua sidak khet na lam ka zuan hi. Vengsung a taltak mah mah leh mi kumlui ahih ka theih in poi kasa a, ka lawmpa kiang va pha in hantou a kuan din ka kisa uhi. Hanmual ka tun un mi le ana tam nai kei ua miguk khawng ka pha lel uh. Ka lawmte kia khua om dan in zong suun mah mah a de aw tuzing kho om dan le nidang toh kibang lou in chin, vot mah mah lah niim a niim zomah in chin bang hiam thiltung khat om dia gingta tin ten ka hi ka zingthoh a. Hiai ding ziak khawng ahi mai diam chi kawm in hantou kong kipan uhi. Hantou a ka kuan khak chiang in it leh ngaih hon paisan sa te han mun ka veh sek hi. Ka pi han leh buai lai a Saikul a misi luang sawm te kivui na ahi ta'ng pi. Loupa leh a kiim leh kiang bang ka va hah siang sek a, tua lai khawng in hiai hanmual om ding dan khawng ka suangtuah tuah sek hi. High skul kai lai khawng bang hon phawk sak in, summer vacation chiang bang a sun nilouh a lawmte toh kimawl lai khawng, lehkhaden ki mawl khawng, laizial bang dailing buk nuai kawm pek pek khawng a va tep lai khawng leh mi kikap (no.li) lai ka tuah khawng hong lang dun dun hi. Sun nung lam in misi luang vui zou innlam ka zot in ka lawmpa'n tuzan in va pawt ding hon chih le ken, ngai lou nitak pawt apa'n kipahpih khollou mai thei a hi in a nu le pa om hun mah a i pawt hoih zaw ding chi in ka ki khen uhi.

Inn ka tun in ka nu'n Lian, den a dakhawm khat in na laithon di hong pia a, na table tung ah ka koih. Ka nu bel a neu apan lai leng ana zil kha lou, kou a ta ten ka sinsak uh hi'n chin. Kei leng ka puansilh le kheng lou in tua laithon koi/kua apan hi ding hiam chi kawm in ka table om na lam ka zuan ngal hi. Tua laithon ka muh in ka nu om na lam ka zuan pah veng veng a, "Nu, admission muh theih ding, a confirmed na ahi". Bawi nang hon paikhiat san ding maw chi'n thil omdan a theisiam pah hi. Ka inn phaitam ua vok ann ka huan na sek ua kisil na ding tuilum ka suang kawm in ka nu meh mal ka huh in ka lungsim ah Bliss hong ki lang mawk in. Ka nu kiang ah, nu zan a kava pawt na nu bang chi na sa. A saptuam ua bang a naupang heutu apang, khotang bang a le kizang mah mah ka chih le ka nu'n, lai hoihtak in non zil zom tou zel dia nou le na ki thuah zom tou zel ding ua, Pathian in nang a dia hon seh sak ahi le kou na nu le pa'n hon deihsak lo na ding ka hi. Ka kipak nu chi kawm in ka tuilum suan le a sa ta dia kava kisil ding ka chih le ka nu'n na pa a ding le hon suang zom ngal in aw den mah chia hong tung ding ahi.

(sutzop di)