Zogam chu Election huihkhi in hon zeem nawn ngei a, kei ngei leng nidang a ana lunglut ngei mahmah lou hi na pi in tutung chu lamdang tak in Election huihkhi in hon mut kha tei hi. Zogam ka itna bang a lian semsem mawk hi.Ken le lamdang ka sa petmah mai a, Zogam etlawm na te bang nidang sang in ka mu hoih zaw mah a bang hi. Ka Zogam itna chu hih pichin sawm in ken le Mipi palai hih chu kon sawm ta hi.

Nidang a khotang leh saptuam makai dia hon sep chiang ua le mipi (vengsung khat maimai) palai ding in ka chin kei ding chia ki zukkik sek ka ni hi ngei a.Tutung in ahih leh vengsung khat chauh hilou in kho khat mipi palai dia kon ut mawk hi ken le mak ka sa mahmah hi. Nidang in kei ngei leng Mipi palai te dukdak louh dan gengen te pawl ka na hi a,tun chu diktak tak a Mipi palai hihsawm a Zogam it ka hi a. Mi ten nang hial in hih sawm maw? chia hon dot chiang bang un, HI chi pah lou zawzen in Zogam ka it dan ka gen pih ek masa zel, huai zoh chiang in Hih sawm ka hih dan ka hilh pan zel hi. Zogam it ziak a Mipi palai va hih theih phut ana hilou in Mipi te bang it masak ana ngai dan ahi a,ken le a Senior zaw te bang ka va dong zel sam hi.Himahleh amau hi Mipi palai hih a nop louh dan ngen hon na gen pih ua,ken la chu ka lung sim in “Non it thik man uh eive” ka chi zel hi.Amau le na ut taktak inchu chi in ,a lampi hon gen pih zel uh hi.Mi tam deuh ka va houpih nung in chu a tam zaw ten mipi palai din hon deih uh hi in ka mu hi.Kei le thu mu ki sa in ki sakkholh thei dan teng in ki sa khol din kon ki sa ta hi.

Party lam ah ka buai kei a,bang party peuh mah tang leng le ki candidate ka sawm thou thou hi. Election hon nai deuhdeuh ta ahih man in ken le Campaign chu kon pat sawm hi. Himahleh ging tak sang in sum ana hek mel zaw hi.Lawm le vual a nei deuh te sum bat a awl a dit kik ding chi in sum bat ding kon zong ta hi.Ka ki ngaihtuah chiah Campaign na apat le mi sum lei ba a kipan hing a,ka mipi te bang tan ka tunpih mah diam aw??chi in ka ki ngaihtuah sek hi.Tua ka sum bat na ten ka dit chiang in a sumpung omlou a piak chu a nuam kei dia,huai sumpung te koi ah ka la ta dia??chi in ka ki ngaihtuah hi.Huai ziak in diktatna toh mipi palai a va pang ding ka chih sek pen hi thei ding in ka ging ta nawn kei mawk hi.Nidang a mipi palai negu hat ka na chih sek te dinmun ding bang ka ngaihtuah a,negu hat lou in a poimoh ziak a sum a lak uh ahi chih ka thei khia hi.Campaign ka pat ma a leng  ana buai mahmah ta ka na hi hi.Mipi palai ching tak ngial leng bang ka chi phet diam ah.Thil ka ngaihtuah sau luat ziak in ka buai mahmah a,thil sau lua va ngaihtuah a le bang a phatuam di omlou ahi chi in,tua ka buaina te ngaihtuah lou phot ding in ka thupuk ta hi. Lawm le vual te hoih na ziak in sum bat di chu tam khop ka va mu khia hi. Ki candidate sawm taktak ka hih man in Campaign chu pat kon sawm tahi.

Campaign chu kon pan ta a,a khua ua Hausa te chu suk lungkim na’ng in sum tam khop tak piak ana ngai uh hi.A lungkim na tan uh i piak nak leh ut dandan a Campaign thei ahi mai mah hi.Himahleh a vote lam pen ahih leh sum pe tam zou zou a ding ana hi hi.Tulai a khangthak ten a thang sak mahmah uh Teacher Eligibility Test (TET) a chih uh toh ka teh mahmah hi.TET a pass teng Sepna mu di chih na hituan lou,sepna lei na dia a poimoh,huai le sum hauhau in sepna neih theih na di hi pan ding chih dan ahi a,huai mah bang in khua khat a i va Campaign theih leh a vote uh ki hope pah ding hi nailou.sum hauhau in vote mu ding hi mai.Kho teng ah a huchih ngai mawk in ah,sum tam a bei law kei dia chi’n ka ki ngaihtuah a,zan bang zah hiam bang ihmu theilou in ka om zel hi.A khen chiang in tawp thak mai ka ut hun a om tham hi,himahleh pan ta vang lak chu a tawp tan ka ut zel hi.Ka lungsim hi a buai mahmah ahi top mai hi.Sum bat theih na di teng a la ba khin ta ka hih chiang in,tua sum ka neih teng ka hawm siam a hon ngai mahmah ta hi. Hawm siam lua a khua khat mah leng a lungkim na tan ua piak khak louh ding bang ka lau gu sim zel hi.A vek ua lungkim sak utluat ziak a khat mah leng lungkim sak khak louh,Duham chaana ka hih khak ding bang leng ki ven a hon ngai mahmah hi.Huchia sum buai a ka buai kal in election hon naih law ta ahih man in sum pen poimoh mah leh ,a thu leng poimoh ahih man in ka Campaign chiang a ka thu gen ding khong le ngaihtuah hon ngai hi,lungsim chu a gim huai mahmah thou hi.

Hunte hon pai zel in,a Campaign kon pat taktak a hun ta.Thugen bang siam a ngai dia,thuhoih ngen gen a ngai ding chih ka thei hi.Huai teng thei kawm in Campaign chu kon panta hi.Ka campaign patna ding in “Nou palai ding a hon ki pe khia ka hi a,non vote ching ua leh......Na khua uh langva ka khuh suak vek dia vuahzu,nisa chih te na thei nawn kei ding uh.Na lampi uh leng a dung le vai a kikim in kon hih sak ding,Na lampi teng uh le a tou omlou in a suk ngen in kon bawl sak ding” chia campaign kon pan chu ka hih fuh mahmah hi in ka ki thei hi.Mi te phatna thu chu a langlang ah ka za ta mai hi.Ka campaign chu gingtak sang in ka hih fuh zaw a,mipi’n le hon deih mahmah un ka thei hi.Hunte hon paizel in Election chu hon tung ding ahi petmah ta hi.

Campaign hun hon bei ta in,election hon tung ding hita.Ka campaign sunga ka thugen te a gah lou ding ka hi ta.Elcetion chu hon tung petmah ta,ken le ka mi muan mahmah,amau le a vengsung ua mi te muan mahmah ngen te kiah kha ahi thei tan a kei a dia vote guk sak din ka chial hi.Election ni chu ka buai khop mai a,diktatna toh vaihawm dia ki sa himah leng,ka ching ut luat ziak in ka diktat na teng bei in,Saptuam a mi zat theih mahmah te bang chu a diklou lam ngen a hih din ka sawl hi.Ka hih fuh ngial aka,a tam zaw chu ka capture theih ziak in lung muang tak in Election ni chu ka om a.Vote sim di ni bang chu ka ngaklah ngal mawk hi.Mipi a tam zaw in hon deih uh hia deihlou chih le thei lou in ka langpa sang a vote tam ka muh zoh ziak in chu Mipi palai din kon ching tei ta hi.

Ka hampha mahmah mai a,ka Party ten ah Governtment chu kon bawl uh hi.Himahleh kei hi ka first time ahih toh ka junior mahmah lai a,Minister dinmun tan chu piak in ka om tuan kei hi.Mohpuakna dang chu hon pe ngei ua,ken le ka Constituency te adin ah ka theih tawp in pan ka la a,development work a tam thei lam kaih lut ka sawm hi.Election lai a ka campaign lai a ka thugen te bang ka bilkha ah ka za a,himahleh ki junior law lai ahih man in Assembly house khong ah le a nunglam pek ah kitu kha a,ka mipi ten zaw hon muang law di uh hia maw.....kei la a last lam a seat tang ban hamham ka hi chih ka theih chiah ka zum mahmah hi.

Hunte hon paizel in ken le ka theih tawp suah in Development Fund a tam thei lam kei constituency adin kaih lut ka sawm hi.Ka kaih lut zoh sunsun te in ka bial sung ah chu Development Work ka sem sak hi.Ka buai na hon ki behlap a.Development Work ka sep dek chiang in kua Contractor zat di ahia??chih ka buai mahmah hi,a ziak ahih leh Election lai a kei lam a pang te ngen in Contract hon nget ziak uh ahi a.A vek ua la Contract naa pe zou lou ka hih chiah a heh pawl bang ana tam mahmah uh hi.Hu chi kawm kal ah Ken haksa pipi a Fund ka kaih lut a ka Constituency ka puah chiang in Mipi ten a Nekguk val teng chauh ki tang chi in a phun na uh ka za zel a naa ka sa mahmah mai hi.Bangmah sem kei leng la a vek a Negu tel hon chi zel uh hi.Ken la haksa pipi a Fund ka kaih lut hi sam,Mipi te apat phat na aw ging ana ki nem sam ,himah leh ka ging dan lou ngen a thil hon pai a.Mipi palai a nop mahmah dia ka ging chu ka ging louh dan tak in ana om a,naa hoih sep le ka tha a dah zou top hi.Naa hoih sep leh le ki gensia,sem kei le le ki gen se thou,Zogam pallun sak tu dia ki pan khia himah leng Mipi te ki thuahpih na ka muh louh ziakin kei kia in Zogam ka pallun sak zou kei ding chih ka thei a,himahleh ken le Mipi te ka moh sa pumlum kei.Kei le Mipi palai ka hih ma in Heutu te ka na moh sa gige a,negu hat te peuh ka na chi sek hi.Tun chu a Mipi in ka pang dia,a naa sep hoih te uh ka phat ta ding,huchi hileh Heutu muanhuai kinei ding ahi chih ka thei khia a,Mipi Palai apat ka ki resign ding chi in Resignation chu ka submit lut ta hi.

Ka ki ngetna hon pomsak uh hia ,pom saklou chih ka theih ma in ka Phone hon ging a,ka et leh dak 6.00am ana ging a, ka ZAALMANG Khovel ana hi maimah a.Kei le nui huihiau kawm in ka lupna tung apat in ka thou khe ta hi.