Mahni sisan a piang itlou a vaang mahmah ding hi. Kuapeuh in itate i it ua misang in hong hoihzaw uhenla mite tung ah hongleeng in amauziak in mite zahtaak kihileh chih genkhiatlouh a nu-le-pa te deihpen leh kinepna pen hiding hi. Mahni siamtheihtawk in tate ki keem khanglian utchiat hi.

Midang mahbang in "pa" chi a hon samding tapa kahon nei a mel hoih hia hoihlou hia chihleeng katheikei.. it in kapum it a kamit ah ahoihlouhna muhding kaneikei hi. Akhanhoih a mite tung aleeng a achi asa;tanaulaina leh khotaang-le- saptuamte ading a dottaak leh suanhuai honghihding deihluat ziak in kei leltak kepkhanlet ding a kaki sitluat ton leeng a om hi. Zan lupchiang in a chilum sukkhak nuam kasa a sun inleeng nop asak khengvalding nisa in a salh khak ding kalau a adeih khopval leh a taksa ading a hoihloutan huih in a muut khakding lau in kholak ahleng kadom khengam kholkei hi. Pa hihma a upaten "huihmut dingleng konphallouh hilou maw" chia ata thumanglou uh aduatdan uh anagen zel uh omzia katheisiam pan hi. Tate duatkhengval luat gen otna dia "huihmut dingleng phallou" kichimai ding kasakleh adamlouh khakding uh lauhziak khawng a huihsia mutsak khaak ding phallouh genna himai in kathei thak hi.

Huchibang a ka it leh kaduat ka tapa mite ading in mit tunhuailua a hoihlua chia gending hikholkei mahleh kei ading in itna mit kia a et ahihziak in a taksa omdanteng hoih kasavek mai hi. Akhepi ngat a sau zihzeh leeng kenbel kilawmpih kasalua hi. Amit neuhah leeng mite ading in neuchik liandeuh lezaw chih ahi nading a kei ading intuh bawlthak theih hihimhim leleng bawlthak ngaituan kasakei hi. Itna leh duatna lungsim toh et ahihziak in soisel nading neilou kahi maithei na a hihkhial leng kakisa samkei hi. Ka it petmah a zingthoh hun a kamit kahah masak chia ka et masak pen a hi gige a ihmut limtak a siiklup biingbeeng a om khawng a muhthanop huai mahmah hi. Koitak hiam hohkhe ding a inn kapawtsan ma in amel muhlouh a kuanding ka utkei hi. Vai katun inleeng a mel muh masak pen ka ut a kamuh phak a a omlouh hun inleeng koi a om hiam chi a kakan leh kazon masakpen ahi gige hi.Ann neklai a hong kahkhiat kazak in bangchihiam chia a ziakding katheih kei a akahsawt ni in ann kamlimlou tak in ka om hi.

Haibang ngakla'ng achihzel dan un katapa honglian henla katha honkhek in amah zalzou in lungsim tawldam tak leh lungmuangtak in ka khovel hun nanung zangleng chih duhthusam anei in kinepna toh hongkhan letkal ka ngaklah theilua hi. "Pa" honchih khiatni kamang ngilhthei kei atutan inleeng kabilkha a om in amel kamitkha in kamutheilai hi. Kum 2 hongphak kuan in gen ut tampi genchiang theilolou pipi in agenzel a athilgendan khawng kipahpih in midangkiang a "huai a chi" chi a kagenlouh tampi leeng kanupa un ka kihilh tuahtuah khanak uhi. Kathumna ah "Toupa tapa deihthoh huaitak nonpiak ziak in kakipak hi. Keileltak etkol nanuai akhanglian ding in kisitna lianpi kanei a nangman ahoihding lampi hon kawkmuhsak inla kei etkol diklouhziak a nangmah hon suzahlaak lou a khosung minsiatna bawltu ahihlouh a saptuam suzahlaak ahihlouhna dingleh kami kasate adia ka nam uh tawisangtu hiding in lungsimhoih leh ngaihtuahna hoih neiding in katapa hon bawlsak in" chibang in nitaak lupding thumna leh thumpi na himhim ah ngetna kaneizel hi.

Itluatziak in deihdan a hong khosaklouh khakding lauhna ziak in "Toupa ka etkol zohlouh ding ahih a nangmah hon minsesaktu dingleh nu le pa suzahlak ding ahih inzaw nang a hoihzaw ding anagel bang in vaihon hawm mai in" chibang a ki awilou pipi a kathum hunleeng a omkha zel hi.

Tualteithei hong hih in kathumna ngaihkhiat a om in naupang pahtaak huaitak hong hi hi. Kum 2 valzek himahleh anu apa mitmei hon vengthei a ahihkhatpeuh "hihkoh" chia gen ngailou hial in kamit hah in ka awikei chihthei in ahih utluat leng en vungvung in atawpsan zel hi. Athil theihsiam ziak a kipak in Pathian kiang ah kipahthu kagen khial ngeikei hi. Akiang a om a nitum a kithuahpih ut himahleng neekzon louh theihlouh ahihna ah vaikakuansan zel hi. Ka kuankhiak dingchiang in "Bawi,bangkon puakdia" chi in kadong zel a "Pa nang sum nei maw" chi in hon lehdot zel hi. Nei kachih chiang in "Grapes/aduh nektheih dang honpuak in" chi in hon vaikhak zel hi. Alungsim en a "Sum neilou" kachih hun in "Pa,bangmah kaduh kei". chi in aduh agen ngamkei hi. Bajar vakpih a dukan a aduhpen kawjsak dia kachih hun inleeng "pa,nang sum neimaw" chih hon dot masak pen ahi a "hi" chih azaak chiang in aduh kawk ngampan a aduh mahmah himahleh "sum neilou" kachih chiang in "pa zanlam inle kanekhinta kaduh nawnkei" chi in hon dawngzel a khatvei nihvei kialeng hilou a kum 2 lel naupang in hichibang a hondawn theihzel lamdang kasa a kathumna dawn a om chi in kipahthu kagen khial ngeikei hi.

Hun awlneih chiang in aangpom in koitak hiam khawng ah kahohpih zel hi. Gimsim a ka naakging hong kinoh chiang in "Pa,nang gimta maw" chi in ka mel a en a "hi" kachih chiang in "kei gim nailou" chia khe apaisawm in kapom zou nawnkei hi. Tomchik bek khe a akipailouh in pom a utnawn kei hi. Gimlou kachih hun intuh kum asawm tuankei hi. A hontheihsiam dan kipahluat ziak in lungsim chituamtuam hon neisak a akhenchiang a kipahluat ziak a khituibang luang in akhen chiang inlah naupang khotheidia le akum ching hinailou in hichi lawmlawm a hontheihsiam sawt ka kithuahlouh dingziak uh adiam maw chia ngaihtuah in zasawt pipi kikhasiat in kakiang a ihmu biimbeem ka enzel hi.

Niteng neektawm zong a khosa a akihihziak in mi tate kimawlna bang bangmah kileisak zoulou hi. Mi a eng ahi chih kithei mahleh atheilou bang in ki omsan mai hi. Ahihziak in amah kam apat in huai kadeih chihna kaza ngeikei hi. Zingsang khat aangpom in ka pawtkhiat pih hi. Naupang bangzah hiam a cycle neu utoh ana kimawl ua amuhtak in deih in amelbang atuam zezen a deihpeetmah ahichih kahaih kei hi. Kam nemtak in "Pa, enle sum ineihchiang in hiaite lei ni aw" hon chi a katapa in apautheih tuung apat hon nget masakpen ahihziak in keisak teitei ut in leiteitei ding in kalungsim kakoih kip hi. Tu le tu a leizou ding kihileh leisakpah a ut huailua hi. Ahihziak a neektawm dinglel mukhia ading in sang 3000 lam puakkhiat zohvual hilou ahihziak in "Bawi...nangdeihlua maw" chi in kaleh dot hi. "Pa, sum naneih leh deih..na neihkeileh deihlou" chi in hon dawng a neih kichinlouh ziak a ka tapa ittak deihluat leisak zoulou a ka om khasia in ka mittui a hong dai mahmah hi.

Hun hongpaizel a kum 2 leh a kimval deuh a honghih in nikhat a chi hongsa a Malaria tamna ahihziak a lauthawng in doctor dongselou in sisan ka va test sak hi. Azing in result kavala a "Negetive" ahihziak in naupang chisa maimai ding a koih in chisa damdawi khawng pia in ka ki enkol uhi. Anithum nung in a chihongsa nawn a a om nuamlou lua hiding hiven kap nutnut in a chingtheikei hi. A khemtheiteng in ka khemnung unleng atawp taktak theikei a "na gitlouh leh hon zepding kahi" chi in awl chik in a taw kazepsak hi. Anatna nuamtuamsa hilou a honlauh ziak a dai teitei ahiding a akah hongtawp hi. Keileng kasep maban semding in kakuansan hi.

Zingkal lam dak 10 dinglak in a pi in honpua in Damdawi inn ah ka kimukha ua achisalua a a omdan leengtuam gawp ahihdan hon gen hi. "Bawi.." chi in api nungpuak lai kavasam a hondawng ding kasak leh et leng hon enlou in hondawng hetkei hi. Kasam zel a hon entuan kei a amai asel zawsop hi. Ka zepziak a honlau hiding bang in kakoih a honlauhlouh nading ding in kahoupih a aphatuam tuankei. Ki etsak teitei sawm in a ka ki maingatsak a huchi in leeng a mit a si zawmah hi. Doctor hongman in kava ensak a sawtleng enlou in Doctor pan "Nong paipih haklua ua a khuak a Malaria nalut zekman ahi" hon chi mawk hi. Naa hina maizen e...chihdingdan katheikei a ka hi meimuai a dah leeng dah theilou kahimai hi. Doctor kiang ah lam etna omlai ding adiam chih kadong a "adek lak akhauh lawnaikei a akipanpan ahiding..adam dingleh damlouh ding eikhut a om ahikei a Pathian kiang ah ngen kawm leng hiaisang a nazaw tampi leeng dam khia ahi" chi in serious tak a apuaklut uh naupang 2/3 halh khetate hon ensak hi. Zingkal a kihou tiautiau lai dakkal 2 nung a houpih theihlouh in a om maimah a lamdang lua in manglam mah abang hi. Doctor in hihtheih teng asuah nung aleeng hoihzaw tuanlou abatziak in "mundang na muandeuhna a om lehleeng hon refer mai in aw Doctor" ka chizel a "Hiai natna ah zaw ahoihding chih kahon kawkmuh theituan kei a, nalung gulh uleh Guwahati khawng nazuan maiding uam" chi in hon lehdot zel hi. Sum giautau zawkmah toh Doctor pa sawl luatlouh a mundang vanaih a lohsap thouding ahihkhak leh chihna naziak in mundang naihlou in ka ki etkol uhi. Pathian kiang ah kathum zel a "Toupa katapa hongdamsak in" chia kathum dekchiang in "Toupa nangmah hoihsak dan in vaihawm mai in" chihlam kia in kathum khanaak hi. "Toupa nang ah muanna ka koih a nang vaihawm dandan pawsiam ding in hon panpih in" chin kahah thum zaw hi.

Zingkal a kiphasak lua chi a kazep nung katapa toh ka kihouthei nawnkei uhi. "Bawi" chi in kasam zel a akam a hondawng zouding a haatna a neihlouh ziak in a hon et thohlel zel hi. Nidang bang a houpihtheih hileh ka ut mahmah mai a dahluat ziak in chihdingdan theilou in kahihtheih omsun akiang apan paikhiatlouh ahilel hi. Tomchik kapaikhiat kal a katapa in kapa chia hon zon khakding kalau a kongpua kaphak zek inleeng akiang a hon kailut om in kathei hi.
Anithum nizan ahi a keibel kalung mawk in khasiat dingdan leeng katheikei zezen hi. Nungak tangval leh nupi khenkhat in lam etna omlou sa ahingei ding ua hon giahpih ua zinglam hong hih in katapa in chiangtak in "PAA" chi in hong kikoukhia a "Bawi bang a" chia dawng in a aw zaaklai ka kinem a himahleh amithah hong mial in hiaileitung hon nutsiat san maimah hi.... Khasia a kah ek ek nading dinmun a om himahleng kah dingdan katheikei... A luangtung ah keimahmah kathum a "Toupa katung a nathil hih ah ka khasekei..nang lemgeel na leh nangdeihdan pawsiam ding in keileh kazi leh tanaute athak in hong veh in" chi in kathum hi. Akhonung in lamdang kakisa a miten bang chin hon ngaiding uam chihkhawng ka ngaihtuah thak zel hi. Pathian a muanna hichituk a nei ding a ginna haatleeng kahikei..ahihziak in lungmuanna khat bel nei hin kakithei vevw hi.

Muanna nei kisa in A vaihawm ding kikhelsak zoudia chin kahikei chih kakithei a akhengval a muanna kaneih ziak a katapa hinna humbit a omlou adiam chi in ka khonung ngaihtuah khanaak hi. Kumpi Hezekia ngetna ngaikhia a ahinsung kum 15 tak a behlap sakpa kenleng bangziak a kapzen a ngenlou ka hi ding...Ka itluat katapa hinna ding a bang dia Pathian buanlou kahi ding.... Khonung kisikna ngen in kadim hi.

Natna kibang a midangte damkhia a kenta khatkia kaneih bangziak a damkhelou ahiding...Anatlai a Pathian kamuanna teng in hon kikhonung kisiiksak hi. Bangziak a katapa dam nadia Pathian buanlou kahiding.... Pathian nabuan a katapa hinna hawidia na ngen hileng katapa damding bang in kakoih khonung hi. Pathian a muanhuai a ahihziak in mahni thilhih tellou amuanhuaina hon sulangtheilou ahi chih katheikhe thak hi.

Ken katapa ka itna kagen ot ahikei a kagensang mah inleeng ka itzaw lai hi. Kei itna ta itna tengteng lak a thupi ahituankei a Pa kichiphot in atate hiaisaang a thupizaw in ki it hi. Taten Pate itna theisiamlou in eichihdan a hon hihlouhchiang un hon itlou isa ua amau saupi ana ngaihtuah ziak ua ei adia hoihlua ahihlouhziak a hon na Amen lou hizaw hi. Ta neihma tangval lai in nu leh pate thumanba kithupi ngaihlou khanaak a ta ihon neih a ei omdan/i nu le pate thu izuihlouh dan a ita in eithu honzuilou dia ikoihchiang in i dipna in naa kisalua hi.

(A tribute to my dearest only son Mr (Lt) S.Zambiaklian who left me at the age of 2.7yrs on May 2002)