Ka ngaihtuah thak thak chiang in hiai nungaknu'n bang ngaihtuah nei a de aw ka chi lai lai hi tunitan dong in. Exam ding kuan hita, innlam pai ding bang ngak lah gawp banah ka duangzen in Delhi hong tawn tou inla, innlam i ton tou khawm ding hon chih pen ka bilkha'n mangmoh hial ven. Huai hunlai in zingsang baihtak a thou sek, dak nga khawng a shower fifit. Laibu tawh a sakmin thang Besanth Nagar beach ka zuan sek hi. Amun ka tun chia'n khua vak (dawn) ding hiphial ta, tuipang (sea shore) kiang ah ka laibu,tuibawm leh silipal koih in ka kivial leh leh hi. Mi zong tam khoptak a na om khin ua, zing ni nou suak ding ngak lah chiat in ka kipel pel chiat uhi. Tua zing ni suak in bang hon tun dia, kipahna maw dahna chih peuh ngaihsun veng aw. Tualai a ka ngaihtuahna a hong lut veu sek, kum khat le kim paisa a Tsunami tun lai (26-12-2004) in mi zong tam khop tak tuipi pang a ki vial leh ding uh hia, tuipi'n a tuahmang a sing a sim om ding hia chi’n ni suak dia kisa ka gal et veng veng chiang in hampha ka kisa lou thei kei. Khua awl kha kha in hong vak hiai hiai a, mial na zong bei hiai hiai leh ni awn (nang turn hunta or na shift kipanta) hikawm tak in. Hiai tuipi Bay of Bengal, dum kiei kiai, za dem dom ka et et chiang in a bawltu thupina lian na tel e chih khawng leh laa bang ka lungsim ah hong suak mawk veh aw ka chih lai in, ka paam a numei khat in hon na en nilouh hi dan veh aw. Ka halfpant teng hiam aw, ka t-shirt blue silh or ka figure nalh honsa na maw chi a va dot na dan la om kei in, ka kitheihmoh bawl zen peuh hi.

Ni leng seh thum suah seh khat bang hiai tuipi za dem dom pangkhat a hong kilat khiat chian, khua bang leng vak pha mah mah ta, tuipi kihot diam diam etlawm leh muhnop huai in, tung leng vasa ten zong a siamtu phat in hong leng diam diam uhi. Nisuak leh a tum in gen nei lotel ahih dan ka theisiam pan pan hi. Muhnop huai kasak lam tak khat hia thilsiam teng lak lak a leng. Tua zingsang in bang hon tun mai diam maw chih peuh ka lungsim ngaihtuah na in sungkuante, lawm le khanvualte bang ka ngaihtuahna ah hong lang hi. A kum a sim kikhen kha, khenkhat te din kipahna mittui toh kimuh khawmna hi ding, khenkhat te dia ngaklah huai het lou hithei zel dia, khenkhat te di'n dahna leh lusuunna zing ninou mai tuah ding uh hia chih khawng ngaihtuah neuh neuh in Pathian kiangah kipahthu gen (quite time) in hun sawt lou ka hon zang zou thei khong hi.

Khovak a manphat dan leh mit mah a mu nawn thei zel ka hih ka lung a dam mah mah hi. Pathian thilsiamte lak lak a thupi kasak tak mai ah ka ding den hi. Huchi kawmkal in den a numei nu'n hon gal et zel zel dan ka haih kei. Ka van ka koihna toh kigamla lou kinung hei kawm in ka et zual leh honna en den ahih kizephawk ahi dia, ki hei zok in sehnel tung ah a tusuk hi. Tua nungak bel mingou, dinsang sim, north India lamte ahih ka thei ngal hi. A melputdan leh kizepdan etlawm khop mai. Keileng singpi zuakte hong pai ding uh ngak kawm in ka laisim ka hon panta khong hi. Ka ngaihtuahna a thil tamtak hong lut zual zual a, ka laisim leng zing ni dang toh a kibang kei. Ka hem et kawm zel chiang bang in kituak chet chet hileh kilawm tak in khatvei ka nuihsan chem cham mawk le amah le hong nui tei saam a, zing ninou suak in amai a khoh etlawm tel mai! Amah le kei bang deuh a zingsang a beach pang khawng a laisim zel dia paisek ahih ka thei, bag khat a puak ka thei a, laibu leng sah deuh mai a pheitung a koih hi. Ka laisim sun zom kawm zel in leh singpi dawn kawm in ka ki en tuah zel zel uhi. Ni leng sang dek simta dak8 bang ging ding ahih tak toh chi in pai dia ka kisak bawl kawm a ka et phei le, amah leng ana kisa zel mai a. Aw khai kua na hiam va chih phut ka ut mai.

Ka laibu, tuibawm leh ka silipal ka khut a tawi kawm in awl kha kha in ka hong ding khia a, lungkim chi mah mah dan in kal ka hon suan pat le amah leng kei hon copy den hia hong kisa mawk in. Khe vuak a sehnel tung a pai nuam kasak dan khawng a thei zomah de aw khawng ka chi lungsim a. Awl kha kha a ka pai chiang in amah le awl kha in hong pai zel in. Ka kin pai le amah le kin zel a ziak bel a liim (shadow) ka khebul a kilang leh kimu thei ai mai mah chia. Khe kalsuan guk khawng a kigamla lel ka hi ua, beach pang apan main road tan minute 4 khawng lampai hiven, a hon nungzuih nilouh tak chiang in ka lungsim ngaihtuahna nuam pha kei. Main road lampi tung in kaan zom khin ngal, tua pan a ka room tan minute 10 lampai hiven. Huai apan in zong hon nungzuih nilouh ta lai. Ka veng uh ka tun in ka lampial na bul a kinunghei a ka et le, apai lai khawl di de mitphelou zen in hon en a, amel a sehet kei. Hon ngaisim na maw va chih guih din la hi kei ven aihka le zingchia ki mu nawn ni aw va chih hoih zaw le ki lawm ka chi lungsim nawn a, ka bye le hon bye zel. Kikhen thei khong tua zingsang!

Inn ka tung khong a, kho ul kai niip niap in. Ka roomate pa le ana thouta ngei a, zing singpi dawn le news television en kawm in. Ki hahsiang zou in dai di de in a kava tut le, mak honsa sim a. Bang hong chi e tuzing na morning walk chi'n hon dong hi. Nuam kasa tuzing ka lampai, saupi tak km5 bek apha ding ka kimkot zoh ka chih chiang in, e he phak louh na vele hon chi kawm in office kai din hon kuan san hi. Tv khawng en kawm mah leng tua zingkal a nungak nu mel hong kilang den mai mah a. Ka hih ding pen le thei zaw zen lou in suunlai tan ka om hei huai nilouh. Suun ann khawng bawl kawm in lai ka simkawm hang in, ka thil sim bang a hia chih na ngawn le ka thei zou kei. Sawtlou nung in ka roomate pa le inn hong tung kik ta a, annek ding ka bawl sak zoh in laisim di'n ka ki pan nawn, tua hun in bel a zia om deuh ta. Nitaklam nitum kuan in meh khawng lei kawm ding leh innlamte thuzak kawm di chi'n ka roomate pa toh ka hong pawt khiat uh le tua zingsang a numei nu dan deuh khat lampi ah ka kituahpih kha nawn ta get. Meh khawng lei zou, PCO a innlam te houpih zual. Ann ne zou, laisim kipan. Ka lupding kuan in, zingsang chiang a beach hoh ding ka de aw aihkaleh inn a om hiit hiat ding chi a ka kingaihtuah tuah na lam in ka ihmu kha hi.

Alarm hong ging kar kar a, ihmut ut lai mah leng thoh louh theihlou ahihman in ka thou a, ki hahsiang zou in beach lam ka zuan hi. Khua vak dek phiil phialta ahihman in tea stall khawng leng a hongta ua, singpi dawn suk malam. Amun ka tun in zan zing a ka tutna mun kiang chin a nungak khat ding ka gal muh pah hi. Puanngou salwar silh ahi a, a dinsan dan in amah hi ngei ngei din ka gingta tin ten hi. Ke'n leng tua nungak omna lam naih hiai hiai in a kiang chi leng kigamla lou deuh in gaal a ni suak diing goldrong ray tua tuipi pang apan hong kikap tou phihphiah en vang vang kawm in tua nungak ka guk et zual le ana hi tak tak! Ki hou zaw saam omlou, kinuihsan tuah kawm in lai ka hon sim pan nawnta uhi. Hi chidan a nili kizom bang kimutuah himah le ung, kammal khat lel le ka kihou kei uh.

Zingsang khat kithalawp lua tua nungak nu muh ding (chih bel exam zou ta ihih chian), beach ka tun in ka lamet louh dan tak in ana om kei mawk! Ka vial zon zon a la ka mu zou mah mah kei. Sehnel tung a ka pai pai na bang ka tawl loh hial. Tua zing ni nou hongsuak bang in tua nungak nu mel etlawm tak muh kinem hi'ng a maw! Amin bek dong kha leng maw! Ka nguai mah mah a lah ka hih theih omlou. Kei bang kimohsa hial gawp, bangziak a ki introduce pih lou ka hia ka muh tuung lai in! Tuni'n mukei mah leng, zingchiang a mu nawn ngei dia ki hanthawn kawm in innlam ka zuan hi. A zingnawn in ka va pha nawn alah ka mu tuan kei. Bang chi a de aw.. aih ka leh exam san lel khawng a de aw khawng chi in ngui tak in tua tuipiau pang a ka tu nilouh kha hi. Zingchiang zingkal chiah ka hoh thak dia, ahun ngei mah, ka tutna mun ngei mah ah ka va veh thak ding chi'n innlam ka zuan nawn hi. Kuan thawn ka kisa simta a, ka lungsim le a nuam pha thei kei suun ni khua in.

Kal khat bang ching ding hita, kei lah muh kinem mah mah lai, lah ni nih bang muhphak a om lou. Khatvei ka kuan him him lai dia, ka muh kei hial le, ma hut sen le paih om tuan lou hiven ka chi a. Tua zingsang Pathianni a hi chih ka thei lai. Tua beach ah mi le ana tam mah mah uhi. Khawlni leh mi awlni leng ahi a volleyball beng, football pek, cricket kimawl leh adang dang ana tam mah mah uh. Ka tutna munsek kiang ah honna ngak diam tua nungak ka haichilh phial in chih kinem kawmtak in ka zuan veng veng mai! Ka kalsuan le kinohsim adiam ah ka hi nok nok. Ni leng a suak ta. Ka lungsim ah bible tang khat hong lut mawk veh! Ka nuih lam lam suak. Sunday skul a senior pawl hih lai, piching a lut ma deuh in naupang pawl vengsung kipolhlimna chidan in awzat'en group tuam tuam in hon khen un chin, kimawlna leh kidemna chi tuam tuam kinei hiveh aw huai te lak a bible tang action kidemna ding ka zillai ua nui zai zai zel. A thu amik amak kithei lou aih chia. Na chi ka tua le enlou a gen thei lai kai tuh. Huai ahih le Solomon laate bung hiveh aw. 'Aw nou...,ka nungak nu na muh uh le.' . Ka tut na munsek ka mitsuan pah a, ka gingta thei kei ka thil muh, ka mit bang ka nuai thak thak zaw zen a, ka gingta thei tuan kei! Na min bek non hilh thei diam chi nuam sim mah leng ahi thei kei. Dong kholh kasa lo mah mah akiang tu pen. Hichi mai ding maw! Nidang a zing ninou suak et lawm kasak sak mai tawh tuzing kibang kei na e! A hon en phei a, hon muh in hong ding tou pah in ka kiang lam hon zuan a, "Na hong ko dawk hak ngei tuzing?" hon chih le, kisuanglah ka diam ah ka gending zok ka thei kei. Exam zohnung ki thoubaih zou lou deuh a ka hiam ka chi num num a. "Hiai ka u ahi, hiai mun a iki muh sek dan khawng ka gen le, hon thei leh hon munuam inchin huaiziak a hon tonpih ka hi" hon chih le hui hah! Ki meltheih tuah le min mah mah in a ka kisam thei khongta uh. A u in, "Hiai mun i nuse phot ding ua, zing ann (breakfast) ine khawm ding". Ken le aw poilou chi kawm in tua mun nusia a ka pai touh lai un ka veilam khut hon len hial hial om hi'n ka thei. Hiai nungaknu'n bang ngaihtuah nei a de aw...