Zingthou phet ha ka nawt hia chih le thei nawn keng, Zogelching lou akuan diam chih va kan pah tiingteng. Leipi lam a kuan di hon chi, Eheu! nuam ei kitonpih teitei di himai (va dawp nasan le ahi bok a). Lou kuan thanop huai tuan sak mahmah hi. Ann nek hun matan va zing heel chih di ahi pah mai. Ann kava ne dia Hanmual ah hong na ngak ngeingei in aw chi tantan kom in ka kikhenta uhi. Zing ann ne zou lawp mahmah, nasep khekor ap phitphet sing khu vitvit. Faifuk hauhau kom a i kisak hanhan leh ka nu’n Hausa te’ inn ah ka ann heeksak va la zual in hon chi, nial di lah utlou kin leh buang in Hakkol toh Hausapa te inn lam ka delhsuk pah hi. Lungsim a Zogelching in Hanmual ah hong na ngak di hia chi komkom in a rangthei ber in ka diang ta hi.

Nak manlou zen in anntang chu ka pawtou a, alen alen thoh lam ka hi. Ka anntang puak ngak le ngahoih manlou in Hanmual lam zuan in ka tai chenchen ta hi. Hong na ngakzoulou hi petmah di, ka hehtha suak lua ka Tempong toh Hansuang ka sat ek dek kha hial hi. A leipi lamka tan bek ton thei di kichi a, delh himhim di chin kaki khoh nawn leh pha dek suaikeng. Kou lou lam ah ka pai suk nalnal a ka taitai na ka gimpi toh ka hehtha a suak velvul hi. Lampi a thoh nilouh di kichi a, vaipai chiah awle kon chang dia pellou in na buukkhu limtak mai diik ding in na nung a ka pai ngeingei- chihmailouh chu bawltheih om tuankei.

Lung si dedu leh naaknoh huhu kom in ka lou uh ka tung suk hi. Ka lou khung ua Tungtun apat ka etsuk leh ka Buuk kiim leh paam ua Buh hing dipdip, Vaimiim kung leh Buh te thumangtak hileh kilawm, huih in a mutna lamlam a awm diamdiam ka muh in ka tawlna teng adam hi. A vatlai, mangtom lai, buhtuh lai a ka gimna tengteng huih zangtak in a hon mut thengsak a bang hial hi. I khutsuak ngekngek haichi nana zaw ki paakta lawtel eive maw! A kuan hon tai di omlou chih mahtak kei kia in ki kou ekek a huai tuh ka kipah eksak na tawp khok ahi mai.

Ka nungak delhna lam a tung baih ka hihman in lou tawlam ah ma kana pan hi. Sawtlou in innkuante hong tung ua, ka ma khakpih ding omta a ma kitelh sot diak hi. Ka nu leh pa ka pian ma tham, amau nungak tangval tuung ua kipat hichia lou na khou di uh hia chih ka ngaihtuah leh ka hehpih tha hong suak hi. Mi’n loukhou lou a neek a muh uleh ken bang dia mutuanlou ding ka hia, chiin ka lunggel masa mahmah hi. A lehlam ah huai Zogelching bang ka kiang a hong pang hileh nupa bang hi le ung ka chi zel a. Huai chia vaipai chia ken singlu khuahkham di singtawm sau hun tawk khat paw hehheh kom a ka zi nung a pai ding chiin duhthu kana sam man zel hi.

Khat veivei lou awlmoh man in khawniim simpi in kikuan khia a leinom neknuk a lounou i giit chiah alei in hon zui in simellou uhi. Nasep khedap muanhuai penpen tuh Tata khedap ahi, ataw a buan asah-asah nemnawm mai. A kek chiah i thuap/belhbelhna toh a khedap mongmong le Ser 3 mahmah pha leh kilawm sa hia, a gik reurou khop mai. Buhte kawt neknuk ahihman in Thousi, Thouvai a buhteh nuai na kibu te'n keih chihtak in hon kei uhi. Nupi Buukteepte bel a buuk’ khu in a thousi thoukang te hawl khe vanglak in thaksa khawllou uhi. A khawphat mellouh ziak le ahi di Vot gialte in zadang khaw hon tawp tonton, na law mahmah lakkhiat theih zoklah hilou, khekol sau kiteng ahih chia. Lakhe goigoi in tu toh lei a itoh suk chia tum suk a kithat thei zoklou zawmah lai.

Vuah hong zu, buuk a va kibu zual kikawt sim, nasep puante bang tuh sawp chih om ngei seselou chih mahtak a puan niin, kherkhor niinte itaksa a tuu in igil leh phei khong en le map kigelh ngitnget hi. Khawul gim toh Zawngkuhpi gimgim hiam kinam chikchek hi in ka thei. Dakkal khat zoh ding khong in vuah hong theu. Khawdam simpi a pan nawn di mahmah ahi a lit huai. A buhte kawt, daituai a dim, vot zawmah lai, pai dia lah baih law lai. Numei ten bel Vuah zukma deuh leh a zung nung Malta nou, Manta nou, Samphok nou, Dum kiak chih nengneng te khen a suan nang in hun lem chang in a zang uhi.

Suun nisat hun gen nawn leuleu le, i kunkunna kawng nat ana mai. Zan kawng va chih kheetkhat di hikeimah leh a thuak nuam liailou hi. I kun chia i puan mailam a tolh nisa in ikawng haai kha a, nat toh sat thuah velvul hi. Buhteh ten i mai giit/het khakha ahih man in, i mai a khawul a pawt chia taak seksuk mai. Khawul namsiat toh Thou leh Khuai in nungzaang a bawm lutlut hi. Lingkhaw in khut hiam, ngawng hiam hon kei tonton zaw mah. Ana! Ana! chih toh mekmaat suk ekmah leh zaw ama san in bawk pah il-el lel hi.

Mangtom lai genkai tou zual le, lei giau ngal belh di Buuk lah kibawl nailou. A nisa a sa lah chu a heekhaat thoh mah abang hial, Aknou kanglum zou leh akilawm hi. Tui-umm singbul a va koih khenkhan, sawlnah bang siah zawzen - ni kihei ziakin nisa in na khohkha chiitchiat, i dawn chia lum pelhpulh zaw mah. Ngoh pai sim vatvat leh singluang a kisui pai, khukngum tatkha - kahnuih phelhpelh. Singtum, Singbong pom tultul pawl toh kaihkhop a haltum toh lounawl a va koihkhait pawltoh phaphetlou hi. Mai vom biibiai Negro nou chu a kisuak peetmah lam ahi. Lawmte nakvang gei vom beibuai nuih san hemham zawzen eile kihuchi vomthou khong. Nap niit le a rong chu adang dai khop mai.

Atuh lai le na duaisan diaklou hi. Lei taak si, alei itoh chia i tuu tuan pheuhpheuh mai. A keen toh i khuk a kinga kom in kipang a i lei tohneen leh khu te i nakvang a lut in a sawt chiah i naak siip chinchen hi. A tuh siamte Ak anntu mah bang zauzauh ua etet theih vang lak. A tuh siamlou ten pham khat khuuk khat suah geihgeih, a hong pou chia bulpha thei lianluan mahmah. Huai pa/nu tuhna ahi tawk di chih phet in om.

Lou khoukhou kimlai mangtom toh buh tuh toh thuah kha dek zawzen hang ei! Awle! Lou a anteh louhing leh haigah te neektheih dia hong piching chiang mahmah uh ahi igen ut pen. Gensiam hi le chiltui kai huphup a gen uthuai mahmah khat hi. Tangmai, Dawnpol, Mazel, Maiteh, Beteh, Tangkha, Begaap, Mehnaal, Mainou, Beguul, Lengmaseel, Samphok leh atuamtuam te lou meh a huan theih dia hong piching chiang un chuchu suun ann nek di ahi aki ngaklah penpen. Vaikuan chia Luita gei a Aithanglou botphei malam. Ahihkei leh lamsak a Patung hiam, Papak hiam na pakpheuphou chihte i gentel dah mai di.

Lou lai or lounawl a gawbul ah hiam ahihkeileh maulak bang lou a i neih kum chiang in, gawtuai/mautuai lianloulou khut zungnih taang di i khohna ma a om na meng tihteuhte, tomtom in meh huan na lak a i khak leh a lim sak deuh kher se hi. Meh theih liai teng kaikhawm in beel lian lawlou, vom bilbel, a beelbil chih di le om manglou khat in lou a meh kimuta phot chu a hen theih teng henlut suk a huan ahi gige deuh mai. Himahleh, ka kham lawta ka duh nawnkei, ka chimtaak chih om ngei seselou in kiduh thei mahmah hi. Lounawl a baibing tamlou na om nahtangteh toh tuun in meh tung a kha hilai, a duhduh in keih zil ngetnget di’n. Baibing duhte a ding in ameh a limsa himahleh a limna a behlap tuantuan lailai hi. Minta maw chih chia Nahtangteh kipharh zihziah tung a suun ann puak kikoih paak phiupheu laizang ah bungbutun khe geihrel!

A lamdang khat leuleu bel a meh tui mahmah le lim kisa thei law mahmah hina pi, beel lianlou chik a kihuan veu. A beel neu man in a tui deih bang tak a hop dupdup di a om zoukei. Gensa bang in a beel lianlou ngal meh lah tam pitak kikha hizel, huai na tak ahi a tui tam pengpung theilou a, a chiikna. Kuaman loumeh beel lianpi a huan keikui chih om ngeilou hi, mak thou chaw?

Loumeh toh suun ann deih tawk a nekhin nasem di ihon kipan non taktak bang chu Sazuktal lamtou tai mah kibang lel eive. Nupi khat bang ngial in tuh a lou meh huan inn a a paw sek achi zezen uhi. Loumeh lim dan akua mapeuh in ngen chiat uhi. Aziak di kana ngaihsun teisek chiang in a ziak hi dia ka up diak li(4) a om hi.

1. Nasep gimna in ann kam lim sak.
2. Chi tuamtuam meh gah leh nah a kihel tam ziak.
3. Mehgah, mehteh te a hinglai(fresh) kilou khe khinphet ahihziak.
4. A mun(place) - lou ah hi seselou kong pua hiam, dawinawl a ann neek lim deuh se abang hi.

Malta meh ding mehthuuk khutpi chiahchiah san chilchel toh malta hing vutphual suk mengmeng, Lengmasel nah hing sitset toh gawlong ah gawi in lum vivit zawzen. A chang in phunlun nah/zung (buuk gei a kituh chi sese di) toh kigawi hi. A malta leh mehthuuk pen vutphual a em ahih man in khat veivei holneng ma om kha thei hi, a hawl haikha lele siatkhait di pammaih sa tuk a lim ahi aw nang lou meh! Vaivom, Mangkang, Mangvom leihoih za palo ZOGAM leitang pan piangkhia mah duh pen, lunggulh pen lai hang ma taw?