Zan khat chim sim zaw ki hi peuhmah di,mi' facebook profiles ka ban et leh mi khat in kimawlna a lunglut a gelhna ah playing marble chih gelh kamuh leh ka nuih za law mahmah ,ka nui konkon nilouh hi..Nidang, sawt nailou a an ngawl ngap zen a i kimawl gige bangziak a tua nuih za phing mawk a dio chih ka ngaihtuah chiah thil kikhek kin kasa mahmah hi..I muh mahmah a kikhek zungzung himawk a!

Khang khat-leh-kim khawng hong kivei a, nidang a khekol le teng mang lou a, khalkal a om kivei teltel zen a saisek khawng ana peksek te'n company hoihtak tak te' bawl huihtuun ki thoh vawk ziahziah ta. Nekzonna a zang bangzah hiam omlai, om beh lai di.Hon gen ciang ua, nidang a sana omlou, kimawl chiang a a hun etna dia khau hiam, banghiam hal uh, huaipen a kimkhat a kaat cia hun kimkhat (half time) bei chih khawng ahi. Ban ah, nidang a nau paw goi goi a skul kai sek te'n tu khang ah kum sawm-le-nga/sawm-le-guk khawg in class x pass ta uh hi. Ka pu in skul akai a kum sawm nih peel ta chi.Ban ah, nidang a skul kai nuam tenten te bang le  lou kuan di phattuamngaihna ziak a kikhou uh,tu leuleu chiang a lah a kai nuam lou, a lunglut lou leh a tempai zou mahmah lou te natan lai zil din iki sawl leuleu zel hi..Hun masa a pat a kikhek nakhat chu hi himhim..

I nu-leh-pa te'n kou hunlai/naupan lai a..... chi a a gensek dan ua enle ta khawng nei le ki gen nawn di bang. Lam tuam tuam a kigang-khekna in kimawl dan leh leh kisuk lim dan le hon sukha hi. Sawt nailou in, kangtalai bawl khong ki ut mah mah, a zawl di khawng a i pa te' sing sum deihlai i na zat khak chu, nuam het kei veh aw..... A sing di ngah panpan, a kilh na di sik kilh hong hi nawn...Dawr ki nei hiven, huai khawng a pham gu zel. A pei dia ka pangkhang ua singbul khat ka etlah vungvung chu buaihuai, phuk leng la hoihlou di ahihchiang a.... Tulai in kangtalai bawl tam lo nawn lou thepthup ka chih leh, zanlam in katheihte naupang kum sawm lak di khat Van a tai ka muh in thil kikhek kin dan ka muh beh hi.Ki bukte, Kidelhte kimawl chihkhawng nuam kisa mahmah..Kidelhte kimawl chiang bang a guulhik khawng bang chil kho ana bawm nuam mahmah..Khei leng la tum deuhdeuh ta zomah lai..khatvei Don Bosco a kai lai a  guulhik khei dia kuan nuam selua zun tha dia class la lai kakinget khiak kathei lai hi..Mi lak kho om chiang a hong thak bang zaw sakhau sawk dan a ki om in  a sung lam a pat a ki sawk suk zel  dan eive.

Vasa bet, thankik bet chihte ki ut mahmah a vahai buan bang, tungtuun bang zong in sailiim ki hual sek. Vasa i bet leh kawlgit, baibek, tawmanai, thuangpakva, aneu-alian chih omlou avek a "no mercy" himai dan ahi...Thankiik ahihleh vok nei ten a deih ua zuaktheih hi. A hun kikhek a vasa teng a ki hawl mang tak ziak ahi hia,ahihkeileh ki pil zaw ta hia,tulai in naupang hon gophel tawi a vasa-thankik beng a vak noinoi muh di vang ta bang hi..Banah, buhpawl buuk bawl,zusa kua toh chihte ki ut ziak khawng in kumtawp exam zoh kal khawng ki ngaklah mahmah hi.Ka manghilh theih het louh, khat vei ka buhpawl tomna uah lou enkaitu meiteipa'n tempawng toh hon delh,kilau lo mahmah, tai na lam a ka horsestar sliper thak langkhat lam taisan kha,in katun ua gen ngamlou,kapa bang in almirah nuai khawng zongzong,kisuanlah huai zozen..Tulai leuleu in lah T.V et,computer games kimawl chihten chiindan lui te dengmit bang phial in a tung a kigente kihah ching lotel nawn lou hi.

Sawt nailou in T.V nei ki tawm mahmah lai a,anei teng inle star t.v ichihte ki join lou..T.V hoih ngellou black and white kanei kha ua, a company  min Binatone hilai zomah, chiang a chiang lou..Star ki join lou ahih chia doordarshan khawng leh adangte a serial suakte khawng kipakta mahmah hi.. Chandrakanta, junoon, Tipu Sultan chihte leh adangdang khawng ki ngaklah thei mahmah.Khat veivei chu antenna in star channels te hon mat hun om thei mawkmawk,huai chiang bang a chu van apat manna hong kia tuk himai!.Star cable join te' TV ki en nuam thei mahmah, hilele mi' in a lut di ki lin mahmah hi. Lut ngam di leh lut ngamlouh di gen mahmah a ka theih ahih leh in neite' sangkil a slipper om zah ahi.Khatvei mi' in khat ah Tarjan film kava en ua,nuam kisa mahmah.Film bei dek kuan,a last fighting i chihte a Tarjan in gamsa te hon samkhawm panpan ki phur petmah,chimul bang thou zozen..Huailaitak a inteknu'n,"Pai phot unla va kisil uo uinou gim na nam uh." chih toh TV off hon thuah bang zaw kah ek dia hoih himai!Huaiban ah antenna zang a programme ki en ahih chiang in,khatveivei star cable a programmete hon mat hun om thei hi..huai chiang in ka  pata un antenna tunna go khuam pei in buai in ki buai thei..A antenna in a ngatna lam hong dik chiang in star programme te hon man a ki phur thei mahmah hi. Tu leuleu in chu in chih in T.V ki nei vek phial ta hi. Hiaite lou, chiangkhe bawl, hawttai bawl, aipithau bawl chihkhawng ki phur thei mahmah a, aipithau kikaptuah chiang bang a a tang dia paper muam kawt khawng kizang ahih chiang a maitang bang hon khakleh kibelh dok,kawt nehnuh zozen chihkhawng ahi. Cycle pei hiam, ahihkeileh pipe lawng a kual a zial  khawng  lampi dung khawng ah ki hawl,a nung ah en ki delh chenchen,nuam kisa mahmah lai, ei a tung a tuang bek kihi leh thutuam..

Hiai a tung a te ban ah suihte, suangthai leh adangdang tampi omlai..Kimawlna khenkhat ki taisan, khenkhat ki ching  toutou lai a,huai kal ah kepbit taak taktak i tualsuak kimawlna piching theih om manglou bang hi. Huai ka ngaihtuah khak leh nuihzat huai mahmah khat kava ngaihtuah kha hi. Huai chu peeklumte(marble) kimawl i taisan sim uh a bang a, khatvei tei hong thangkhe nawn di chu himaithei. Mi'n international level ale tournament khawng ana sai zel ua lohching mahmah hi.. Hilele kimawldan leh rules khawng chu kibang hetlou..Walter Camp in Rugby a pat a American football ana phuhkhiak dan a enle KUTISte  a i tualsuak rules tampi omsa te puahkip thak di, a game localised di.Huaikha politics a tunung a zalenna i muh chiang a mi'n, "Na  national game uh bang ?" chi a hon dot ualeh, " Our national game is KUTISte/PEEKLUMte", chi a dawng geih lel di chih kava ngaihtuah khakleh  FB a pa' profile kamuh a ka nuihzat zah in kanuih hong za nawn leuleu zel hi.. Our national game is KUTISte chih mawngmawng!!!!..