Ki tangval sak tuung vela Singtang khua a, kumlui leh kumthak kikhen nizan (thirty first) a ihmut suakpipi ki suhalh teitei chihdan deuh in, Mid-night Service a telsawm hileng kilawm awmtakin ihmu manlou phial in ani’ nawn, December ni 30, 2011 zingkal baihtaka IGI Airport kadelh angaih ziakin zankhua’n vante sa-in kapum buai hi. Ihmu leng lah kinang lel ding chi’n tomchik ka mitsi zual hi. Ka mobile ah tractor (alarm-tone) hong kihing do-dolh a, huchi’n Indigo Flight, 6E-127 delh di’n mi tampite’ lupna tungah phalbi khovot apan ki self-defence a, blanket kawma anak puak darhdarrh lai un, keibel tutna tan khaklouh ding lau hileng kilawm awmtakin zinglam dak 3 lakvel in “Hallo Taxi, sare teen bajetak a sakte hai” ka chita hi. . Hichi banga ki singtang’ teisaka thoubaih leklak ngeilou ka hihmanin Mary Magdalini leh Mary dang Jesu’ haan vehdia kuante bang hon phawk khesak a, lehlam lah guta’ guukdi zonga thoubaih a vial vakvakte bang aki piakzohna uh phattham bang sa utphial ingh.Inn apat kaki patkhiakma in ka flight Dakkal 1 in delay mah leh hun paisa a flight ana laplou kha ngeita ka hihman in Economy class, non-refundable ticket (huaile aman tawm hun penpen ni adia la) tawite akihih ziakin laplouh khakpen manna lianpi ahi chih ka experience ziakin abaihlam mah teel zawta in, ka schedule plan-A mah zui in dak 3:30 vel in inn ka pawtsanta hi.

Konglam meipi (fog) ana ziin nasat mahmah ziakin ka taxi tuanna awlawl in akikhin niitniit lel hi. Tuanman piakbeh a, hat zawdeuh theiding bang hileh kipe utlua hi’n mawoo.  Kangaih tuahna ah “Hiai mei’ ziingte suahdul leh tupi khawng zanga thaipan zek theihdan omtheilou ding hiam” chih khawng ngaihtuah kha thethup ingh. Hunkhat houh kinsim ka hi diam ah, ka taxi’ pupa kiangah “Bhaisap, katung baih ut a khe-in konna paisan maiding awo” ka chih dek leh kama uah meivak phiphelh nih kamu guiha, katheih thakleh kama ua gari taite’n meipi sahtakmai ahon phutpan zekte uh pang bel a ana kitolh zeldan  ka hi uhi. Radio Mirchi 98.3 FM tenle hon awlmoh nasa mahmah mai ua, ka chim louh na’ng in ka Taxi’ sung ngei uah latual leeng bangzah hiam toh chim law manlou a hon koih ziakun amau tung ah leng hiai tungtawn in kipahthu ka gen hi.

Meipi sahtakmai khuattheih khuatmoh a kikhuat vangzou, Airport i tun leh karee! Flight teng ana ki cancelled ziahziah mawkdan e! Indigo Counter a nungak khat kiangah “Min Khumna - Khawlkhuaknei” ah kamin kava khum zoh in Extreme Weather Condition a flight tuang dia fit taktakna ka hi chih chetna di’n apam ah CISF ten Stethoscope lian deuh mai in hon dap ua, ka cabin luggage ding ka chih leng X-ray in hoih deuh mai in Bird Flu leng om ngamna hilou ding khopin hon khiitsiang zoh un ISO Standard hina chihdan deuh adiam ah, stamp in ka ticket hon tahsak met uhi. Huchi’n waiting hall ah mipi tampi petmah, kei honna ngak hi awmtakte omna kalut teita a, ka tawbou nem-leh-nip thrihthriah ngak theihnang omkhak leh chia tutna’ awng kazon bawlbawl hangin ka muzou mahmah kei hi. Flight lah alengkhia om himhim lou, mi lah hong lut behbeh zomah lai ai’hchia, atawpin neulai a laa ka saksek “chimluat manin ka innsakpa siktul in kamok dawtdawt” chih dandeuh in ning kitel man in mobile screen zangin sms tungtawn in lawmte kawksuk zazat mai hilou in brass suk ziahziah lel ingh. Meilah theng ngei mahmah lou, mi khenkhat te gensek “flight delay/cancelled hiam a aom leh nekdi leh giahna ding hotel khawng hon ngaihtuah sak uh” achihte khawng uh muhphak ding hi vetlou ai’h chia, mipite lak ah Jona banga “Tarsis” lamzuan dia hong kisa om nahi uhia chia muanmoh dot di bang zon bawl simsim ingh.

Waiting hall leh basement a mipite District piching ngen thei hial ding khop a ahong tamtakin kalung ahimoh simta, kadak lalap leh mipi kawm ah eilam MP khat ka galmuh a, banghiam bek hon saikhe thei na lou di hia, chih kinepna kanei sim, alah, langkhat ah asam kang (white) ka galmuh leh mei (fog) sah kia hilou in, vukleng kia hidia gingta in “maizen dak kal 6 ginom taka delay ta hanga bangzah hun manpha piakbeh ngailai ding a diam mawooo? chi’n ka kinepna aliahmang zel hi. Gilkial ahih man in 1st floor a Coffee shop apat Coffee dawn kawma mipite kon etsuk leh maizen… mipi hiaizahte akhalam kia uh hiloua, asalam uh leng gilkial takte’n, kei hon poimoh laitak ua, ka panpih zohlouh poi kasak petmah kia hilou in, ki suanlahna lianpi toh ka Coffee abei matan dawnzel mai ingh. Mihingte’n “Bad Weather” tungah thuneihna kinei zoulou mah hi’n teh zing dak 7:45 a.m. a leengkhe ding lai 2:00 p.m. in ahau leh azawng, milian leh mineute Flight 6E-127 ah IMF zuan di’n leenna sung lutkhawmta ungh.

Ki zekai gawpta ahihman in leenna leng a leen manlouh khak di lau mah bangin, a kong hong kikhak pah in, Air-hostess te’n hiai ni adia a choreography zil uh asiam theihtawp un, ui-tawm lengdek mah bangzen in, hon hih ziahziah ngal uhi. Eilamte hih ngeina banglou deuh in Flight captain-te a cabin kawm ua pat in, mipi ma ah hong ki-show sese tuanlou in hong ki introduce kaukau ngal ua, huchi’n passenger taisan khak om hiam chihte ngai sa nawn tuanlou a’i duam ah, a horn mek ging sese tuanlou in hon taipih fefu in huchi’n huihkhua apat hiai leitung hon etsuk pihta hi. Laphuak khenkhat te’n “muvanlai khong  angaih zawngte kianga valeng a, itna simthu leel di khonga a sawl uh” ka phawkkhia a, ka lungsim ah “Kare! hiai task zaw haksa deuhlou ding hia…..” ka chisim hi. Aziak ahihleh tunglam apat i hon etsuk leh huuiiiii… a pen mihing hiding chih gen taklouh huai minu/mipa ahi chih theihtup ding haksa peuhmah lel in chia; lampi, mual leh tui luang lian deuhte zaw “ginna thuchiam” dandeuh in muhtheih na chiang om sam mah e! Tohlet ah ngawngtan dawk di’n dakkhe theikei mah leng, Himalaya tangdung vukin siitnei hetlou a hawmthoh takmai a vukkhal toh atuamngou phengphangte meikawm ah mupha thouthou ingh. Unau Gangte te’n meipi analeuh chih proverb a ina zakzak sekhouh lamdang sakei phial ingh, keileng huai hunlai a omkha hileng ana telkha phialdi’n ka ki gingta, aziak ahih leh “leuhtheih dia awm lawtel, abawngbawng a om rhihrhiah zomah lai a’ih chia!”

Lawm leh theih khak ngei bangzah hiamte’n honna mualliam santa uh ahih manin, amaute atunna ding uh theichiang kimchiahlou ka hihman in, huihkhua khawng ah ana vakthap lai mai khawng ana omkhak ualeh, kuakua ka mukha de awooo…! chi’n amaute “bye bye” bek khak ut-in dak nilouh mahleng kumthak programme adia buai uh ahi duam ah kuamah mukha keng. Eilam kia lampi sia isak leh tunglam ah leng lampi ana hoihzou chiahlou ahingei dia, leivui sahkei mahleh meipi sahtak ana om veve a, hon phutpih chiangin; singtang nupi’n ann, lohpi a ahawi mah bangsim in hon seep dedelh thei zel hi. Ka Driver-pa un abul apat aside-mirror leng om sese lou a hon leenpih den nilouh ahihman in siam huntawk mah hi’n teh chi’n kamuang thou hi. Guwahati khopi tung lakvel a kongleeng takun, huaimun a om theihkhak ngei om hive’n “inn-kong khongah nisalum awi khawnga ana kiphou khiatkhak ualeh” chi’n ka zon bawlbawl hangin “bird’s eye-view” zaw mihing adi’n buaihuai deuh hiau lel e,! Neil Amstrong-te lawmta’n tunglam apat leitung-lim honlak lai ua mihing hichituk a tam nazenpi, adawk tellouh lamdang sanawn keng e! Huchi’n ka adventure Intermission nang in “Lokpriya Gopinath Bordoloi International Airport” katung khongta, hiai apat khua amial neknuk ziakin Night-Vision khelh zokding ka muhlouh man in lungtun huai chiahlou in dakkal 4 velphial huihkhua a ka khualzinna zohna dingin Tulihal Airport  ka mial tun bibekta hi.

Nitak dak 6:30 bang ging hial ta ahihman in, khuabang ana mialta mahmah kia genlouh 60km lam pai nang kineilai ahihman in, kinsim mahleng ka van 10kg val excess hiala kapuakte hong kilang pahlou, ngak nilouh chihleh bangtan hiam nunga “Musical Chair” kimawl mah bangin akual ah hong omkha teita, ka kiang hong tuntakin manpah in pawtkhiat pih laanlaan in, huchi’n lampi phok takmai leh leivui khu nakvang lawngnihte dimzen a diiklut tou kiaikiai di’n ka ki aai-kaw han saktheihna mun omsun Zogam zuanta ingh…