Kitenna tuh mihingte a ding a damsung a hun thupipen leh poimohpente lak a khat hi dan a i ngaih uh ahi. Abikin, ei Kristiante bang ngial in tuh Pathian thupiak bang khop a ngai in i poimoh ngaih mahmah uhi. Hindute bang in houh kitenna tuh mi khat damsung a hun nuampen (most heavenly occasion) leh hinkhua thak kipatna in ngai ua, a thupi theitawp in lawm uhi. Mihausa hi khollou, middle class te bang in leng a tanu uh hiam, a tapa uh hiam kitenna a zat ding in kum tampi sum loh in khol uhi. Mi hausate’n lah a dinmun uh leh a minthanna uh toh kituak in thupitak in lawm uhi. Inkuan chih a ding in kitenna tuh status mark hi mai hi. Tate’ kitenna lop zohlouh ding chih tuh thil zumhuaitawp a a ngaih uh ahi. 2011sung a Indiate’ kitenna mantampente hiaite ahi:

Congress MP leh businessman Kanwar Singh Tanwar’ tapa Lalit leh Yogita Jaunapuria kitenna a sum sen uh   250 crore (2500000000) a hisap ahi. Mi 15,000 chial ua, huaite nek ding, dawn ding sai ding in mi 1000 guai ua, an limchi taktak chi 100 bawl ua, annek zoh a nek ding (desserts) limchi taktak chi 30 bawl uhi. Huai a va telte dial (shawl) leh safari suit mantampi, leh a sumtang   2,100 leh dangkasik sumtang khat chiat pia uhi. Mouneipa tuh   29 Crore (290000000) man Bell 429 helicopter leh private jet lim dangkasiktak a bawl pia uhi. Bollywood star Neha Dhupia in performance nei hi.

Socialite Kajal Fabiani leh Marigold Group te CEO Gaurav Assomull in Monaco a Monte Carlo lounge bar ah kitenna party nei ua; Monaco a hotel mantampente lak a khat ah Mehendi ceremony nei ua, Hotel de Paris ah Sangeet nei ua, Salle Garnier ah kitenna nei ua, mi 600 chial in cocktail party Casino Atrium ah nei uhi. Kitenna a hun thupi pen tuh hip hop star Akon finale concert ahi. Kitenna ah   44 crore (440000000) seng uhi.

U.K a India mi billionaire Pramod Agarwal in a tanu Vineeta leh Muqit Teja kitenna Italy a Venice khopi ah thupitak in lawm hi. Mi chial 800 te tuh hotel mantam mahmah San Clemente Palace leh 17-acre San Clemente Island a resort ah khai (entertain) in om ua; Italy' celebrity Michelin star chef, Federico Salza in Italian an chi tuamtuam bawl a; Indian decor king Sumant Jayakrishnan in India an chi tuamtuam bawl hi. Kitenna tuh 16th century Scuola Grande Della Misericordia a party thupitak toh kipan a. Ni nihna ah Colombian Pop star Shakira in performance nei a, Italian theatre director Franco Dragone in leng show nei hi. Kitenna ah  130 crore (1300000000) vel seng uhi.

GVK Group neitu GV Krishna Reddy' tunu (granddaughter) Mallika leh Indu Group neitu Indukuri Syam Prasad Reddy’ tapa Siddharth kitenna ah Bollywood mi minthang tampi, Sharuhk Khan, Pooja Bedi, Priyanka Chopra leh Amitabh leh a sungte uh tel uhi. Kitenna ah  1000 crore (1000000000) seng uhi.

Indian businessman real estate developer Basant Bansal in a tanu Payal Bansal leh Deepak Kanodia kitenna  Turkey khopi Istanbul ah lopsak a; special flight in mi 1000 Turkey ah lenpih hi. Bansal inkuan in dowry  dan in Kanodia te inkuan Euros 15 million pia uhi. Kitenna ah 2 million Euros ( 100 crore) seng hi.

India kitenna minthang mahmah dangte a nuai a tea hi:
Subroto Roy, Sahara group chief in Lucknow a tapate Sushanto leh Seemanto zi neihna ah mi lian tampi tel in mi 11000 sang a tamzaw chial a, khovel a an chi tuamtuam 110 in vak hi. Moulopna in kitenni in in neilou mi 100,000 nitak an limtak in vak hi. Kitenna ah   552 crore vel seng hi.

Tamil Nadu Chief Minister Jayalalitha' foster son, V.N. Sudhakaran in  Septenber 7, 1995 a a zineihna ah mi 300000 chial a; vegetarian an kia serve ding chih ahi.  Himahleh week end in reception dang khat ah mi 150000 khawng chial a; huaite kelsa leh aksa in vak/khai ding uhi.  Huai ding in veterinary doctorte etkol ngen ak 25,000 leh kel 2,500 kigou ding. Hiai ankuangluina a sumsen ding  15000000 hi dia gintak ahi. A kitenna ding mun (pandal) zepna/cheina a sumsen  30000000. Tua kitenna ah pak (flowers) truck 200 puak khop ki zang ding.  Hiai kiten hun a zat ding halpuak (crackers) Sivakasi fireworks factory  bawl ding in bonded children labourerte  ni khat a dakkal 18 sem nitha a  5 kia loh in guaih in om uhi. Hiai halpuak bawlna a sumsen  10000000 ding a hisap ahi. Hiai kitenna toh kisai a sumsen  1000000000 hi ding a hisap a hi. (TOI:7.9.1995 – a nung thu theilou)

2005 a London-born i-banker, Swordfish Investments neitu Amit Bhatia leh billionaire steel-magnate Lakshmi Mittal’ tanu  Vanisha Mittal kitenna a telna ding a chialna tuh dangkasik a bawl bawm (silver box) in khak ua, lenna ticket leh five-star Paris hotel a tun man ding toh khak uhi. Kitenna tuh France a Vaux-le-Vicomte leh Palace of Versailles ah ni 5 sung lawm ua, Kylie Minogue leh Mouton Rothschild in performance bawl ua, Eiffel Tower ah fireworks thupitak nei uhi. Kitenna a a sum sen uh $60 million hi a, tulai value a hisap in $66000000 (  2310000000) vel hi ding hi.

History a kitenna man tampen a kigen tuh 1981 a Prince Charles leh Lady Diana kitenna ahi a, Marriage of the Century kichi hial hi. Kitenna a a sum sen uh $48000000 hi a, tuni value a hisap in $110000000 ( 3850000000) vel hi ding hi. Kitenna mantam dangte bel Prince Charles’ tapa upapen Prince William leh commoner Kate Middleton kitenna ($34 million/ 1190000000); 2008a English football pek siam Wayne Rooney leh Coleen McLoughlin kitenna ($8000000/ 280000000); 2010 a President Bill Clinton’ tanu Chelsea Clinton leh investment banker (Goldman Sachs and then G3) Marc Mezvinsky kitenna ($5000000/ 175000000); 2002 a Broadway star, lasak siam  Judy Garland’ tanu Liza Minnelli leh music producer David Gest kitenna ($3500000/, tuni a sum value a hisap in $4200000/ 147000000); 1991 a movie star Elizabeth Taylor leh mistri (construction worker) Larry Fortensky kitenna ($2500000 tulai sum value a hisap in $4000000/ 140000000; 2002 in, laphuah siampen a kigen, Beatle te lasak siam Paul McCartney leh PETA activist leh model lui Heather Mills kitenna $3000000 ( 105000000); 2007 a Supermodel leh movie star Elizabeth Hurley leh Senior VP of Tyco Arun Nayar kitenna Gloucestershire a Suderly Castle lopna, huaizoh a Jodhpur a Umaid Bhawan Palace a lopna ($2.5 million tuni sumvalue a hisap in  $2600000/ 87500000); 2005 a lasak siam Christina Aguilera leh a pasal music producer Jordan Bratman kitenna ( $2 million, tulai sumvalue a hisap a $2.2 million/ 70000000?); 2006 a Movie star Tom Cruise leh movie star Katie Holmes kitenna ($2 million, tulai sum value a hisap a $2.2 million/ 70000000?); 2005 kum a movie star Catherine Zeta-Jones leh movie star Michael Douglas kitenna $1,500,000, tulai a sum value a hisap a ($1.6 million/ 52500000?).

Kum 10 vel paita in huchibang kitenna mantam leh thupi genna ding in thumal thak “bridezilla” bang phuak khe hial uhi. Kim Kardashian leh Kris Humphries dollar maktaduai 10 mahmah seng in kiteng ua, a kitenna u’n kha 10 kia daih hi. A ma lam a restaurant neitu, “Ruby’s Juke  Joint Americana Cookbook” gelhtu leh Ruby Dee and the Snakehandlers kichi rockabilly band a a lasatu Ruby Dee Phillippa in 2000 a pasal a neih masak in sum tampi seng in thupitak in lawm ua, himahleh a kitenna u’n kum khat leng daihlou hi. Himahleh, kum 47 upa, Ruby Dee Phillippa leh Jorge Harada, kum 43 a upa, librarian leh Ruby Dee and the Snakehandlers band a guitar tumtu toh April 2011 a amii ten u’n, Sintawpni khat Justice khat kiang a va hoh in va kiteng daih ua, a zingchiang in Texas a Austin a a’ in nunglam uah barbecue bawl in lawm ua, chial a omte’n nek ding leh dawn ding khawng, kuang khawng, sa emna ding thuk khawng, lukham leh tutna khawng natan kiken uhi. A va telte kichei leng ngailou a, a utte khekoltom toh hoh ua, a kichei nuamte lah puan hoihtak silh in hoh uhi. Huai nung kum 1 lel in kiteng te’n kitendan kheng ua, sen-leh-pan naktak in hih niam uhi.

Singer Britney Spears leh a former agent Jason Trawick in December 2012 in kiteng pah ding chih puang ua, a ma a pasal na nei ngei himahleh, a pasal neih masakna bang a ngai in poimohngaih mahmah a, wedding ceremony a”private” theitawp a hih a ut a, lianlou chik, a sungte uh leh a lawmte uh kia toh lawm ding hi (Delhi Times August 25, 2012). Hileleng tunitan in a ni ding gen theilou ua, kiteng lou ding chih tabloid khawngte’n puang khin uhi. Hiai bel a pasal neih thum veina ding hi hi. A ma in Jason Alexander toh dakkal 55 kiteng ua; huai nung a Kevin Federline toh a kitenna u’n kum 2 leng daih zoulou hi.

Facebook mukhepa Mark Zuckerberg leh Priscilla Chan May bang in  backyard wedding nei ua, mi 100 leng phalou chial ua, an bang 5-star, 7-star hotel khawng a la selou in amau veng California a Palo Alto a restaurant 2 a kipan sam mai uhi. Offbeatbride.com suahtu Ariel M. Stallings bang in Zuckerberg-Chan kiten nung a Simple Wedding archive ua visitor nipi kal khat in 275 a kipan 600 val in pung zou chi hi. Kitendan market research bawltu The Wedding Report bang in mi tampite’n “fun, romantic, simple, casual and unique weddings” tel zaw uhi chi hi. California a events planner Amy Kaneko bang in “The backyard is the new ballroom” chi hi. California a Marin County a caterer Stacy Scoot in “Marriage market haihuai dan mi’n theita hi” chi hi.

Congress President Sonia Gandhi in leng hiai thu poimoh ngaih mahmah hileh kilawm. Kum 1 vel paita in sum tampipi seng a kitenna lop hoih a saklouh dan gen a. January 18 Jaipur a Congress Party Chintan Shivir (Brainstorming Session/Strategy Meet a a inaugural speech ah, “Celebrating weddings, festivals and happy events is one thing, what of lavish and ostentatious displays of wealth, pomp and status? Does this not beg the question, where is this wealth coming from?” chi hi.

A tung a i gente sum tampipi seng a kitenna neite bang in inkal kitawi zen a a neih teng uh seng a hih ahi kei uhi. Mawlchik a kiteng i gente bang leng a sen zohlouh ziak uh ahi kei hi. Eilam ah bel neih-leh-neihlouh thu hilou in, mi hih bang hihlouh utlouh ziak a neihsa om kei mahleh ba zen a thupi theitawp a mou lawm, mou kha bang mi tampi leng om ding in ka gingta hi. Ei lak ah bel i Saptuam leh i pawlpi leh mimal a hoih a, mou lawm leh mou kha a kuamah khut vuak a tellou ahihna ah sen-leh-pan thu ah bel intekte mohpuakna huchi gikpi lou leng ahi thei hi. Himahleh a mun luat chiang in a va simte a ding in chial a om a va tellouh lah nuamlou, va tel ding a lah tawi ding neilou chih om thei hi.  

Hiaite a kipan eilam a kitenna i saidan, mou i lop dan, mou i khak dan khawng et thak tuak tampi om ding in ka ngaihtuah hi. Kitenna bang lah mouneipa bang tuh suit silh teitei ngai, mou in lah kitenna puan silh teitei ngai dan a kingai, mou neite’n lah neilou sasa a leng lop louh theihlouh a ngai, mou kha ding te’n lah thupitak a kha a, van bang neilou sasa a, haksa sapipi a tampi kensak teitei sawm tampi om leh kilawm kasa hi. I paulam thupipen bel indongtate zahtakhuai, biakin lamte zahtakhuai, khosung mi zahtakhuai chih khawng ahi deuh maithei. Himahleh, hichibang mimal thil liauliau kitenna bang ah tuh solkal leh i pawlpite’n bangmah dan hon bawl khum mawkmawklou ding hi. Solkal bang in tuh kitenna tuh ‘purely personal matter’ a a ngaih a hi.

Khattei in mawlchik in mou hon lawm hiam, mou hon kha le uh a zui nuam tampi om mai ding in ka gingta hi. Eilak ah bel mawlchik chilehang leng Kristian ngen ihih dungzui in thil khempeuh, kitenna, moulopna, moukhakna, sivuina natan Saptuam vai in pai a; biakin dim in ki uap a, thupitak suak veve hi.