Koi a pan a,koi a zoh ding, chih zong theih hak zozen ee! Bangteng hileh lungsim a hongsuak bangbang gelh suk zialzial di himai.

Amasapen in kumthak, hunthak a honpi kai i biak Pathian’ min phat in kipahthu i gen hi. Mihingte’n i ngaihtuahna ah hun leh nite hong pailiam zel in kum hong bei in kum thak leh hun thak ah i lut zelzel ding chih ahidisa  mawng in ki koih hi (taken for granted). Himahleh, tuhun ( now) leh denzek seken/ minit/ dakkal khat a i hinna a bang hongtung ding ahia chih a genthei kuamah i om kei hi.Tua ahihman in kum thak, hun thak i muh khong manpha leh kipahhuai lua a, amanphatdan thei kawm a zat ding ahi. Ngaihdan taangpi Dec 31 zaan dak 12 abei toh kiton a kum thak/hun thak a lut chih ahi, (dikmah), himahleh tuni apan etdan dang khat in en le’ng i chi hi. Huai tuh: minit, dakkal, nikhat na zatzoh teng a nang adia athak, hunthak muhsak leh piak a om,na hinna hihsausak a om hi gige ahi. Hiai dan a i lak theih in tuh hunthak, ni thak zang kihi gige dia aphatuam theipen di’n kizang ut gige ding hi.  

Kumlui 2012 Khristmas leh Kumthak 2013 apan ka lungsim a hong lian mahmah, ‘ka theme’, chih zozen di hia, “Mahni ki en” (Look within) chih ahi. I theih chiat uh bang in tulai khovel segawp in mihingte’ siatna leh khelhna anasa mahmah hi. Hibang  khovel a i om lai in mi tampite’n muanna, bitna, zalenna leh khantouhna deih leh lunggulh in i nei hi. Himahleh,tuabang hinkhua neih theih nang in kikhekna (change) poimoh masa hi. Kikhekna kichi khotaang leh gamsung ah nikhat thu/ zankhat thu a om guih thei ahi kei. Michih in khotaang leh gamsung nuamzaw i deih leh kuapeuh kikhek angai hi. Sappau vakawm pak le’ng; “Everybody want to change the world, but not self”. “Be the change you want to see”.Kikhekna mahni mimal ah hong kipat masak ding ahi.Ei kikhek loupi a midangte hong kikhek masa dia,i gam hong nuam dia i ngaihtuah leh diklou hial ding hi. Huaiziak a mahni ki enchian a kikhek/ kibawlhoih masak ding ahi. Tua hileh i khotaang, i gamsung hong nuam thei pan ding hi. “Mi’ khut a guul matsawm”, chih paunak peen paikhia in mahni khut mahmah in man leng deih huai hi. 

Mahni ki etchet toh kisai a i deihpen ahihleh mahni hihna, omna,sepna leh mohpuakna tek ah i hihdi omsa,ahidisa, apeelmoh om hiven tuate i thei hiam, i ngaihsak hiam, i hih hiam chih eimah kidot ding ahi. Etsakna: Skul naupang in ahih dia omsa apeelmoh laisim ding, nu-le-pa thuman, heutute thuman, omdan hoih leh thuman ding chih ahi. Tuabang in innsung a nu-le-pate, govt nasemte, NGO a semte, namvai saite, saptuam a semte, politician adg adg te’n i sepding, bawl ding a omsa, apeelmoh omte i thei hiam, thei napi a kilepkhiaksansan, thei mahmah ahihziak a sem nuam lou, chihbang in i om kha hiam,kuapeuh kivelthak tek ni. Midangte hihding thei zauzau a mahni sep ding theilou/ awlmoh lou, semnuam lou a i om leh dik-hetlou ding hi. Tuabang nuntakna toh bangmah tan kitung lou ding hi. “Midangte na khuttal khat a na kok leh nangmah na khuttal thum in ong kok hi”, chih zong om hi. “Nangmah mit a singtum lakhe masa lechin na unau’ mit a ninneng neuchik tuh baihlamtak in na lakhe thei ding hi”. Bible.

I gam sung a politics kisaidan, govt dept tuamtuamte nasepdan, govt apan devp scheme tuamtuamte kisepsuahdan, NGO te nasepdan, Social orgn tuamtuamte nasepdan, i khotaang hoihdan leh adg adg et in lungtunhuai leh kipahhuai lua; itu- ita, khangthakte kiang a hilhsawn  leh piaksawn ding in asit-huai kei, chingam i om hia? Kisem hoihlou hita zenzen leh, kuamohna ahi di? Kol leh vaite, talpakte mohna ahi diam?  Eimite’ mohpuakna omlou, i chi thei diam? Adawnnate ii (NO) ahih intuh mahni ki etchet kuul ahi maive! Kuapeuh, aneu - alian, atek - akhang, anu - apa, avom - angou, atom - asang, agong - athau, apil - asiam kisiit omlou in i gam bawlhoih nang ahihnakleh mahni ki enchian ni, kikhek/ kibawlhoih ngai omte hihni akikheel ma in. Tuabang ahihkei a tua i paidan, i gam om dan khangthakte piaksawn ding in sit-huai mahmah kha ding hi. Khangthakte piaksawn ding gentaklouh tuhun in zong nuam hetlou leh lungkham-huai hithei (hikhinta?) hi. Akikhek masa ding nang tektek (hiai agelhtu tel in)/eimah chiat i hi, huchi hileh abaan hong dikthei pan ding hi.

Kikhekna a omna dia i thil etdan/lakdan (perception) khek ngai ahi, huai pen thubaih liai hilou hi. Aziak, i value system a kinga sawn,i value system leng i society, culture, education, observation,media, religion, history, literature chihte ah kinga leuleu hi. Hiai i value system-te zankhat/nikhat a hong om guih ahihlouh bang in kikhek guih thei mok lou hi. Kikhekna in hunla mahmah ahi hi. Himahleh, kikhekna om thei veve hi. Tulai in i society ah sum thupingaihna lian mahmah, mi kuahiam in sum ahauhnak leh (muhna en lou in) pawlpi tuamtuam ah  (saptuam tel in) tuitum in mite zahtak leh mai-et in om hi. Hiai in i khotaang ah, adik/diklou chih omlou in hauhsak utna/sum deihna, thuneih utna leh thupi utna mite lungsim ah piangsak in mite ngaihtuahna siangthou hihsia dimdem hi. (Prove me wrong, I will be the happiest person).

Sepna a heutute deihsakna ziak in Pune leh Delhi ah course saulou ka hihkha a tuate kei mimal in ka phattuampih a, simtute kuahiam in neuchik beek aphattuampih khak leh chi’n tamlou kon taklang nuam hi. Pune ah “Behaviour and Social Science  Course”,  06-18 Feb 2012 sung kava tel hi. Topic poimoh taktak ka zil kha uhi. 

Delhi ah, “Psychological Counseling Course”, 19 Nov 2012 to 07 Dec 2012 sung ka telkha nawn hi. Abik in kou sepna a jawante lak a suicide/fratricide case om zeuhzeuhte focus deuh dia course syllabus kibawl himahleh civil life adia le relevant mahmah hi’n ka thei hi. Tulai khangthakte lak leh sepna tuamtuam a stress/depression/frustration omte bang ziak hiam chih leh amaute bang chi theih khiak a, bangchi bang treatment or counseling piak ding hiam, chihte ka zilkha ua lunglut-huai leh manpha mahmah hi. Theih dia hoih khat ahihleh, sepna/nekzonna khat peuh ah or mikhat hinkhua ah 100% stress free kichi om ngeingei lou ding hi. I cope up theihtan stress pen hoih in productive zawmah hi. I cope up zoh khengval ahihchiang in buaina leh haksatna hontun hizaw hi. I hinkhua foundation kiptak ( Khrist Suangpi kip) tung a kilam ahihkeh, hinkhua hong hihse thei (mit utna,sa utna,sum deihna,damsung thupina liim) tampetmah hi. I value system, mahmah adik masak poimoh ding hi. Hinkhua a i ngaih thupipen, deih leh delh peen a i neihte bang hi hiam,tua dungzui in hinkhua stressful or less stress thei hi. Nang mah ki en chian in.

Hiai course-te hih a ka zinna  Pune ah, eimite biak khawmna ZCF ah kava kikhawm kha a nuam leh manpha kasa hi. Tua kia hilou in sharing bang kava neikha zomah lai a hamphat-huai sawnsawn hi. Sharing na a ka gen khat ahihleh, “Khopi khawng ah eilamte hihna taklang tu i hi ua, a hoih thei pen a om ding ahi. Banah,khopi a omte i hoih leh eilamte mi hoih dia hon koih vek dua,i siat leh eilamte misia vek dan a hong koih zeel ding uh ahi. Ka sepna ah  zu dawnlou kahi ka chih chiang in lamdang sa ua gintak haksa sa uhi. Ken bel mimal ah kinga hi, ka chi zel hi”. 

Delhi ah zong EBCC Nasirpur /Dwarka leh Central delhi ah ka kikhawm kha tuak a manpha kasa hi. EBCC Dwarka a ka kikhopna a thugen manpha ka sak mahmah khat ahihleh; “ I gam ah Pathian thu diktak leh hangsan tak a gen ngam kisam, saptuam a Pastorte bang mihausa kua hiam in birthday present a coat suite khat apiak chiang a thudik thutak gen ngam nonlou”, Rev Dr Kh Khaizakham. Thu dik thu tak, i hinpih leh gen ngam chiang in i khotaang, i gam hong nuam pan ding ahi hi. Huai ahih theihna dia kikhekna ahi i gengen. Midangte genlouh, na tate etton tak hi’n na kithei hia?

Thukhitna: I hihna bangbang toh i mohpuakna, i sepdi omsa, apeelmoh i thei in i semkha hiam chih eimah chiat ki dong ni. Hun paisa a i hihkhak kei tak leh leng tuhun apan in panthak ni. Huai ding a Pathian in kum thak, hun thak, kipat thakna dia i hinna hon behlapsak lai ahi chih thei ni. Nang mah mimal ading, na inkuan ading, na khotaang ading, na nam leh gamsung ading na mohpuakna na septheih lai   in sem in. Vasam gamteng pawng awlmoh lou in i hihna leh mohpuak chiat uh theichian in semsuah chiat hile’ng bangzahta in a nuam in i khangtou dua aw, nak nop na’n chia maw. Huai ding in mahni kivel thak in kitheisuah taktak chiat ni, sem taktak chiat ni, tua hileh nang leh ke’n apaal ningzu bang zoukhawm ding hihang.