Rev. Dr. Pum Za Thang Tombing

President, GETS, Bangalore, INDIA

Pianna(Background):

Nu Chingmang Kaihlam ah November 25, 1949 in (Late) Rev. T. Kaikhosum &  Pi Niingtel apan in a  piang hi. A pa Rev.T. Kaikhosum pen 1903 kuma Paite Laibul (Primer) abawl masapen T. Vialphung tapa upa pen ahi a, Nu Chingmang pen T.Vialphung tunu upa pen ahi. Kum 62 ahihin   a nna asep Toupa kiang ah Dec.18 (Sepnawn ni)2012 @ 7:30 PM in Zion Hospital, Bangalore apan in ana khawl tawldam ta hi.

School kaina leh Nasepna:

Kaihlam NEIG Mission School akipan Churachandpur Christian High School Mission Compound ah Class X tan a sim a huchiin EBC,Teacher Evangelist in Lamzang, Vungbuk, Lenglakot leh Mualkawi te a a sep nungin Pathian leh heutute deihsakna in Lamka Division Office ah a kisuan a, huai akipan in kum 2010 in a sepna pan in lungkimhuai takin a hong pension ta hi.

Paite sung a numei La &Solfa siam masa ahi:

Nu Chingmang mi piangthak leh Pathian it mah mah ahi-a, theihtawpa Pathian nna seem ahi. Anungak lai In Paite mite lak ah Lasiam amin thang ahi-a, Leader’s Conference of NEIG Mission in a kineih lai in La ava sak leh, Saptuamtuam a Leaders te’n Lasak siam asa mah mah ua, huai a kipatin Lasa siam  a theih ahi. Ama huna Numei Solfa siam leh Lapu omsun ahi hi. Amah 1966 in All India Radio Paite Program a  Lapawlsa masa pen  Dr. Gouzakap Hatlang, Dr. Pum Za Thang Tombing leh Mr. Vungzalam leh lawm dangte tawh Imphal ah Pathian La leh Gam ngaih La ava khum uh hi. Amah makaih in, hunkhat lai in ECC (EBC) sunga kumtawp khawmpi chianga Lapawl sa tampen ahi uh. A sepna khuate leh Dorcas khawmpite ah lapitu in apang jeel hi.

Amah unau numei ngate’ laka a upapen ahi-a, sepna nei masa pen leng ahihmah bangin  anaute’ School kaina  leh khosakna lam ah makaih a chawm khang lian in Nu leh Pa din mun a dingin a sanggamte a makaih man in avekun akitoudelh thei chiat uha, anaute’n zahtakin  it peetmah uh hi.

Pasal Neih na:

A damsunga a pasal dingin Kapchung Dousel tawh  Jannuary 1977 in Lenglakot ah Saptuam dan in aki teng uh hi. Atate Pasal thum a pha ua, avek un piching ahita uh. Mangnu in a sanggamte a etkol nung in, a tate akhoi lian vek in, ahon domkang tou nawna, sepna nei in mahni-a kitoudelh thei ngen ahita uh hi. A pasal in taisan mahleh anunglam sangin apasal lam mah a belh tun tun ziakin Bible a Ruth tawh genteh ahi. Adamlouh gim mah mah lai in leng, “Lamka a ka Inn ah hon paipih un” achi chi hi. Aman “Jesu ka pasal ahi” achi-a, Pathian ah akipak mah mah a, hiai a lapi ahi: “Toupa nakhut ken kalen dia, Phunlou leh lungkim in om ning; Ka hihhih ah kipakta ning, Ka Pathian in kei hon pi jeel….”

Mi genthai ahi: 

Ata neupen Lambiaklal Dousel pian in sihsuala  nau aneihziakin, huai akipan in hatlouhna chikhat ahon nei hi. Nuamsa dekpan, atate leng tangval chiatta, College hong kai panta chih ding in a pasal in lengdang apomsan hi! Huchiin gen theih chiteng thuak in atate a khoi lian a, atapa upapen Luaimuanthang Dousel in zi &tate aneia, anihna Sumlalson Dousel in Jet Airways, Bangalore ah a seem a, a naupangpen Biaklal in “animation.com” Bangalore ah a seema zi leh ta tawh khosa hi. 

Huchiin nuamsa dek pan a, hong ki tohsuah dek pat laitak un, atapa Lalson in ahon sihsan a, tua zawh in a nasepna apan in a hong pension a nuamsa dek pan chih ding in, sinnatna leh zunkhum natna ziakin a honna paisan ta maimah hi!

Pathian mi ahi:

Nu Mangnu Pathian itmi, thumni ahi-a, haksatna bangteng tuak mahleh Pathian tung ah a khasia in avui ngei kei him him hi. Thohlawm leh Sawm a khat angai poimawh mah mah a, tua adamlouh siatnung, damdoi in a alut nung na ngawn in a sawma khat Pathian nasepna  ding in a pia gei gei hi. Bible sim gige mi ahi a, a Bible tang deihte: “Toupa sikhanu kahi, nathu bangzeel in ka tung ah tung hen” chih leh, “Ka nuntakna in Toupa a pahtawi e, ka kha leng ka hondampa tung ah  akipak mah mah” (Luka 1:38, 46-47 leh 2 Timothy 4:7-8) ahi.

Tutunga ahong damlouhna:

Inn a hatlou leh omnuamlou a bang tan hiam aom nung in zuntha theilou leh gilvah chih dan in ahong oma, huchi in November 26(Sepatni) 2012 in Zion Hospital ah aki admit hi. Huchi a hoihpah dia aki gin lai in ahong sia deih deuha, Doctor te’n  ‘Sin natna’, ahi chih agen ua, X’ray adan in asin bang ana bei phial in a oma, agilvah kiamtheilou, zun tha theilou leh nakhaksa sa a bang tan hiam a om nung in, Zion a kipan in Manipal Hospital ah Dec. 17 in ki admit nawn a, huai akipan in Doctor in damzoulou ding chiin a sawl khia a, December 18(Sepnawnni ) 7:30 PM in Pathian in a hinna ala ta hi. Natna haksatak thuak himahleh alungsim pilkiukiau in a tate leh a sanggamte’ kiang ah, “Angelte’n hong pi dek uh, ka paina ding nopchilua, honpaisak un” achi den hi.

Alungsim kam:

Amah banga pasal dam gegu napi-a meithai, Lamka kiim a te khatvei annekpiha, “Pathian muan huaidan genpiha, Pathian pa neiloute pa ahihdan leh Amahkia a kingak ding ahihdan,” genpih a puansilh khatchiat beek piakding chih alungsim a suak, Pathian theihsak hi-a atheih, mi tawmchikte kiang a ahihmasak, atamzawte kianga ahihding chih lungsima aneih, ahihtangtun manlouh ziakin hiaite’n alungsim kam ahihdan adamlouh-lupna tung ah a gen hi!

Last Journey of Nu Chingmang:

Bangalore EBC makaih in, ZCF, ZYA, ZPC, EOC, Green Hill Church, Ciimnuai Group, GETS family, leh mimal tampite’ itna galna, puankhuhna leh ngaihnatna, mangpha tawh misi inn(morgue) a zankhat ataam nung in December 20(Ningani)in Banglore-Hyderabad-Kolkatta-Imphal Airport 6PM in atapa Muanthang & Biaklal tawh tung uh hi(Christmas kuan ahihziakin a ittu zuinuam tampite’n tickets a ngahzohlouh ziakun zuitheilou uh hi!). Calcutta Airport ah EBC te’n ana dawn uh. Imphal Airport ah Upa Phungzathang Tonsing, Minister Gov’t. of Manipur in ana vaidawna, Imphal YPA te makaih a vaidawnna progam neih ahih nung in, EBC Imphal D/S in thumna a a khakkhiak zawh in, Imphal a ana vaidawn te’ nung in, Lamka apat amah dawnding ngiata hong kuan Bus leh Car tampi tawh a inn College veng, New Lamka zuan in pai a 9 PM veelin a innlum  tung hi. A zing Sintawpni December 21,2012 in New Lamka YPA hanmual ah 1PM in a ittu tampite’ khitui naptui tampitawh, a biakin kaina EBC College Vengte’ makaihin thupitakin, it-a Anna asep, Vanglian Toupa tuakding leh khantawna Van misiang Serafte tawh Pathian phat dingin vuiliam in omta hi. Nu Mang mangpha..“Chiau I gal ah dawnbang kituak ni, Muanna Thian mang siang ah……..Amen!”

“A misiangthoute sihna Toupa ngaihin manpha pi ahi”(Sam 116:15).

---------------------------------------------------------------------