Nupi leh Nungak fel taktak te annsuk ging kekeuh, Vualzawlna zing ninou suak nun-neem mel tak leh etlawm tak mai tungleng Sava te kipahpihna thawm gingte ka mang zak mialmial laitak in Akpi tuitha-khin kawkek lahlah in hong phawng hi. Huih vot siangthou nung hiauhiau, innkiim leh kiang a sing leh theinah nung-ging selsel kiza. Huih siang mahmah a votmui henhen pen ‘Zodam Huihkhi’ achih te uh ahi ngei ding.
Meng chipchiap kawm a paiphei in pangkhang ah zun pekkhe chelchel mai. Nunu in Kawlkai vutphual sa honna koihsak thinthen a, salua a pipi ka khehsak hi. Ha-nawt, Maiphiat chihte bang om selou in ka nesuk mengmeng hi. Meisak a childok tiltel a tukom in pipi sahou pok huan ka chiam ut chin ka nget leh Kuangta neu chik khat ah hong thuuk khe pah in hon muut khing sak zawmah lai hi (huailai a kapi huansa sahou pok ka pichin nung tutan in ka lunggulh hun omthei lailai hiveh e). Pipi in kei a ki-ngek sak pha mahmah hong et komkom in Buh-le-Meh ding buaipih lai hi.
Buhman ka Nini leh Nunun Sum a asuk uh kisiak mahmah ua, Pupu le zingtuung chilou in a Seeng phan tha-it peuh mah hi. Papa'n lah innkhang a An-kam Huan Bawng phutvang um, amah kia in buai a phaphet lou hi. Zing an-neek hun in kei Kawlkai em leh mehpok leep toh vahgop annduh nonlou in Sabuai tung ah an-neng khong toh naptolh hehu kom in ka kimawl nilouh a. Ann hon nekhin vekta ua, Nunu suun an-tuun na gei a vatu teutau kawm in ‘Nu Tangmai hong puak ngeingei in aw’ kava chi tuantuan hi: Nunu’n ‘Hitham e Bawi aw…. nang adia let a lian ka hawi om ahi’ hon chilai bang zaw aw kanu ka ngaihna a pung hulhul.
Kei bel bang sem ding, bang bawl ding chihte ngaihsun theinailou- kanu leh pan bel Louma awlmoh tuak mahmah ua vaikuan ding in akisa somsawm uhi. Kamtei in pau nuam mahmah lengle kapan Skul kai ding in neu hon saklai man in kakai naikei hi. Sun in pipi’n hon don sek a, a Tuu melmuh masak pen ka hihman in hon duat diak abang. Buhtui kei adia adiik khiat liaulaiu akoih Chini hon sawhsak in suunkim ma deuh in honpe gige hi. Teek simta hat-nonkei mah leh kaki ngeksak a hon puak ka ngen sese. Ka kawng ana chihetlou in ka ihmut ma tantan hon pua gige hi.
Ihmu-thou kiphin nang kia zong, nunu loukuan chih thei gegu ‘kanu la?’ chin kakap panta a. Pipi’n khemtheih khemmoh in honna khem a- aktui bang hon huansak leh tawp ut pan. Tuilum in hon bual a, nuam salua chim matan kuang-ngoupi sung ah tu kikek lel, pupu hon bawlsak Chiing akiphan Ball toh kimawl kom zawmah. Pipi’n puan hon silhsak zoh in nitak lam meh ding Lengmasel malkhin, Baal meet a kipat dek laitakin Pupu Betang thaang kam kom, Mankhawng thaang vilkhin hong tung geih hi. Gam-ak a Sakhaupi a akuah hong sawk-khia in hon paakta leh on duat kineih ahi ngei di chu alah masak pen kei kahi hi- kipak kisa ka tawm lengleng zawzen hi.
Vuah in pupu ngak ahi deh aw . !. .! . chih theih leh kilawm- huih hong nung vutvut in vanlam mial ngawingoi a, vuah hong zu thut hi. Kong lam ka manoh pah a Vuahmal ke sengseng te pakta in khoih ka som chiang in pipi’n hon phallou hi. Huangvulh Gantate kibel chitchit kom a inliim leh in-nuai lam manoh ka muh in ka Nu leh ka Pa ka mitkha ah hong kilang hi. Keile bikhalaap nuai a tu kekauh in vuahtui ka khut-le-khe a khoihgu zazauh kawm in ka nu toh ka pa loukuan gimtak a vaai hong pai ding, vuah thuak ding uh chih ngaihtuah theisam kahi diam “Vuah aw theutheu; Nu’te Pa’te tung nailou a… . vuah aw theutheu” ka chi tei hi.