Founder Speech
~ Ginza Vualzong
ZOGAM.COM kum sawmnih chinna leh Tang Au Award 2023 zang dia hong kalsuan tengteng na vek un zahtakna Chibai ka hon buk hi. Kum 20 mel i muh chiamteh tham mualsuang ahi a, ZOGAM.COM toh kisai khate a dia ni poimoh leh kipahna ni ahihman in, hiai hun zangkhawm dia kisam khawm i hi.
Kum 20 mel i muh toh kiton in hun paisa a haksatna tampi i na tuahte, nasepkhiat tampi i neihte phawk in om hi. Mun tuamtuam a om Zomite kithuzaktuahna leh Zomite kizopkhawmna platform khat bawl tup a nei in, March 09, 2003 ni in ZOGAM.COM website bawlkhiak in ana om hi. Zomite kithuzaktuahna leh kizopkhawmna tup a nei a kihih ziak in Briding the Zomis chih ZOGAM.COM theme in kinei hi.
Technology lam ah ZOGAM.COM ana advance thou ahi ding a, ei singtangmite a dia website luipen chihtheih in om hi. Facebook, WhatsApp chihte a om ma in ZOGAM.COM in thu kikuptheihna platform ana bawl khin a, ei singtangmi a dia social media masa pen leng ahi. ZOGAM.COM in tu lel in platform 3 kinei hi - Website, Facebook leh WhatsApp. A kigawm in member lakh val kinei hi. A tangpi in Zogam.com Facebook ah nikhat in post 6 ki post zou gige a, ni khat a comment 280 vel omzou gige a, ni khat a 1435 reactions omzou gige ahi.
Kum 20 mel i muh theihna ding a panla tuamtuam om hi. Amasa pen in Pathian pina a hiaitan kitung ahi chih i gen a, thupina tengteng Amah i pe masa ahi. Memberte deihsakna leh nungthuapna ban ah laigelh Columnist i neihte leh adminte panlakna ziak a hiai tan kitungthei ahi. Tuni in amaute tung ah kipahthu ka gen a, amaute panlaknate kiphawk gige ahi chih aphawk uh deihhuai kasa hi.
ZOGAM.COM in mipi a ding in “Opinion shape” tu leh social awareness puangzaktu in pang gige a, i gam a dia panlaktheih nana ah pan ana latou gige hi. 3 bills buailai in le ngaihdan genkhawmna hun TV Talk Show bang nei in, Martyrs te panpihna piakna leh pahtawina hunte ana kibawl hi. ZOGAM.COM in literature ngai poimoh a, i gam a laigelhsiam tampi sekkhia hi. Writers Award leh Writing Competition te bang le ana kisai hi.
ZOGAM.COM in award ana saite hiai bang ahi uh —
1.ZOGAM.COM Writers Award - 2008
2.ZOGAM.COM Personality Award (ZOPA) - 2014
3.Tang Au Award - 2023
I gam ah media te pahtawi in omkei hi. Ei leh ei i kipahtawi kei leh kuan hon pahtawi ding hiam? chi in tutung ZOGAM.COM 20th Anniversary hun pen ZOGAM.COM in intekna la in, i gam a ka media pihte uh pahptawina piakna hun in kizang leh chih ngaihdan ka nei uhi. A min di ka hon ngaih tuahtuah chiang un nidang lai a i pipute hun a singtang khua a kithuzakna a kizang TANG AU ahi a, tu chiang a global village a omta i hih man un media-te TANG AU himai ua, huai ziak in i award min ding in TANG AU AWARD hon chi ka hi uh.
Tang Au Award ahih leh category 3 in kibawl a — Printed Media (newspaper leh magazine), Electronic Media (Cable TV) leh Social Media te ahi uh. Huchi lou Imphal based media a ei singtangmi asemte le pahtawina piaktuak kisa in amau a di le category tuam in Imphal Based Media Persons chi in ka hon bawl uhi. Social Media group tampi om ahih na ah, facebook group neih criteria khat in ka hon bawl uhi. Award sangthei di a kigawm in 24 pha a, award piaktuak mangngilh khak le a om tham ding hi. Huchi bang a om khak zenzen leh i kitheihsiam ua, a nawn lam chiang a bukimzaw a i bawl ding uh ahi mai ding hi. Tutung kipahpih etsakna in Trophy kia ka hon bawl zou ua, cash award bawl zoulou phot kahi uh.
ZOGAM.COM ngainatu tampi om mah leh tuni in miteng chial zou ding in kidinglou hi. Nitak an kisai ahih man in, ngaihnat diak leh poimoh diakte kia hon kichial ahi. Huai ziak in tuni a i program a hong tel teng hampha na hi uh. Damleh Silver Jubilee bang lawmthei a i om chiang in mipi a tamtheipen chial thei ding in pan i la khawm ding uhi.
Program himhim saina ding in sum leh pai a poimoh hi. Tua i program TANG AU AWARD saina ding in ZOGAM.COM ngainatu leh deihsaktu mi bangzah hiam kiang ah panpihna a kingen hi. A tawm a tam chih omlou in mi 66 akipan in panpihna kimu a, huai tungtawn a tua i program uh zangthei i hi. Kiphaltak a sum hon thohte tung ah kipahthu ka gen ua, a kiphalna uh Pathian in a lehtampi in vualzawl ding in deihsakna lianpi ka pia uhi.
Tutung Anniversary lop di vai, kou adminte kia in saizoulou di ka hih chiang un, Anniversary Committee kibawl hi. I program lohchinna ding a kipei Anniversary Committee-te tung a le kipahthu mipi mai ah ka gen a, Award sang dia hong hoh media-te hita leh program uap dia hong hoh tengteng tung a le kipahthu ka gen ahi.
Na vek un ZOGAM.COM 20th Anniversary zatnuam! ZOGAM.COM damsawt hen!
Ka kipak!
Date: 09 March 2023
Green Hills Hotel & Resort, Mata Mualtam.
