Singtangmi student ten Manipur University nusia uh

ZNN, Imphal 10th October 2016: Manipur University Academic Council ten admission toh kisai a ST reservation 31% hi di pen zui lou a reservation lui 7.5% a zuih sawm ziak un, Manipur University a kai singtangmi student te lungkim lou in tu nitak lam in MU campus pawtsan ta uhi.

Central Educational Institutions (Reservation in Admission) Act, 2012 dungzui in quota om dan ST-31%, SC-2%, OBC-17% himah leh, Manipur University Academic Council ten hiai Act ngeingaihlou in, a lui Central Educational Institutions (Reservation in Admission) Act 2006 (ST-7.5%, SC-15%, OBC-27%) pen zui lailai uh hi.

Hiai toh kisai in Student body tuamtuam ATSUM, MUTSU, KSO, ANSAM ten pan la ua, hiai ST reservation pen bawldik ahih ma siah kiphinna tuamtuam bawl ding ahih dan uh leng gen uh hi. ATSUM in Press Release a suahna ah, mi khenkhat in MU authority te thuzoh ahih dan gen ua, UGC leh Court thupiak zahtaklou uh ahih dan zong gen uh hi.

Hiai toh kiton in MU Academic Council in emergency meeting tuni sunnung dak 1 in Court Hall, MU ah nei pah ua, a thupukna uh bel public sak nai lou uh hi.

MU a kai singtangmi studentte tu nitaklam in MU campus nusia ua, thutut kingah dan in Khumanlampak Youth Hostel a khenkhat om lel hi dan uh hi.

Manipur gam a singtangmite nelhsiahna uang deuhdeuhta ahih man in, singtangmi ten i kitheihsiamlouhna te uh paihkhiak a, i pankhawm uh hun mahmah ta ahi.