Deuel Khual' Music Video Honna Om

Lamka 26 March 2015: Tuzan dak 7 in Saulim Restaurant, New Lamka ah Pu Deuel Khual in Music Video a bawl honnkhiatna Pu Mangchinkhup, EM, ADCC in nei hi. Aman a genna ah, Music in gamgi neilou a, music tungtawn a nna tampi sepkhiat theih ahihdante gen inleh, panpihna dakbawm piakna leng nei hi. Hiai music video ahihleh Pu Thawnkham in a phuah 'Pathian Liansak' chihla Pu Deuel Khual in classical music a a bawlthak ahi.

Hiai hunzatna ah Pu Deuel Khual in classical music toh la nih tum in, Pi S Chingnu  inleng 'Tulpan Kai' chihla siamtak a sa in Pu Deuel Khual in  classical music toh zui hi.

Huai banah, Lamka khopi a bangchi leh music toh kisai a khantouhna omthei ding chih toh kisai kikupna Pu Khupnang makaih in om a, ngaihdan tuamtuam sungkhopna leng om a, ZOPA Pu CT Lian Guite inleng Music toh kisai a bangchi pai ding, a utteng in music band bawl a, a siamle siamlou chih omlou a album bawl mai ding i diam chi a, hiaitoh kisai a enkai thei ding omleh deihhuai asak dante gen hi.

Tuateng zoh in Pu Deuel Khual in kipahthu genna nei a, Pu Lianding in hunkhakna thumna nei in program zoh in om hi. Hiai hun ah mipi hunkhop paikhawm hi. Maban ah Pu Deuel Khual lamzang tak a hong paitouh zel ding Zogam.com in deihsak lianpen i pia hi.

Zogam.com News Service

MORE PICS: https://www.facebook.com/media/set/?set=oa.831982536887855&type=1

MORE PICS: https://www.facebook.com/media/set/?set=oa.831982536887855&type=1