Chandel ADC Chairman Lhunkhosei Zou Lakh 58.14 negu a ngoh in om.

Chandel ADC member Beradin Shilshi gen dan in Lhunkhosei Zou in May tarik 12 in SBI chandel branch tungtawn in lakh 58.14 lakhia in gen hi. Aman a gen na ah hiai sum pen 13th Finance Commission Award General Performance Grant a Rs 46,40,407 hi a, Special Areas Performance Grant ah Rs 18,59,669 hi in gen hi. Shilshi in a gen zel na ah Work Order omlou pi a sum lakkhiak pen Finance dept toh ki tuak lou a, Tribal Affairs and Hills Dept zahtaklouhna leng hi in gen hi. A om dan bel ADC Chairman pu in Aimol Chingnunghut Community Hall lamthak na di leh Galngam Lentol Gallery, Moreh bawlhoih na dia lak khiat hi in gen uhi.

May tarik 19 a ADC meeting a neih na ua Shishil in Chairman pu dotna a bawl na a, Chariman Pu Zou in bel Joint Secretary (TA &Hills) phalna mu ahih dan gen a, tua banah hiai ngohna baseless ahih dan zong gen bok hi.

Chariman Pu Lhunkhosei in press statement a bawl na a, sum a lak khiak te government in phalna a piak vek ahih dan gen a, ngohna te thubulbal neilou ahih dan zong gen hi. Hiai sum pen nasep te government deadline ma a zoh ahih theihnang a advance payment a lak ahih dan zong gen hi. Work progress report masapen May 25 ah piak hi ding a, tua zoh 2nd report pen June 20 ah piak hi ding a, completion report pen July 15 hi ding chi in zong gen hi. Tua banah thu kim zaw thei ut ten amah mah personal a contact theih gige ding uh ahih dan zong gen hi.