August 26 sunnung dak 3.30 velin Olympic Medalist Mary Kom vaidawnna leh kipahpihna Lamka Public ground a neih ahihlai in Mission Road ah newspaper tamtak tawi a pawtlai Pu T. Dongzapau of Mualveng, Hiangtam Lamka, Police khat in thau tang khah suah kha in a gilnem ah thautang lut in District Hospital ah puaktung in om hi. A condition serious ziakin Imphal Shija Hospital delh mah leh uh lamkal a damzou lou in si hi. Hiai thutut ki ngah tan in Imphal ah Post Mortem neih ahi. Zogam.com in lusunna thuakte ki suun pih mahmah hi.

Hiai thiltung ziakin Mary Kom dawnna zong nasatak in hih buai hi a, mipi tampi taizaak mahleh uh program bel a top tan in pai tou chih thu zong ki za hi.

Zogam.com facebook group houlimna akipan thu ki ngah dan in mi kap tu pa zu khamsia in a lawm pa toh ki sel buai na lam in thau khah kha in, thautang in a kiang a fencing teklei kap kha masa in, huai a zuan kik pen in Pu T. Dongzapau kap kha dan hih tuak hi. Mipi ten tua thau kaptu te inn buluh sawm ua, security tam mahmah chih thu zong ki ngah hi. Thau kaptu sepaih pa bel Police custody a om lel hi dan in thu ki za hi.