ZOMITE SUANGMANTAM LIANU: MC MARY KOM ZOMI VAIDAWNNA TOMKIM
By- Paumuanlal Guite BaBs, CeeBee Guite and Mangkhum Tonsing

“Nun in nuam e, lung kituah dialdial...
Zomi lia- le- tangte tuibang hon kigawmsak Mary Kom hichia....”
Mihingte kumsim dan in August 13 hong tung nawnta hi. Delhi khotual a laitual ngabang leng liapal tangpalte lungsim ah August ni 14 zing ninou hong suah ding kal ngaklahna in pumtuam hi. Zalkhun zuan in sambang zalleng taikhua hong vaal dia, khang theibang ka lou zou diam!! chih lauhna toh giakmoh vabang in mau vengvung mai ua, mi zatamte lup leng lum ngamlou in zankhua in lungsim a vaibang tham den Mary Kom Zomi mel amuh kal ngaklah in ki omchiat hi.

August 14 zingkhua vaak dia kisapan, khua leng vaak siang man nailou in Delhi kiilchih a omte omna mun chiat a America hoh ding bang in kiphe vengvung mai hi. Zomite tenna inn peuh ah alanglang ah Alarm Bell ging vengvung tamai hi. Lamlian gei lam ah gari ana om ding chih ahihmanin lap louh khak ding lau a sepaih kila ding tai bangmai a tai thoh toh, lawmte hong tung manlouh ding lau a gal et khop toh kibuai mahmah hi. Khenkhat taget lah ka hihtheih sun Mary Kom ading in ka phone balance teng ka zanggai vek ding chi hile kilawm hial in lawmteng ban hilh vengvung toh thupi thei mahmah hi.

Zingsang baihtaka Zogam.com Team leh ZOL Team ten Mary Kom vaidawn dia kuan khiat lai uh

Gari neu neite gari neu in hong kikhoh vengvungta ua, huchilou teng ading Bus li lampi gei ah hong kidoh hi. Nampuan liangbat pawl toh, Zomi Ka Hi chih puan silh pawl toh a etlawm vauu paak bang in om singseng hi. Gari ah ka tuang mankei kha ding, ka tazou kei kha ding chih lauhna ngen a dim hileh kilawm chiat in gari sung a kiluut zungzung mai hi. Tampi hong kuan ding omlai mahleh Zomite’n hun zangdik ding chih ahihna toh ahunchiam a gin toh kiton in IGI Airport lam zuan in kitai vengvung tamai hi.

Bus sung ah nungak tangval adim in om mahleh nungak-tangval thu in tanmun a neikei. Aw I zak peuh lah ‘MARY’ himai... Aw ka min Mary ana hihlouh poina e chih bang uthuai hial abang. Heutute lemgeel siamna toh laidal lianpi ah michih in Mary Kom muakna ding thu tuamtuam thupitak kigelh chiat hi. Airport tun ding ngaklahna lian semsem, nidang a tomchik I chih tuni in sauna maizen e.... chia khasiat pau pawl toh kiluum suk vengvung mai hi.

Airport tung phet gari a awl a kum chih leng om man nawnlou, England Kumpinu mu ding banghial in kitomkhe zungzung mai, hong pawtna ding lam manoh in kitai vengvung hi. Zosuante lah kitam mahmah dudup, security te bang in vanlam a enhial mai uhi. Mipi husa in lah Mary, Mary chi vengvungta, amah lah sakmel muh dia hong om ngeilou. Mu nuam selua om muang thei om nawnlou, asuk tai toh a tou tai toh kibuai vengvung mahmah hi.

Mipi ten Mary Kom Ngaklah mahmah uh...

Sawtlou ngak nung in Zomite Golden Girl Miss Mary Kom Zomi hong pawtkhia khongta chu......... Mipite a paak penuam toh, puan silhsak nuam toh, Jesu hunlai a apuan mong lenkha lengle ka dam ding chia khoih guiguite bang hial in akhut bek kei atoh sutuah nuam ing chia phe velvul toh nasa mahmah hi. Nidang a melhoih lua hi hetlou I chihleh Zomite nampuan hong liangbat hialle chu Miss World kua ahituan a chi’n tangpalte’n gen vengvung mai uhi. Thupi in etlawm hina maizen chia chi’n muk nei peuh in gen vengvung mai uhi.

Gari ah I Zolianu uh tuansak in hong om a, Zo tangpalte aom kinken thei om nawnlou, a gari nasan tai thei nawnlou ding khop in pumdimta hi. Securityte’n noh dalh sawm mahle uh Zomite ki-itna kuamah a khen a, a laikek zou ding aomkei. Gari taisak in omta a, a hat tai leh mipite le hattai, a awl tai leh mipite leng awltai. Anung ama ah Zomite phe souhsouh mai.... Hiai banga Zomite itdan amuh chiang in amah leng kideek zou nawnlou in a biang apan kipahna luankhi hong luangkhe keuhkeuh mai hi.... Huaiteng banah Unau Komte’n laidal lianpi banga “Mary Kom Zomi”, “We are proud to be Zomi” chih bang hong liiksang chiang un nungak-tangvalte tha guan semsem mai hi.

Mary Kom Airport a hong pawt khiat tawh ki ton a, thilpiak pe ut te a dia hun om ding chih himahleh mipi tam luat ziakin security ten Mary gari ah tuang sak pah uhi. Nam tuamtuam ten a puandum te uh pe dingin ki sa khol mah le uh piakna di hun om nawn lou suak hi. Zogam.com heutute zong lungliap lou in, Mary Kom gari a tuanglai va delh chenchen ua, a khut a kipahpih etsakna hih theih sun ZOGAM.COM 'Zomi Ka Hi' Tshirt va pe thei uhi. Mary in Tshirt khut a tawi in vaphual lem omna pen sawt sim pi en in kem hoih hi.

Zogam.com Tshirt a saan lai tak....

Amukha hetlou a muukpuak pawl toh, a chibai khalou a khase pawl toh, Mary kom chibai buuk kha chia nuihmai den pawl toh tangpalnou “lenglai kituahlouh a poi bermai...” chia kikou pawl toh a om vengvung nung in a tunna ding lam zuan in hong paisanta hi. Anung in Zomi nungak-tangvalte thawmhautak in mahni omna munlam chiat zuan in paikiik zungzung nawnta hi. Hiai hun tomchik sung hi lungsim ah saupi luut den ding asuakta hi.

Hiaibang a I mi-isate pahtawi a ana vaidawn theihna dinga haksatna tampi laka ma loubang anapan I heutute uh ZYA, ZSF te lunggel leh kipiakzohna thupi mahmah mai a, huaiteng banah mipite’n leng heutute nungthuapdan I siam mahmahna un hon thupisak semsem in a muhtheih hi. Hiai thil ziak in kol-le-vaite’n Zomite ki-itdan a mangngilh nawnkei ding uhi. Zomite hanlungchiam, khangtou diam!!!

Anuai ah mi tampi lak a mi bangzah hiamte coment I ensuk ding....
1. Mr. Manoj Tiwari CISF personal kiang a mipi hiai zah zouzai hongpai khawmten bang hih dek uh hiam na thei hia? Chih dotna a dawnna ah. Mary Kom, World Boxing champion hongpai dek ahi chih ka thei chi hi.
2. Neha Walia, 2yr B.com DU – Ka colleaguete toh Mary Kom tungtang ka genkha ua, amau leng Zogam.com a link khat hon khak ua, huai apan thil omdan thei a hon hoh kahi. Mary Kom lohchinna pen thutuam, nou mite na kipahtawi dan uh thupi kasa mahmah.. Its really great.!!!  
3.Nu Yangnu W/O Pu L. Ginkhomang – Ei singtang mite ki-itdan, kithutuah dan kamu chian semsem a, thupi kasalua. Banah I heutute uh vaisai siam uh kasa mahmah. Hilele Mary Kom ka chibai khaklouh chu poi kasa law petmah...
4. Pu Zangkholun Mangte ZCF Pastor – Mary Kom mel kamuh in hiai bangtan tung ding in ngaihtuahna ka neikei, Pathian hehpihna ziak liauliau ahi chih ka mu.
5. Pu N.Chinsum bel – Gen tam ding omlou “Kipahna in ka dim...” hi topmai.
6.Pu N.Vumsuan – Gintak sanga mipi hong tam mahmah ziakin deihbang in thilsai dan teng paithei kei mahleh, thupi mahmah. Hiai bangzah a I hihtheihna ding ua vaisaitute leh sum le pai hong thohtute tengteng tung ah kipahna lian mahmah.
Huai kawmkawm in eimite kizahkai lua, Spanish guitar khong tum in laam zuazua leng nuam mahmah ding hi a....

7. Pu. V.Songkhothang (Pastor Retired) -  Ziing tung a hong tung ding in mipitam kasa mahmah. Mary agal apan ka mukha hamham a ka pakta mahmah.

8. Pu Ginza Vualzong - We need to celebrate Mary Kom as a hero for the nation, a pride for the North East and an ambassador for all the tribals (Mary Kom Kuki/Mizo/Zomi hia chih toh kisai a comment)
9. Pu Siamno Ngaihte - Pathian in hon tawisang dan thupi kasa a, Zomi Olympic medalist masapen Delhi hongtung ana vaidawn kha ka hih hampha ka kisa, Mithupi kivaidawnna hichi lawmlawm a thupi Vangam ah gingtute vaidawnna nak thupi nan chia chih hon ngaihtuahsak.

With Pu Siamno Ngaihte