LAMKA, June 26 Zomi Council makaihna in tuni’n Zomi Council Office, Nehru Marg ah Zomi Council Working Committee, Zomi Council Frontal Organisation, Zomi leader-te leh Elected Member (MLA & MDC) te’n June 19-20 a Lungthul (L) a thiltung toh kisai in Joint meeting nei uhi.

Zomi Council, Chairman L.B. Sona in a sap dungzui in Langkhanpau Guite, Chairman, ADCC-Churachandpur in joint meeting Pathian kiang ah thumna toh lan in meeting pan uhi. ZC, Chairman in meeting hun ah makai paikhawmte vaidawnna leh kipahthugenna nei in, tulel a Zomite paipih UPF agenda toh kisai a Zomi Council in pan ana laknate genkhiakna a neihkhit in Zomi Council in emergency meeting a sapna ziak leng paikhawm makaite theihding in puangkhia hi.

Meeting hun ah hun piak a om bang in ZRO Adviser, Khaizasong Guite in meeting uap a paikhawm makaite kiang ah June 19-20 a Lungthul (L) a thiltung toh kisai nouneltak a hilhchetna a neihkhit in paikhawm makaite tung ah kipahthu gen hi. ZRO adviser Khaizasong Guite in thugenna a neihkhit in Hangshyanthang, Secretary GAD, ZRO inleng agenda toh kisai nelnoutak in paikhawm makaite toh houlimna leh hilhchetna nei a, hiai in makai paikhawmte thoveng tuansak mahmah hi’n thusuak kimu in taklang hi.

Hilhchetna leh houlimna neihkhit a om nung in Joint meeting hun a paikhawm makaite’n kituaktak in thupukna bawl uhi. Joint meeting thupukna ahihleh, June 19-20 a Lungthul (L) a thiltung Joint meeting a makai paikhawmte’n poisa mahmah ahihman in, hiai bang thiltung a tun nawnlouhna ding a thiltung a kintheilam a saifel ahihtheihna ding a mahni hihtheihna lam chiat a panla ding in lemsa uhi. Lungthul incident toh kisai a ZRO Cabinet in thupukna a lak teng joint meeting a paikhawm makaite’n theihpih leh pompih chiat uh ahidan leng thusuak in taklang hi.

Joint Meeting thupuknate ZC Chairman in simkhiakna a neihkhit in paikhawm makaite kiang ah thupukna pompih leh koumau bawl chiat ahi chih theihna ding in makai paikhawmte’n khut taklam chiat lik ua, huai khit Tualkhanhau Ngaihte, Vice Chairman, Zomi Council in Pathian kiang a thumna toh meeting hunkhak hi.