Chief Justice of Manipur in Sunday Closed dan kibawl pen lakhe dingin ADCCte order pia.

Lamka 8 August 2019 | A paisa 31st July 2019 in Sabbath ni zang kigawm khawm 'Messianic Council' kichi ten Manipur High Court ah Autonomous District Council, Churachandpur (ADCC) te'n Sunday Closed dan a bawl uh toh kisai in Public Interest Litigation (PIL) ana theh lut uh hi. Hiai PIL toh kisai 1st August 2019 in case hearing om a, Hon'ble The Chief Justice, Hon'ble Mr Justice MV Muralidaran in case order suah khia a, ADCC ten dan a bawl pen uh cancel (revocate) dingin gen hi.

"...However, it will be appropriate to direct the Autonomous District Council, Churachandpur to consider the representation for revocation of the Memorandum...." CNR Number: MNHC01-001457-2019

Hiai PIL kibawl ma in Sabbath ni zang sahkhua pawlpi kigawm khawm ten Joint Memorandum ADCC kiang ah 18th June 2019 ni in Sunday Closed akipan exemption ana ngen uh hi. ADCCte akipan dawnna a om louh takin 28th June 2019 ni in ADCC heutute maitang in va mu ua, mutual understanding nei a, Sabbath zang ten "Saturday Closed" chih takin dawr na hong thei ding uh chi in ki thukim uh hi. Hiai phalna ADCC ten local TV channel leh newspaper ah leng puang uh hi. Himahleh ADCC task force ten hiai mutual understanding zahtak lou ua, Sunday a dawr hong mehzuak nupite tung a khut a khak uh mi teng theih in om hi.

Huchi bang dingmun ahih manin, Messianic Council kichi ten panpihna ngen a government office kongkhak tuamtuam a kiuh nung un, Manipur High Court ah PIL ana theh lut ua, huai dungzui in court order hong om hi. Zan 7th August 2019 in ADCCte kiang ah Legal Notice piak in omta a, ADCC ten High Court order zui ding uh hia ahih kei leh challenge bawl ding uh hia chih ADCC heutute khut ah om lel hi.