New Delhi 28 January 2019 (Zogam.com) | Tuni nitaklam dak 2pm in Sahitya Akademi te auditorium, Firoz Shah Road, New Delhi ah Sahitya Akademi te saina Bhasha Samman Award piakkhiatna nei ua, hiai hun a Sahita Akademi in Paite literature a dopsanna leh puahna ziakin Pu H. Nengsong Bhasha Samman Award ana pia uh hi.

Pu H. Nengsong in Paite laibu 14 val ana bawl khia a, 1935 in Kaihlam khua, Manipur ah ana piang hi. LMS Law College, Imphal ah LLB zou khia in, a sepna Forest Department ah Deputy Conservator of Forest in pension hi. Paite National Council, Paite Literature Society, Bible International India Society, Young Paite Association, Red Cross Society leh a organisation tuamtuamte ah ana kihel hi.

Sahitya Academy Award ahih leh India a dia literature lam toh kisai a award sangpen ahi. Indian National Academy of Letters leng kichi hi. Kum teng in India sung a Major Indian Languages tuamtuamte akipan lehkha gelhsiamte pahtawina pe sek uh hi.

Tuni in Delhi a Paite mi om bangzah hiamte'n Pu H. Nengsong pahtawina va uap uhi. Pu H. Nengsong award lak ei singtangmite literature a dia amasa pen ahih manin, kipahpih huai diak hi.