Siamsinpawlpi Residential School in Children’s Day Kipah thugenna in zang

November 14, 2017

Siamsinpawlpi Residential School, Ngathal in tu kum 2017 Children’s Day pen *“Naupangte Kipahthu genna ni”* chiin zang ua, Lamka khopi leh a sehvel a om Solkal office tuamtuamte pha khual in Kipah thugenna hun sau loulou va nei uhi.

Children’s day a hih toh kiton in school naupang ten amau khutsuak ngei khutsiam sil bawl tuamtuam a bawlte uh Lamka a om Deputy Commissioner, Superintendent of Police, District Forest Officer, Sub-Divisional Officer, Medical Superintendent, Police leh Traffic police-te kiang ah i District pumpi leh Lamka khopi venbitna, kep siangthouna, etkaina a tha-le-zung ana sente uh leh kal ana suannate uh ziak a kipahthu genna in pia uhi.

Tua banah, School tuamtuam apat damlouhna ziak a school kai zoulou a Lamka District Hospital a ki-enkolsak lel a om a siamsinpihte uh mi 32-te leng vehna nei in, balloon leh thilpiak chi tuamtuam piak na leng nei uh hi.

Hiai hun ah SSPP Residential School min in school naupang 25-te leh teaching staff leh Headmistress makaih in kal suanna nei uh ahihdan thutut kingah hi.