International Mother Language Day zatna om
Imphal, Feb. 21:
Tuni sunnung dak nih in Manipur Press Club, Mojorkhul, Imphal ah International Mother Language Day zatna om in Pu Meghachandra Kongbam, Director, Information and Public Relation, Govt. of Manipur in Chief Guest hihna toh uap hi.

Tuni a Imphal a International Mother Language Day zatna hun ah Manipur a pau leh ham tuamtuam omte apan heutu tuamtuamte'n amau pau toh kisai thugenna nei ua, amau laate chiat simkhiatna leng nei uhi. Pu Dr. R. Sanga in leng hiai hunzatna hun ah Paite Pau toh kisai thugenna nei hi. Ama'n a thugenna ah Paite kichi India a tribes tuamtuam omte lak a khat ahidan leh India sorkal in a theihpih pau ahihdan gen hi. Paite mite pen suangtu Zou suan-le-pak Zoumite ahihdan uh gen kawm in Zoumite pen Manipur leh Mizoram ban ah Myanmar a Chin State khawng leh India sung leh pua gamdang khopite tuamtuamte ah leng omsuak vekta chi hi. Ama'n a genzelna ah, Churachandpur District a Radio Station omsun ah leng Paite Pau pen link language in zat in om chi a, huailou in Paite Pau mah a niteng tanchinbu ban ah kalteng a suak tanchinbu leh laibu tuamtuam tamtak suahkhiat a omsek ahi chi a gen kawm in Manipur University Library, Canchipur ah leng Paite Language Cell kichi Paite Pau a kigelh laibute koihkhawmna tuambik bawl a om ahihdante leng gen hi.

Hiaibang hunzatna pen Sahitya Thoupang Lup, Imphal kichite pawl leh The Mother Language Lovers of the World, India (Manipur Chapter) pawl kithuah a sai a om ahi.