Tuni February 13, 2016 in Changangei, Imphal a om Imphal School of Preaching (ISP) mun ah ka laibu bawl thak "Ka Hinna Nang Di'n Ka Pia" kichi buaina omlou in Pu Dr. R. Sanga, Director, ISP in honkhiatna hon neihsak ban ah ngainatute'n na hong uap siausiau ziak un Pasian leh amaute tung ah kipahthu ka gen hi. Ban ah, hiai laibu bawlkhiatna di'a sum-le-pai it lou a huhna hon pete tung ah leng kipahthu ka gen ahi.
Peek 128 a sah hiai laibu sung ah i Toupa Jesu Khrist hong thuakna leh sihna thute kigelh hi. A deihte ding in khua leh Veng khenkhat ah Rs. 60 pia in ngah theih ding a, mimal a hon thukhak nuamte ding in leng ka mobile leh whatsapp number 09089402757 ah chiklaipeuh in na hon thuzak thei ding uhi.
"Laibu hoih petmah... Toupa Jesu' thuakna bukimtak a kihilhchian, saptuam kemtute leh thugentute neih teitei ding a hoih..." –Rev. L. Khaikhansong, Field Superintendent, Manipur Missions Field, EBC
"Hiai laibu Ka Hinna Nang Di'n Ka Pia simtute'n a bei ngeilou ding Pasian hon itna, Khalam ki-etchetna leh tangtawn hinna muhsuahna a hon zat chiat ngei uh lamen in ka deihsakna ka laan hi." –Pastor T.K. Shyam Valte, PCI
"Hiai laibu Valte Ginkhenpau in a gelh ka na velsuak a lungsim hon khoih mahmah. Jesu Khrist thuakna khawng ka muh thakthak chian, eite khawng thuakna bangmah gentaak ahihlouhdan ka musuah thakthak a, lungdamhuai ka sa hi. Khrist nungzuihna i chih khovel a taan ding tampi om ahihdan hon musak a, huai taan ngam loute'n Jesu nungzui kha thei lou ding uhi. Khristian hinkhua i chih thuakna a kipan ahihdan hiai laibu in hon musak hi. Anuam hunlel Christian om thei lou ding hi." –Rev. Thawndoulian, Field Superintendent, Nepal Missions Field, EBC
"Unaupa V. Ginkhenpau, Faculty, Imphal School of Preaching in theihna ngiltak nei ahihdan hiai a laibu bawl Ka Hinna Nang Di'n Ka Pia apan muh theih a, theih utna lungsim toh en a simte'n khalam vualzawlna a ngah ngei uh ka lamen hi."
–Singkhanmang Laingek, BSW, Imphal
