SIAMSINPAWLPI GENERAL HEADQUARTERS IN GAMDANG AH KALSUAN:
C.Tuiveljang, Lungchin Leh Suangdai ah Unit thak kiteel.
Tukum 2016 a Siamsinpawlpi kum 69 a chin toh kiton in khangthu a amasapen dingin Siamsinpawlpi General Headquarters heutu 7 leh Suangdoh Block apat heutu 2 ten India gamgi kantan in Chin State, Myanmar (Burma) a om Haichiin khua vehna va nei uhi. Siamsinpawlpi in hichi banga a kalsuanna pen I district kia hilou in Manipur State pumpi a Student Organisation, foreign gam - Myanmar (Burma) siik masapen hilai dinga hi.
Siamsin Tour-2016, Siamsinpawlpi Complex, Siloam Veng, Bungmual ah dak 7:30 am in Flag off hi a, huaiah Rev. V. Khamvum, Local Pastor, EBCC Bungmual in Siamsin Tour team: Lianzapau Samte, President SSPP GHQ, Paukhenkhup Guite, VP (Ext.), Nengbiaklal, AGS, Thangsuanlal Vualnam, Jt. Secy, Thangzamang Hatlang, Jt. Secy., Soson, Project MM12/SSPPGHQ, leh David Tangpua, Inf. Secy. SSPPJHQ Lamka-te thuumna toh khak khiak na nei hi. Singngat ah Block President Pu T. Pauzalam makaih in Block heutute'n ana vaidawn uh a, Block Office ah kithuahkhawmna hun saaulou zang in ann kuang uum khawmna neingal uhi. Suangdoh ah Block President Pu Pausonthang makaihna mah in Block heututen ana vaidawn nawn uh a, Block Office/Hausa Innpi ah kithuah khawmna hun saulou zat in om a, huaiah Block President in Siamsin Education Initiative- an initiative of Siamsinpawlpi tungtawn a Siamsinpawlpi in Suangdoh Govt. High School a puahphat ziaka kipahthu gen kawm in tukum a Class-X exam ding mi 8 toh kisai a panlakdan saaulou report bawl hi. Houlim na tomkim tak neih ahih zoh in Siamsin Tour Team te'n maban kalsuan nawn uhi.
Suangdai ah Hausapa banah SSPP Suangdai Unit Adviser leng hi Pu Gousiing leh SSPP Unit President Pu Ginkhansiam makaih in heutu bangzah hiam te'n ana vaidawn uh a, Unit Office/Hausa Innpi ah Hausapan', SSPP Suangdai Unit heutu dinga teelthakte, Suangdai CES Managing Board leh heutute pulakna nei kawm in maban a Suangdai a Siamsinna Inn puahphat dingdan kikup khawm na hun saaulou zat in om nawn hi. Suangdai CES ah nikum in Class-V tan ziltheih a, tukum apan Class-VI tan hon beh ding tupna leh sepsuah alunglut dan naktak in genkhawm uhi. SSPP GHQ President, Pu Lianzapau Samte in Pawlpi sik-le-taang in Suangdai Hausa Pu Gousiing kiangah Siamsin (BA) puandum silhsak na nei kawm in Suangdai Hausa in khosung khantouh nang a kihong taka ana vaidawnna kipahpihthu genkawm in maban ah pankhawm dingdan kikupna om hi.
Suangdai unit te khut a Siamsinpawlpi flag piak leh takkhiak ahihzoh in, Siamsin Tour team-te maban kalsuan uh a, Tualkhiang (Myanmar) tawn a gamgi kantan in Haichiin (Myanmar) lam zuan uhi. Haichiin khomual ah khosung ZYA Heututen vaidawn nahun saaulou zatzoh in Haichiin khua lutpih uhi. ZYA heututen nek-le-taak banah giahna ding bangkim bawlfel veksa in ana koih uhi. Nitak ann nekkhit in Pu OnKhanThang te inn ah khosung Hausa, ZYA heutute, Siamsin heutute leh ZCD heutute toh kithuah khawmna leh kihou khawm na nei uh a, huai ah Pu K. ZoKhai hunkeemtu a pangin, houlimna lunglut huaitak neih in om hi. Houlim na tangpi te ahihleh- a) Kawl gam a om Zomite Vaigam a omte sanga Maths leh Science lamah naktak a hat zawsem dan; b) Vaigam a om Zomite Kawlgam a omte sangin Sappau siamzaw deuh ahihdan; c) Kawlgam leh Vaigam a om Zomite maban a bangchi leh ki chimatzaw seem thei ding; d) Kawlgam leh Vaigam a khota ki vaihawm dan leh d) Kawlgam democracy maban ding te naktak a genkhawm na hunzat in om hi. Hiai hun zat khawm ahihsung in Kho Hausa kiangah zahna leh ittna etsakna din Siamsin puandum silhsakna nei uhi. Khotual ten minam iitna toh a khua ua kal va suan SSPP heutute tunga kipahthu a gen banuah maban a Tawndan leh ngeina dante tungtawn a program saitou a, ki tanau zawk seem a lunggulh thu uh gen uhi.
Haichiin ah tullel in Inn 230 veel om a, a tamzaw ten lou nna seem in kivaak uhi, Siamsinna lamah Class-X tan ziltheih na Kumpi Skul hoihtak om a, kho kim leh paam te ading inle laizil na mun poimoh ahih thu leng pulaakna om hi. Neek-le-taak banah ki sumdawn tuahna mun lemtaang tak ahihna toh Solkal lamah leng mun poimoh pi khat suak hi. Sum-le-paai, neek-le-dawn kining chingtak ahih na uh toh khosungah Kenbo (China khutsuak Bike) tam mahmah a, inn chih in nei chiat phial ahih dan uh muhsuah in om hi. Inn tamzaw te Langva inn ahih banah huangvulh ganta adiak in Sial bang khosung ah anei tam mah mah hi. Khotual te gendan in- "Ankhing-tuibuuk ki kham mahmah lel"- chi uhi.
Ki sumdawntuahna leh van zat tuam2 te atamzaw Kawlgam lam sang in Lamka ah lakkhawm baihlam zaw leh naizaw ahih man in khosung ah Kawlgam sum saangmah inle Vai dangka ki hah zatzaw hi. Khotang vaai ah Haichiin khua pen ki pumkhat mah mah in pawl tampi omlou in ZYA (Zomi Youth Association) ah ki khai khawm in nasem ua Saptuam ahihleh bel pawl tuamtuam 7 bang om hi. Neek taak zonna ah tai mahmah ua, a phattuam ngaihna te uh thupi mah mah in etton tham ching ahihdan huntom chik sung a le muh theih in om hi. Sawt taam theihlou ahih man un Siamsin Tour team-te zingbaih tak a in nek-le-dawn bawlsak sa in ZYA in ana koih a, hun saau lou zang khawm a ann nek khawm ahihkhit in lim lak na hun zat in om a, huchi in Siamsin Tour team-te innlam manoh in hong kipan khia uhi.
Dakkal 3 lakvel lampi (setak leh lei vui khu vutvut tung) a tai nung in Siamsin Tour team-te Suangdoh ah tung in, huaiah Hausa innpi pansan in SSPP Suangdoh Block heutute, Lungchin Unit heutu thakte leh Lungchin CES Managing Board te toh Lungchin CES puahtouh dingdan kikum khawm uhi. Siamsinpawlpi in tukum apat Siamsin Education Initiative tungtawn in Lungchin ah nasep panta a, Ahahpan na ziak mah un Lungchin CES ah Admission fee piak ngailou a, monthly fee leng 50% in kiamzou dia lamet ahi.
SSPP LUNGCHIN UNIT:
President: Pu Khup Reison, Secretary: Pu Lianzamuan, Finance Secretary: Pu Thanglianpau, Treasurer: Pu Thangminlian, Adviser: Pu G.Liankhanlal, Chief of Lungchin
SSPP C.TUIVELJANG UNIT: President: Lamkhansiam Shoute, Vice Presidebt: Thangpi Guite, Secretary: Thangsuanlian, Assistant Secretary: Goulunthang, Finance: Chingngaihnem, Treasurer: Biakjem, Information Scretary: Chhung Daniel, Adviser: G.Biaklian, Unit Office: Pa Chinzasiing Inn.
Hun saulou leh manpha tak mai zat a om theih kipah thu gen kawm in SSPP in abiik tak in Deputy Commissioner Pu Lunminthang Haokip IAS, in apoimoh bang bang a kithuah pihna a piak banah Capt. Matthew, Adjutant 26th AR leh Maj. Kaushik, Commander, Suangdai COB-te kithuahpihna tungah kipahthu hiai news deih thoh tak tungtawn in gen uhi.
