Lamka ah ADC voting zoh in om. Buaina om zek.
Repoll on 6 June. Counting on 10 June 2015
Lamka 1 June 2015: Tuni in Lamka khosung mun tuamtuam te ah Autonomous District Council 2015 election neih in om hi. A tangpi a et in buaina thupi lua om a theih hi lou hi. Zingkal dak 6 gin ma deuh vel in Phungkhothang H/S kiang lak a BJP supporter te vuak in om ua, amau te singkhua a khet liam in om ua, District Hospital ah puaklut hi pah uh hi. Hiai hun a mi 2 liam te ahih leh Henkam (34) H/o Nemneilam, Gelmuol leh Ngamson (50) H/o Nengchin, Gelmuol te hi uh hi. Tua khit in zinglam dak 8 vel in S. Haijang Polling Station, Kholmun Constituency mun ah BJP supporter te leh Congress supporter te kikal a buaina om in, hiai hun ah leng mi 2 liam ua, amau te Nohmang (45) H/o Phalneichong, Kingkin leh Paosat (41) H/o Nengneikim, S.Haijang te hi ua, Sielmat Hospital tut in om uh.
Sun nunglam in Bijang Polling Station, Tuibuong Constituency ah vote ki khiat dan deihlouh ziakin BJP party worker khat in Ballot Box khat sunga ink sunglut a, tua ziakin buaina piang hi. Hiai mun pen re-poll dingin in District Magistrate in thupuan bawl hi.
Kholmun Constituency nuai ah Khengjang Polling Station ah tua dan mah in buaina om a, BJP candidate Pu Thangkhomang tapa in ballot box sung a Ink ana sunglut a, buaina piang nawn hi. Candidate tapa pen mipi leh Police ten delh mahle uh manpha zou lou uhi. Buaina a om ziak in Khengjang Polling station leng re-poll dingin thupuan in om hi. Tollen Polling Station ah Candidate Pu Thangkhomang tanu in ballot box sung a Ink a sun lut ziakin Police ten man ua, lock up ah koih pah uh hi.
Lanva constituency sung a Boljang polling station a vote capture a om ziakin, hiai mun leng re-poll hi ding in thutut ki mu hi. Huihchim a kipan thutut ki ngah dan in Molkon, Chawngchin, Santing, Saichang polling stations te ah buaina a om ziakin re-poll om ding.
New Lamka area, Rayburn lak a nupi hon ki buan om chih dan thutut om mah leh buaina lian lua gen ding om lou. Cambridge School,New Lamka leh CYA Hall ah zong buaina tomchik om zek man. Bungmual area voting pai hoih mahmah a voting percentage 67.94% pha hi. Muallum constituency a zong voting siangthou takin pai chih thu ki za. Lamka area mun tuamtuam te a zong buaina om hetlou in vote khe thei uhi.
Voters khenkhat a mun a tun ma ua a vote uh ana khiatsak khin uh ahih dan tamkhop akipan zak in om. Polling officers khenkhat te vote khiat hun bei ma in DC office mai ah ballot box-te submit dingin tamkhop in hun bei di ngak in om uhi.
June 6 chiang in Re-poll di teng in vote khiatna neih nawn ding ua, tua zoh chiang in vote simna June 10 chiah neih hi ding a, ADC election toh kisai teng 17 June 2015 ma ngei a zoh hi ding in vaisai ten gen uhi.
