Simte organization tuamtuam Simte Tribe Council (STC), Simte Youth Organization (SYO) leh Khangthah Zuun Pawl (KZP) General Headquarter te saina in tuni January 8, 2015 sunma dak 11:30 in Simte Inn, Simveng ah tutung Manipur Public Service Commision (MPSC) saina nuai a Manipur Civil Service (MCS) muthak S. Ginmuan Ngaihte s/o (Late) S. Lamboi Ngaihte leh T. Lamminlal Simte s/o T. Letkhohao te lohchinna kipahpihna leh ankuang umpihna nei uhi. MPSC nuai ah S. Ginmuan Ngaihte in MCS Manipur pumpi ah a 5na in pang a, ST lak ah a 2na a apanban ah T Lamminlal Simte in MCS Manipur pumpi ah a 10na in pang a, ST lak ah a 3na in pang hi.
Hiai hun zatna ah Rev. Dr. Jacky Simte, Superintendent, Manipur District, AGEI in thumna in hong a, L Dongchinthang, President, Simte Youth Organization (SYO) General Headquarter in Welcome Address gen hi. Thomas Mang, President, Khangthah Zuun Pawl (KZP), General Headquarter leh B. Dongzalian Simte, President, Simte Tribe Council (STC), General Headquarter te apan thugen ngaihkhiak ahih zoh in Rev. H Thangliankham makaih in pastor te’n MCS muthak mi nih te Pathian’ vualzawlna ngetsak uhi.
MCS muthak S. Ginmuan Ngaihte leh T. Lamminlal Simte te apan thugen ngaihkhiak na om hi. S Ginmuan in a lohchinna tung a kipah pihna pe masa pen KZP ahih dan gen a, a unau pih hiai banga a lohchinna kipahpih a omna tung ah kipahthu gen a, maban ah sepna taktak hon sep hun ah leng taisanlou a, nung thuap touzel ding in ngetna bawl hi. T. Lamminlal in lohchinna dia kuhkalna leh Pathian phawk poimoh ahih dan gen a, a lohchinna kipahpih a hiai bang program honsaite’ tung ah kipahthu gen hi. S. Ginmuan lam ah a pu leh a gang in le thu gen ua, T. Lamminlal lam a kipan a nu in zong thu genna hun nei hi.
STC Ghq akipan lawhchinna ngahte saliang leh puanlaisan pe tuak ua, tua banah MDC Pu Zamkhanpau leh Dr Kim Simte in zong puanlaisan silh sak tuak uhi.
Th.Doukhanmang, General Secretary, STC General Headquarter in Vote of Thanks genna nei a, Rev. S. Kaikhanmang, Director Missions, NTBC in thumna in hun khak hi.
