Lamka to Singngat/Behiang Bus Owners Association (LSBBOA) in December 31, 2014 apan Singngat-Lamka kikal gari tuanman a pungsak uh lungkim louh lahna in tuni, January 6, 2015 sunma dak 10:00 apan Singngat khaw mipi kipunkhawm in Lunminthang Haokip, IAS, DC, Churachandpur kiang ah panpih ngetna lai sun nung dak 2:30 vel in pia uhi. Thu kiza dan in LSBBOA in Lamka-Singngat kikal bus tuan man Rs 60 apan Rs 90 in khangsak ua, hiai tawh kisai in lungkimlou uhi. Zan in ZMA, Singngat makaih in mipi Singngat bazaar ah kipungkhawm ua, gari tuan man a khan lungkimlouh latsakna in Singngat apat Lamka kikal a bus tai 2, a hawm in taikiksak ua, Lamka apat Singngat taitou bus leng Singngat a tun in, passsenger te Rs 30 lehkiksak uhi.

Gari tuanman khanthu ah hun dang in leng khang ding a kihouna om mahleh ZSF leh ZYA theihpihna in khanglou ding in thupuk hi ngeita a, tua gari tuan man leh vanpuak man khang tawh kisai ZYA Singngat Unit in mipite adia panla zoulou kisa in Mass Resignation bawl uh chihthu leng zak in om hi.

Tuni a Singngat leh Tuibuang kikal Mass Rally hun ah Singngat khaw mipi Shaktiman/Truck 15, TATA DI Pickup 7, Car 3 leh Two Wheeler 20 val a kipua in DC khut ah Memorandum piakna nei uhi. Hiai hun ah DC Churachandpur in a buaina uh ni-thum sunga bialtu MLA toh kithu zatuah a saifel ding ahih dan chiam a, mipi’n ngakzoutak a ngak chiat ding in ngetna bawl hi.

Singngat mipi te New Lamka Petrol Pump Station kong ah ki punkhawm ua, YPA leh Dorcas Veng VA te malakna in YPA Hall Dorcas Veng ah mipi kikhopna neih pih uhi. Mipi ten zingkal akipan an zong ne lou ua, YPA Hall ah singpi leh nektheih nekpih in om uhi. Mipite lak a khat in agenna ah, kou a neilou te mah ngaih sak a omlou, tunitak tan annelou leh khuavot thuak in ka lungkimlouh na uh langsak mah le ung, panpih tu/ngaikhia ding kuamah omlou tel chi'n kha setak in gen hi.

Pic: PhualvaTimes.