Eimi Football League Season-III lohchingtak in zohsiang hita
Vaphual FC in Champion hihna la
Eimi Weekly panlakna nuai a kum paisa 2011 a kipankhia Eimi Football League Season-III (EFL-III) lohchingtak in Oct. 25, 2014 in Turf Football Ground, Imphal ah nitaklam in zohsiang in om hi. Closing Function hun a Chief Guest ding Pu M. Gouzamang, MDC/Executive Member, Autonomous District Council, Churachandpur chih himahleh amah om theihlouh man in Pu Thanglalmuan hon sawl a, ama’n Chief Guest min in EFL Board Rs. 5,000 panpihna dan in pia a, hiai ni mah a Final Match kimawlna vualtungtuang Vaphual FC Manager/Captain kiang ah Rolling Trophy, Cash Award Rs. 10,000, Memento leh Certificate piakkhiatna leng nei a, huai teng ban ah Runner’s Up kiang ah leng Rs. 5,000 pekhe ngal hi. Hiai hun manpha uap ding in football ngainatu mi hunkhop huai ni in paikhawm uhi.
Chief Guest min a hong kuan in a thugenna ah EFL panpih ding a MDC-pu mansa a om gige ahihdante gen a, tutung in hong tel teitei sawm mahleh khualzin khiatna phut ding a hong om man a hong tel thei lou ahihdan leng gen hi.
Final kimawlna etnop petmah a, kisuthei mahmah uhi. RFC leh VFC kimawlmite’n a siamna tengteng uh zang in kimawl ua, hun bei tan in goal khat tuak kikhum tuah uhi. Huchi in Penalty peksak in om ua huai ah VFC in zou hi.
Imphal East All Manipur Football Association (AMFA) Vice President Pu W. Manihar in leng hiai hun uap a, a thugenna ah EFL vaisaina nuai a kimawlte a pahtakdan thu tamlou gen hi. Ama’n a genzelna ah kimawlmite pen a kum uh dungzui in kimawlsak hile uh hoih a sak thu gen kawm in maban a sai nawn ahih chiang a AMFA lam toh kithuzak masa thei laileh felzawsem a sai theih ding ahihdan leng ama’n gen hi. Amah ahihleh AMFA ah leng Executive Council Member khat ahi.
EFL-III ah Clubs tuamtuam 14 kimawlkhawm ua, amaute kimawl siam in thuzoh thei mahmah ua, huaiziaktak in kimawlna tengteng abul apan atawp tan dong in etnop suak vek zou hi. Final Match om ni Oct. 25 in kimawlna taktak patma in Friendly March om a huai hun ah EFL Board’s 11 leh Final kimawl lou ding Clubs 12 teng apan mi lakkhawmte kimawl uhi.
Turf Ground ahihleh Manipur a ding a Artificial Football Ground omsun hi a, All Manipur Football Association (AMFA), Imphal etkolna nuai ah om in match khat zel ah Rs. 3,000 lasek mahle uh a mawltual bel awng man ngellou in lun mahmah hi. EFL Board Chairman in, “Manipur a ding a om masapen leh omsun hichibang a minthang Turf Ground a EFL-III Final Match sai a om theih man in ka lungkim mahmah” chi in gen hi. “Kum dangte (Season I & II hun) in leng Final Match bel mun poimoh leh minthang mahmah Khuman Lampak Main Stadium, Imphal ah zat hisek ahi,” chi in leng ama’n genbeh lai hi.
EFL-III hun sung in All Manipur Football Association (AMFA) apan referee lak in om a, amaute’n Final Match tan dong kimawlna enkai uhi. Kimawlnate apan tuailai kimawlmite toh kisai a muhdan uh amaute’n a genna uah mi bangzahhiamte lamethuai a sakthu uh gen ua, huaite minte ngei leng chiamteh khinta uh chi uhi. Huaite ban ah, vaisaidante leng a lungtun thu uleh kilawphuai a sakdan thute uh gen zelzel ua, hichizaw deuhleh a chihte bang uh leng imlou in gen uhi. Hiai in maban a EFL a kimawl touzel ding tuailaite maban a lampi hoihzaw hon kawkmuh ngei lametna om ahi chi in leng Board lamte’n gen uhi.
Tulel a EFL Board Member-te hiaibang ahi. V. Ginkhenpau, Chairman; B. Thangkhanmung Ngaihte, Vice Chairman; H.Ginbiakmang, Secretary; G. Dousuanthang, Fin. Secretary/Treasurer; Sawm Guite, Games & Sports Incharge; P. Pumsianthang, Member; Manlianching, Member; Chingi, Member; Lamhoihching, Member. Advisers in Pu Lamlun Buhril, Trivandrum leh Pu L.Nangthiankham, Lamphel pang tuaktuak uhi.
