CDSA final match ah mi 3 ki-vawliam

CDSA saina a (late) Khaikhanlian Memorial District First Division League-2014 huntawp Final Match leh Closing ceremony tuni'n Lamka Public Ground, Hiangtam Lamka ah om a, mipi a en tam mahmah in match kipat apan UKB leh RAAC supporter/fans te serious uh hi'n kilang hi.

Final match kimawlna ah Rengkai Athletic & Cultural Club(RACC) in 3-1 in United Khozim Brothers(UKB) in zou ua, buaina omlou hileh point tam mupen UKB in tuni'n Trophy + cash award sang ding uh a, himahleh buaina om ziakin CDSA in Trophy hawmkhiakna ding leh result teng suspend a, zingchiang in emergency meeting hun ah thupukna bawl ding uhi. CDSA makai khat in a gendan in, complaint dinga kilawmte thagum a hihlou in official taka complaint poimawh chi hi.

UKB Coach in buaina ven nunga CDSA makaite kianga agendan in, Referee leh CDSA official te vuakna ah UKB players kigolh omlou chi hi. Final match zawh, prize hawm ding kuan khawmui(dusk) in pawlkhat te'n Umpire vua ua, a lu ah sisan kai muh ding om in hospital ah a lu kikhui hi. Mipi sousan ziakin Police te'n delh ngalin buaina veng thei hi. Tuni match ah UKB goalkeeper in redcard mu a, player 3 in yellow card mu uhi.

Pawlkhat in midang a vuakliamte uh Pumkhanmang (29) s/o Vialdouhau of Hiangtam Lamka pen field lai ah kipuk den in thou theilou a, serious hi. A lawmpa gendan in buaina khouhdaih sawm lai vuak a om hi'n gen a, phatuam ngaite'n hospital ah va koih uh chi hi. Midang khat Vanlalpaul (27) s/o Ms Zolian of Hiangtam Lamka leng vuakliam in om hi.

Final Match zawh a Prize hawmkhe dingin Chief Guest a pang Thangjang Haokip, President, Kuki Inpi/Ccpur leh Functional President a pang T.Goukhomang, President, Zomi Youth Association te leng thawnkik uhi.

Source: Phualvatimes.