Govt School Teacher Re-deployment tawh kisai SSPP tawh School makai te ki hou uh.
Tuni zinglam dak 11:00 in SSPP GHQ makaih in, SSPP Complex Bungmual ah Government School Headmaster leh Headmistress te tel in,Manipur Govt in Churachandpur district sunga Govt School teacher tamtak re-deployment a bawl uh toh kisai kikup khawmna nei uhi.
Hiai hun ah Govt School tuamtuam akipan Headmaster/Headmistress 20 val pai khom te in re-deployment/re-allocation Govt in a bawl uh toh kisai a lungkim louh dan uh gen uhi. Order dan tak in pai leh School khenkhat te ah Teaching staff om lou ding phial bang ahi chi uhi.Aban a gen zelna uah Dr.J Suresh Babu, Principal Secretary Manipur(s) in hiai bang a order a suah mawk pen CCpur district hon gawt leh kapkha khol diak bang ahi chi ua, Government in education lam nasa tak apuah tou ding a chih na ziak ua schol head ten leng pan nasa tak a a laak lai ua, government in hiai bang a teacher tampi tak a suan khiak pen mak a sak thu uh gen uhi.
Kum dang sang mah ah tukum a governemnt school ten naupang hau zaw ua, sanction post te kim tak in om mah leh, ki daih zou lou ding khop a om ahi chi in gen uhi. Tuni a meeting hun a a gen nau ah Churachandpur district ah school tuam tuam, junior high school leh high school 41 te ah teacher te suan khiak ding order om a, himahleh, amau taang (replacement) a ding order bangmah om lou hidan in gen uhi.Hiai order pen paisuak hi leh, school naupang 10,000 val te maban ding bing mah mah ding ahi chi a gen in, order a paisuak pih ua leh, government in implement a bawl uh, Right to Education Act(RTE) kichi a phattuamna bangmah omlou ding suak ahi chi in gen uhi. Order toh kisai ahihleh apaisa 13th February 2014 a Cabinet meeting a neihna ua thupukna a laak uh dungzui a Graduate Teachers, Primary Teachers, Matriculate Teachers, Under Matric Teachers leh Head Masters (JB/PS) bangzah hiam te, Re-deployment/Re-allocation ding chi a Dr.J Suresh Babu, Principal Secretary/Education(S) in apaisa 20th February 2014 a order a suah hidan in gen uhi.
Tuni a meeting na toh kisai CDSU lam apan thu kiza dan in, thupuk na kichian tak laak chih om thei kei mah leh, meeting a tel headmaster tuam tuam te ban ah, SSPP leh CDSU ten, hiai bang a academic session pai lai tak a transfer order suah a om pen, singtangmi te simmoh na a ngai uh hidan in gen ua, government in singtang gam a governmnet school om te a hih bei sawmna uh hilou ding hiam chi a gen khawm uh hidan in gen uhi. CDSU lam ten a gen zel dan un, order pen May 17 tan a a zuuk kiik kei ua leh, student body tuam tuam te toh kithuah khawm a kiphinna nei ding uh ahihdan gen uhi.