Lamka, Oct-11:Kum 1980’s vel apan Lamka a lasiam minthang mahmah, Ms S. Chingnu in “Kon Ngilh Zou Diam” kichi Music DVD Video a bawlthak tuni nitaklam in Simveng a SYO Hall ah laphuahsiam leh lasiam-lui K.Vungzalian, ex-Minister in hongkhia hi. Aman a genna ah S.Chingnu’ late piching in siamsin naupangte’ zil dinga hoih hi’n gen a, MIL a tuansak theih hileh thupi kuai mahmah ding hi’n gen hi. Chief Host apang Ginsuanhau, MLA in lasiam masate lakah S. Chingnu’ lasakte ngaina tungtuan ahihdan gen hi. Huai ah Functional Head in H. Mangchinkhup, EM/ADC pang a,Guest of Honour in Tongkai Baite, MDC pang hi.
S. Chingnu in Album tawh kisai a genna ah khangthakte hun ah lasiam kibehlap zel ding ahihman in la a kisa sate hilou, lathak mah sa a, i late puahpha a khansak ding a deihhuai dan gen hi. Mipite’n lasa dinga hong kipanthakte a hoihlouhna uh gentam zawlou in masawn a lunglutna tawh hong kalsuan theihna ding un hasotdan, pahtawidan leh kithuahpihdan siam poimawh hi’n gen hi.Ms S.Chingnu in Radio ah Paite, Thadou leh Zou programme telin la tuamtuam 85 val khum a, Album a bawlte lakah tuni a kihongkhia pen 13na hi’n kigen hi.
SSS-I Auditorium, JNU, New Delhi ah nitaklam dak 7 in S.Chingnu Album thak 'Kon Ngilhzou Diam' honna program hun zat in om hi. Hiai hun a audio producer Pu L.T. Ngaihte in honkhiakna nei hi. Pu L.T. Ngaihte in a gen na a "i ngeina la te atamzaw thangthu ahi ta uh. Zat theih non louh tampi a om. Record a neih thoh lel ahita uh. Ahihziakin, tunitan a beitheilou leh ngaihnat gige tuh vualngaihla te ahi. Hiai vualngaihla te lusai pau la in "zawl" la i chi ua, a diktak in lawmngaihna cih zawk ding ahi. Ngeina la te lak a suakta om sun leh tunitan a kibehlap tou gige tuh hiai vualngaih la i chih te ahi." chi hi.
Hiai hun ah thugenna hun Trust Recording Studio, Pu Suakzathang Nunthuk, Pu Khatchin Langel, Pu Mang Ngaihte, Pu Richard Ngaihte (ZOL), Pu Ginza Vualzong (ZOGAM.COM) leh Minsang Guite te in nei uh hi. Pu Pumchinkhup Guite in kipahthu genna thumna nei a, zaila awihsiam McMuan S. Ngaihte in zai la sa a, program bei in nitaklam an mipi ten ne khawm uh hi.
K. Vungzalian, Ex- MLA in Album hong (Lamka)
Mr and Mrs L.T. Ngaihte in album hong (New Delhi)