Pathian in mihingte khatvei tei si ngeingei dinga ahon sehsa ahi. Kuamah sihna ahun ahong tung
chiang in a pumpelhthei ki omlou. I sihna ding naih gulgul mah ibang zawzen uhi. September 2, 2013 (Monday) in leng tuahsiatna tuakding ahihlam uh theikhawl hile uh Sweet Fall ah lawmta teng ava hoh kei hial ding uh. Himahleh hon siamtu Pathian lemgelsa kuamah a paihkan thei ki omlou ahihman in Shillong Siamsin Hostel aomlel Thangliankhual (23) s/o S. Kapthianmung of Go Cin Khup Veng, New Lamka leh Thangchinmang @ Michael L. Ngaihte(20) s/o L. Anthony Ngaihte of Zion Veng te vangtahhuai tak in va kelum kha uhi. Hiaithu zak ahihphet in ZomiThuthang NewsGroup in tulai a dinga ki thuzakna kingang mahmah Facebook ah hon kapkhiak chiang in azakha peuhmah aneu-alian, agamla-anai aomte lungsim tawng hon denga, thuakpihna thu kikhak souhsouh mai hi. Amauten lung ahon phawng diakna uh bel bangdang hilou in khatvei thu a mi 2 hinna laksaka aom ban ah, maban limchitak nei Nu-le-pa ten muang mahmah a Siamsinna maban sunzom dia Meghalaya khopi Shillong a akoih uh ahihman in I sunpih mahmah thu igenlou theikei uhi.
Thu kizadan in Sep 2, 2013 (Monday) in Meghalaya state pumpi a ILP koih dinga ngetna in bandh om a, huaini educational institution teng kikhak hi. Tua hunlem a la in, lawmta pasal 6 leh numei 2 te’n Sweet Falls en a football kimawl dingin hawh uh a, akimawl lai un football pen tui lakah kesak kha uh a, ngakik (waterfall) tui in anuailam a khawh khakna pen current hatluat ziakin lakhe ngamlou uhi. Tuahsiat ding lau in paisan sawm uh a, himahleh football pen midang a azat uh ahihman a nuamsalou in, Michael in ken kava la ding chi in vakik thak a, alawm te’n leng vadelh uhi. Himahleh Sweet Falls a tui vunna a tun un Michael buaise khin a, huaiphet in a lawmpa uh hutkhiak sawm in Khualboi leh Lk Ngaihte valut dek uh a, tui current hatlua in Khualboi hiiplut pah a, akhut nihvei doktou in huai nungsang kimu nawnlou, chi in gen uhi. Hiaithu zak ahihphet in Lamka apan Shillong aom pawlpi tuamtuam ten amun kidelhhuan in panpihna nasep nasatak in va nei ngal uhi. Ani mah in Michael luang pen mukhe ngal ua, lawmpa muhkhiak ding hungaih in azingchiang zangiak mahleh akimuh khiak ding hut theihlouh ahihman in Lamka lam puak in oma, September 5, 2013 in Rengkai hanmual ah vuiliam in om hi.
Khualboi luangpen ni 4 sung (Dakkal asim in 400 hrs sung vel khawng) Sweet Fall sung lianlou chik ah zon himahleh muhkhiak zawhlouh in omlai a, tuisiamte’n theihtawp suah in zong mahle uh bangmah musuah zoulou uhi. Lungkiak huaileh mangbat huai mahmah dinmun ah ding ahihman in Pastor makaihna inleng thumkhawmna khawng neizel uhi. Asun azan in Shillong aom nungak/tangval tampiten hiai waterfall mun ah siluang ngak in omden uhi. Routine bawl in nitak agiak ding bang ki khelkual uhi. Khasi miten ana gen dan un hiai mun ah sawtlam pek in Sweety kichi nungak atangvalpa toh a nu-le-pa te un kiten ding ana phallouh ziak un ana kelum ngeita hi. A tangvalpa toh kitawmkhe ding chi a kithukim uh hinapi a numeipen atawmkhiak zoh tak in a tangvalpa kitawmkhe ngamlou a, huai nungak heh mahmah in a kha in hiai waterfall vehden hi dan in gen uhi. Kum teng in hiai waterfall ah mi kelum om gige chi ua, huaite leng nungak/tangval khangdawnglai hi deuh sese chi uhi. Kum 2001 in leng unau Thahdoute siamsin aom nungak khat leh tangval khat in tuahsiatna ana tuakta uhi. La bang inleng ana phuahta uh hihtuak hial hi. Khasi nupi ten agendan un siluang pen alawmpan apaisan aleh alawmpa na mu ngeikei ding uh chih khawngpeuh ana gen ua, ni 7 sunga na muhzohkei ualeh na munawn kei ding uh khawngleng chi uhi. Mihing ngaihtuahna ah lungkham huai leh mangbat huaitak ading ahihman in Shillong aom Lamka miten September 6, 2012 chianga hihtheih dandan tupi, suahdul leh vanzat tuamtuam toh panga atui zawlkhiak dan ngaihtuah ding chi in thupuk uhi.
Mihing lam ah lametna bei hithet a aom nung, social work nasep asawmni zingkal uh Sep 6, 2013 dak 7:30am dingvel in siluang pen waterfall nawllam ah net (leen) a awk hong kialamtou muhkhiak in om hi. Mangbang leh lungkham a iom chiang in Toupan a mite thumna ngaikhia in ahuntak in ahon dawngzel! PTL! A waterfall hong kikhoh khiakna tuihu hat mahmah ahihman in baihlam chika lakkhiak theih ding hilou hi. Tuisiam te ading ale luahhuai lua waterfall ahihman in kuamahleng ava lakhe ngam aomlouh lai un I sanggampa uh luang lakhe ding in Robert Vaiphei & Lulun Neihsial hong kipan ua, tuisung ah tawmlut in mautawnsau penpen inleng abatlouhna mun apat I unaupa uh Khual Ngaihte luang tuh ava lakhiata uhi. Amaute hangsanna ettonhuai leh phathuai isa a, Pathian in asanggamte uh kianga nahoih semzom theizel ding in damna pia hen ichi ahi. Shillong ah sunna program saulou zatna neih in oma, huai hun ah YPA, SYO, KSO, Kuki Innpi, GSA, ZSP, HYA, ZSU, TCU, KZP, etc etc tea pan sunna thu ngaihkhiakna oma, tuazoh in a innlum, a nu-le-pa tenna, a sanggam leh tanau lainate kiang zuan ding in nitaklam 5:00pm vel in Lamka manoh in puakkhiak in om hi. Misi pen ahihleh September 7, 2013 in kivui ding hi. Lusunna tuak Michael & Khualboi sungkuante, tanaute, lawm-le-vualte, leh a ittu tengteng I sunpihthu I puang uh ahi. Hiai leitung haksatna khenlam a akha ua Pa kianga tawldam ta ding lah ahi ngal a!!! Shillong aom ei Manipur singtangmite I pankhawm dan uh thupi in phathuai mahmah mai, atawpna hong hihlouha, abul patna hong hi ding leh hichibanga unau-sanggam ki panpihpih tuah dingmah ahi chih mitampiten gen uhi. I unaute uh sihna tungtawn in ilak uah ki itna, kilemna, muanna leh bitna hong khang semsem leh chih deihthu igen ahi.
Misiluang zonna tuisiam ten a neihlel lai uh
Shillong ah a sunna mipi tamtak in nei
Source: Zogam.com facebook group
Sweet Falls: Why you didn’t bear your name??? ~By: Ngaihte Lk (A friend of Khualboi & Michael)
Amasa pen in Sweet Falls thiltung gelh thei leh hilh chiang thei lai dia damna hon pia Patihan tung a kipahthu ka gen masa pen2 ahi. Theihsiam a haksa a, thuaksiam leng a haksa hi. Thakhat a manghilh leh chillum toh valh mai a mangbatna, thawmhauna hon dai di le ahi kei hi. BIBLE in “Mite in bangbang a geel zongin Topa' deihna bang bekin a piang ding hizaw hi” (Paunak 16:1, Teddim LST) ana chi khinta hi, huai ziak in Topa deihna bang in thil tung ahi chih a haih vual ahi kei hi.
Pau dang (Chin/Simte) ale gelh thei di himah leng, mitamzo in Paite pau I theihsiam ziak un Paite pau mah in kon gelh khe dia, News or social media a thu tampi omsate a neukha2 diklou a omzek chiang in lungsim a nuamsak kei tuam mah2 a, huai jiak in simple deuh in a incident kong taklang nuam hi. Huai bannah, hiai thiltung a deih huai hetlou leh mulkim huai tak mai tuahsiatna a hon delh/buaipih u-leh-nau, aneu-alian, asak-akhang, anai-agamla leh Org. tuam2 bannah mimal phattuam ngai tampi te kiang uah, kou a lawmten kipah thu kon gen masa pen uhi. Na kipiak zoh nate uh Topan’ aleh tamzaw in hon vualzawl ta hen.
Dt. 2nd Sept’13 zing khovak kilawm tak mai in hon vaidawn a, Meghalaya pumpi a ILP negtna ziak in Khasi Student Union (KSU) in bandh a bawl ziak in gari tai di leh muh di a om kei a, nidang niteng hinkhua toh a kibat louh ziak in thawmhau na chi khat bang a om zezen hi. Bandh ziak mah in college teng2 le a kikhak a huai bannah college ten exam neipah ta di ahih ziak un hun lem sa in hoh din (Sweet Falls ah) ka kithukim uhi. Ka kingak khawm ua, ka kingak khop na uah naupang 1 in BALL hon kimawl pih2 a, huchin ka kim tak un ka ball kimawl na pen uh le ka po suak ta uhi.
Mi 8 ka pha ua, numei 2 inleng hon zui uhi, dawr kihong a omlouh ziak in nektheih lei na di a om het kei a himah leh Assam Rifle’ste canteen pen ana kihong ziak in Coke leh chips tuam2 amun a nek di ka lei thei ua, huchin lampi a pai kawm in ball toipen toh kimawl kawm in ka paisuk2 ua, dk 1:30 PM in amun (Sweet Fall) ka tung ua, amun a et na dia kibawl na apat en kawm leh tawldam in tui khong dawn in ka khawl jek ua, huchin anuai lam ka juanta uhi.
Amun a hih di dangle om tuanlou ahih man in lawm ten ‘THROWBALL’ kimawl ni uh hon chi ua huchin suang kimawl na a zat d khawng ka tom khawm ua kimawl kon panta ua, kimawl sawt lou himah le ung gim dan a tuam mah2 a, ka khawl jek ua huchin throwball pen gim huai lua chih ziak in VOLLEYBALL bang ka kimawl uhi. Ka kimawl lai un leng lawm ten ball bang a tui lak ah apai jel ua, huchin amah-leh-amah in sehnel (leingoi/sand) omna lam hon juan diai2 jel hi. Gim vek ta ka hih ziak un ka nek theih puakte uh nek di dan ka sawm ua, huchia nekhawm in nek zoh in pai di vai ka sawm ta uhi (ball pen a om na kua man ngaihsak kha non lou). Ahi tak a gen di in chu huai ball pen omkei leh sight-seeing lel dia hoh di ka hi ua, himah leh huai ball ka toi khak ziak un ka kimawl kha lel ka hi uhi. Ka nek lai unle Khual mah2 in kei kia ‘group photo’ I kilak tei2 di uh ahi chi in 3 vei bang hon gen man a, ken leng lawmte kiah gen in lim khong kila in huai zoh in khat-khat in ka paita uhi (dak ka phone apat ka et in 03:39 PM chet ahi).
Lawm dang teng a pai khin vekta ua, kei a nu-nung pen in ka pang a huchin a lui apat a mual kal khiat na tung dek petmah ka hih un khat in ball ka manghilh lam uh hon phwak phiing a, huchiin amah toh ball pen lak sawm in ka pai tou nawn ua, lawm dangte kiangah ana paisuk un chih ka vaikhak uhi. Lawmpa toh amun ka tun tak un, a ball pen a thuk leh a tui kia naih petmah in ana om a, amasa ale ‘amam leh amah hon pawt khe jel hina ven’ chi in ka ngak bawl ualeh a ball in pawt di dan hon kisa mah2 non ta kei hi. Huchih laitak in Khual le hon tungtou a, ka thum un kihou khawm in a tui a thuk lo dia I lak dah di ua a ball pen a thak in lei zo ni uh (ball pen naupang pa a ahih ziak in) ka chih ale amau le hon thukim pih ua, lawm dangte kiang lam manawh in kon paisuk nawn uhi.
Michael ka tuak masa pen ua, amah kia a thu om dan teng gen in, paisan ni uh ka chih lai tak in aman ‘athak lei2 ngailou’ hon chi pah a, ‘ken tulai sum jong ka neikei, ball lei nang jong neilou, ken tui ka leuh thei, ka va la di’ chi in a tai tou mai hi. Adang teng in tui ka leuh theih louh ziak uh adiam ah, huai hun in chu Michael ka muang petmah ua, kou le lawm dangte kiang ah, ana ngak non un lawmpa ka va zui him2 di uh chi in ka delh tou uhi. A mak mah2 chu, suang tung ngen a kipai tou himal leh huai hun in Michael chu suang tung khong ah a tai tum vut2 mai a, kuaman ka pha jou het kei uhi (amah mi thau sim hi zomah). A nung a delhte lak ah, Khual pen amasa pen a, himahleh chapal anal ziak in suang hon siik khial a, a suang tung a kitat kha in a khuk lak nasa in a huum a, kenle amah kiah “Khual, na khe anat luat ale hiah ama ngak mai in, kou ka va delh di uh” chi in amah ka taisan uhi (awl2 a hon paitou zo ahi ngei2 d).
Amun ka tun phet un, Michael pen chu apuan ana suah khin chet in, tui sung ah a kidive lut chet ka mu ngal uhi, tui leuh thei ahih ziak mah in amah ball tawm a hon kik di ngak in mi thum in ka na ngak uhi (Khual, a khonung a hon tung toh). Ball gei a Michael pen 1 vei hon kilam a huai tak in chu kole ‘ball lakha dek2 ta ahi’ ka chi ua, himah leh hon tum nawn a, a ball peel in 1 vei hon kilaam nawn a, huai tak in cu koule abuai ahi chih ka chian mah2 ta uhi. Amun dungzui in I muh dan le a kibat louh ziak in, lawm khat pen in ‘suangte mankha a tomchik sung hon kidawk ahi, huai zoh tum nawn’ chin hon khonung hilh hi. Michael buai muh phet in tui kileuh theilou ngen om ka hih man un, a tui sung a tai suk jel, a sehnel tung a taitou jel in, lungsim buai tak in ka om vek laitak un anuai lam a hon na ngakte pasal 1 hon tung tou a koule ‘lawmpa tui a tum ahi, adang tengle va sam vek in’ chin ka sawl kik pah uhi.
Huchi kawm kal ah, Khual in, “I vek in I kilen d ua, kumsuk le lawmpa hut khiat theih danom di ahi” hon chi a, kei a nai pen a om ka hih man in akhut ka leen pah a, a baang zuul a zui kom in lawm 1 pa pen sam in ka kikou jel hi (Lawm 1 pen tui lai lak a ding in Michael pen hon dok hiam chih en a ding ahi).
Kei toh Khual pen khut a kileen in awl2 in a baang zui in ka kumsuk ta ua, tui gawl tan di khawng a hon thuk tak in thakhat in a tui in hon leh hip kik ta a, ka nih un ka tumsuk tuak ta ua huai a ka kikhah kha ta uhi. Ka nih un ka kipek ua, aman le hon mat sawm jel, kenle ka mat sawm jel a, himahleh a tui pen a hat luat ziak in kipek a ngaih toh ka kiman man kha thei kei uhi. A gei a suangte kawt gige ahih man in mat theih di vual ahi het kei a, anal mah2 hi. Michael en a amun laitak a ding pa ka buai uh hon muh tak in amah le kou kiang lam zuan in hon tai phei pah a, kou lut na ah hon lut ale tui in a hip ziak in a buai nawn a, himal leh a pawt khe thei pah vanglak hi. Huai tak in amah le hon lut ngam non kei a, a dai (shallow) na deuh khat a a khut zan in hon na ngak mai hi. Khual toh ka nih un ka kipek tuak2 ua, tui a tum suk jel, dawk tou zel in ka om ua, huai tak in ken a baang (suang) chih mai di hi inte ka sik kha a, huai jang in ka kisawn tou sak a, lawm pa khut zaak pen mankha in hon kai khe thei uhi.
Kenle Khual mulou ka hih manin amah kiah ka dong ngal a, aman le “athuk nalam a tumsuk ahi, 2 vei hon kilaam a aban kimu nawn lou ahi” chin hon hilh ta hi. Huai tak in lawm dangte (anuai lam a hon ngakte le hon tung tou ta ua) hon tung tou ua, numeite hon kap ngal uhi. Pasal tenle hih di dan a thei zou ka om tuan kei ua, tuisung khoh tai jel, a sehnel tung khoh pawt khe jel in ka om ua, ka mang hi hen la kikhanglou hileh bang a chi hut huai ngut2 mai hi, himahleh huchi ahi thei nawn kei a, mangbang tawpkhok a om in, THUMNA nei bang in ka om ua, minit 15 khong peel ka om zoh nung un lawnte 1 in “huai ah lawmte khat hon kilaam ei” hon chi khia a, a luang (sita ahih ziak in, luang kon chi mai di) pen a kilaat zoh sawt lou in a tum suk nawn pah hi. A kilaap na mun ka luut un a tui a gawl (neck) tan bang tum ahi a, jong di dan lah omlou ahih manin khe jang in ka baan daap kual thoh uhi.
Khat in a gil a hon sik kha a, huchin a khut a hon man in hon kai a, kou leng ka va panpih ua sehnel tung ah ka nga ua, hih theih dan2 chi in agil khawng a sawn in, artificial breathing khong ka bawl hang un a pahtuam di a om nawn ta kei hi. Michael luang pen hon kilaam tou hiven chi in Khual le hon kilaam touhdi up na toh a tui lam ka mit suan nawn ua, himah leh lamet bang ana hikei hi. Huai tak in lawm numei 1 in “hiai a network omlou ahih ziak in, a mual tung I va kaltou dia, hilh theih2 I va hilh d” chi in kei toh amah ka kaltou ua lawm dang teng huh na di ngak in ka nuse ta uhi.
A tung lam ka tun un, hilh theih2 hilh in, huai zoh sawt lou nung in mi aban-aban in hon tung khawm ua, dakkal khat nung khong inchu amun ah gari leh mipi a dim vekta a, a kho hausate (Dobar Shnong) siamna ziak leh hon deihsak na ziak un Madanriting PS a hon paipih ua FIR hon bawl pih uhi (ka phone anuai lam ah lamte kiangah ka nutsiat jiak in dak ging jah ka thei nawn kei hi). Amun ka tun suk nawn un Michael luang pen sawt lou nung in a mual tung ah puak touh ahi ta.
Thil lamdang/mak pi2 tamlou ka theih a om a huaite le kon gen vanglak d:
1. Lawm tegel in hon tum san un, a tui pen khang mah2 in ka thei mawk ua, huai lou inle Khual luang a kizon lai in nitak lam chiang in a tui pen zingkal lam sang in a tam zo gigen ka thei mawk hi.
2. Khaul luang amutu in ka va pang kha kei na a, himah leh a kaihkhiat na a ka pang kha nawn a, hiai hun a lamdang pen chu: a banyan vom toh lut himah leh a banyan di dan a om hetkei a, huai bannah akhut toh akhe veilam ngawng tuak2 a nylon khau kivial sa in a om mawk pen ahi (kou khau ka keng kei ua, khau kikhih man di le ka hituan sam kei uhi). Tui in a pei2 ziak a kivial kha hi zen2 le2 bang dia a khut toh a khe ngawng veilam tuak2 ahih se? A pum khong ale kivial thei thou hi a, chih khongle dawn theih louh tampi om ahi.
## Na thumna uhleh panpih na ziak in ka kipak petmah ua, himah leh media leh social network site a neu chik2 thil omdan hei lamdan na a om chiang in lungsim tawng anat ziak in incident tung pen hon hilh chian ut ka hi zo.
~~~Kakipak~~~