VPC General Conference-cum-Cultural Festival 2013 chu matzaw hita
“Ken chu mipi ginum ka ngai ui ti zawk ding ka ti ahi” Khatkhotong Baite
“Khiangkawi hilo ah Kiangkawi ti zawk ding a hi” – Secy, Custom & Culture VPC
“Vaiphei te hi keng 3 : Vaiphei, Sailo leh Suantak ah ding a hi” – Secy. Orgn
Vaiphei upa Pu Holkhopau Baite puan silsak

Vaiphei People’s Council (VPC) General HQ in VPC Community Centre, Bethel Veng (New Lamka) ah zani kipat VPC General Conference -cum-Cultural Festival, 2013 a mat uh chu tuni matzaw a hi tai. Tuni hun matna chu dak 10:00 AM kipan ding ti himaleh Chief Guest ding Pu Thangso Baite, MP (Lok Sabha) chu New Delhi ah Parliament session ah pang, New Delhi a kipat a hung del a hiziak in programme chu dak 11:45 chet in a kipan thei pan hi. Chief Guest pa hungtun masang in lasathiam minthang mama C. Minthang, SN Thanga, Khanmang, Kim Joycee leh midang dang zaila’n mipite a awilim ui. Chief Guest hungtun in VPC Moreh Block te malatna gate bul leh Hall sung in pengkul mut in, mipite’n Chief Guest vaidawnna in a chutna mun chiat un a ding ui.

Programme chu Khamneithang Vaiphei leh Hoilian Rose te’n zeitak leh thiam tak mai in a mapui ua, hun hawn pauchapna chu Rev ST Kaia, Exe Secy. Manipur Synod in a nei hi. Zia zaw achun YVA New Lamka unit te mapuina tawh nam lapi “Suantu bul Zahawng” chu mipi’n dinsa’n a sakhawm hi. Mipi leh VIP chiakhawm te vaidawnna thugenna Pu Thangkhojang Baite, VPC cabinet in a nei hi. Zia zaw a chun VPC puitu masa fam ala change chu Pu Khatkhotong Baite, President VPC Gen HQ malatna suunna hun minute khat nei ahia, zia zaw a chun VPC (VNO a la kiti) Ex-President damlai sia Kiangkawi puan silsakna a nei zawm ngal hi. Zia hun a chun mi 9 a pang thei ua, mi 2 chu damlona ziakin a pang thei ta puau. Zia hun zaw tawh kitawn in VAA te’n “Puitu ginum” kiti lasakna a neizawm ngal ui.

VPC President hun lazawm in, VPC sung ah tawmngai diak VPC Leilon Block President chu Memento piakna a nei a, mi tawmngai diak Pu Genlal Khaute, Special Contractor; Pu Henlianthang Thanglet leh Pu Kapboi te thilpiak piakna a nei hi. Zia chun President pu’n thugen sunzawm in, “Lasa te’n puitu ginum ka ngai ui a tiu a, ken chu mipi gin um ka ngai ui ka ti” tia a gen chun mipite’n khut a beng zuazua mai ui. VPC Office sak dan leh tu ah Hall kisa hi MP pu’n Rs. 20 lakhs a piak ziak ah sakpat a hidan taklang in, pankhawmna lo ah sakzaw mai hilo ding a hidan a gen hi.

Zia zaw a chun thugenna Special Guest Pu Ngamlal Baite, MDC/ADCC Chandel in a nei zawm a, ama’n “Zia programme ah ka hung pan leh ngam ka ngainai tina ahi” ti’n a gen hi. Baite sung ah pawl dang umlo a, VPC ngen ah um ding ah thupukna um a hidan a gen a, maban ah lawtinna a um ngei kinepthu gen in VPC kithuapina’n Rs. 15,000 a piai.
Special Guest Pu Henlianthang Thanglet, Addl CEO/CCpur in thugenna a neizawm hi. Ama’n Vaiphei te mi hangsan a hiziak in chang ah le khawitak mun ah cheng ngam in, nasatak in a kithethang a, ziaziak achun pau leh chawndan le kibang veklo a hidan a gen hi. Ziaziak achun tuni VPC Cultural Festival hin phatchuamna liantak a nei hi ti kawm in Rs 5000 in VPC a kithuapi hi.

Special Guest Pu KT Vaiphei in tawt leh tak kawm in Police ah sem te’n mi matlo tilo panpi theina dang neilo a hidan gen in, “Ka hung matlo ua leh ka hung panpi nau a himai hi” a ti chun mipi a sutai mama hi. Vaiphei thuak neu chuamlo, la phuak lam, lekha lam leh thildang dang ah talent hawitak nei kitam mama a hidan gen in, kuama phakla na ding umlo a hidan a gen hi. Eima kimuang ah, gunchu taka pang dingin chialna a bawl hi. Govt scheme leh panpina bep ah kineplo a, thanuam leh kukal taka sepna lam chiat ah pang dingin le chialna a bawl hi.

Functional President ding Demmang Haokip,Vice Chairman,ADC/CCpur pan theilo ziak in Pu Paolal Haokip, MDC/CCpur in apang hi. Ama’n a thugenna a chun, Vaiphei te hi mite’n masawn mama a hidan agen ua, zia chu a dik ma ahidan a gen hi. Culture leh Chirstian hina kikalna a nei pua, thil zosia a phatna lam ah matthiam pawimaw asakthu a gen hi. Thingtang lam i hung kipatnau puaphat a pawimaw mama a, zia ding a chun hausate’n mawpuakna liantak mai a nei ui. Ama’n Rs. 10,000 in VPC a kithuapi hi.

Guest of Honour ah pang SK Vaiphei, EM, ADC/Sadar Hills in a thugenna achun, ziagual programme ah pang ding ah chial ah a um kipak um a sakdan a gen a, a pantheina zosia pang ding ah kimansa a hidan a gen hi. Ama’n Rs. 10,000 in kithuapina a piai.
Chief Guest in athugenna achun, Culture iti hi mi nam hina a hia, Vaiphei te i culture ding ua chun lekhathiam leh inchen-lo chen kitup hi chu dawi um masapen a hidan a gen hi. Mi thudik leh gunchu nam te ah mite’n ei hiat ding uh a dawithu a gen hi. Khawvel khangto hat mama a hiziak in, i chawndan luite etthakna hun mangzo mailo ah maban a ding ah modern culture laklut pawimaw a hidan a gen hi. Lekha thiam na’n mite a siam a, officer chate’n hawitak in a chateu a enkawl thei zawu’ ti’n a ma politics ah a lutma leh lutzaw ah a thiltuak etsakna le a gen hi. Himaleh, mi tamtak officer a hi phat ua leh a gam nusia in milak-salak ah gammang deng ziang atam ua, ziagual chu i hiding leh officer le hida hitiu ti ah a gen chun mipi a sutai mama hi. Mi genthei leh haksa te sawmdawl ding ah Pathian hung siamna hemillo ah, i sepna i zaw nung tak lehle i gam ma ngaina dingin a chial hi. Gensiat a tuaklo na ding ua numei te’n a malam ding a khual ua, pawsal te’n zite lau lo a, lungsiat zaw dingin le chialna abawl hi. Pathian hezing kawm ah i chawndan ding ua a dawidan a gente sep a hichun nam maban ding Pathian in lemguat ngei ding a hi a ti. VPC Gen HQ kithuapina ding in ama’n Rs. 50,000 a pia’i.

VPC Gen Secy Pu Khamneithang in report a bawl a, VPC nasepdaw te genlatna a nei hi. Zia chu copy chu mipi te lak ah hawpdaw in a um hi. A report na a chun, “VPC in case tamtak kikhen lak in nupa’n kalthu 90% lam ahi, i kingaitua thak uh pawimaw mamai” ti’n a gen hi.
Pu Hauneilal, Secy Orgn. in report a piakna achun, VPC chu keng 3 mangcha ding a hia, zia keng 3 te chu Manipur ah Vaiphei, Mizoram ah Sailo leh Burma ah Suantak te a hiu. Mun chuam leh gam chuam dungzui ah min chuam maleh sa khat a hidan a gen hi. Vaiphei upa ding ah namdet Baite a hidan gen in, a dam nalai Vaiphei upa Pu Holkhopau Baite chu Kiangkawi puan a silsak hi.

Pu Liankhawthang, Secy Custom & Culture in report a piakna lak a chun, Khiangkawi puan i tisek uhi Kiangkawi puan tizawk ding a hidan a gen a, zia chu “Kiang” iti zi te genna a hia, zi, pawsal puan ga sakzo te chu mithupi ngai ahidan agen hi.

Tuni programme matna kalvan in VPC Chongkhawzo Block, VPC Gangpimual Block, VPC Tuiliduang Block leh Block chuamchuam te’n Cultural Dance leh Modern Folk dance show na anei ua, amau chu kipakman Rs. 2000 chiat piak in a um ui.

Kipakthugenna ST Liana, Cabinet VPC in anei a, hunkhakna chu Rev L. Khupbawi Vaiphei in a nei hi. Programme chu nitaklam dak 4:45 ah chai a hi. Programme uap mipi tam mama in, hall pawlam, compound sung zosia mi a dim ziang hi.