Tuni (28/12) nitaklam 4:30 in Lamka a om admins ten Tabitha Home vehna leh thilpiak (anntang half bag 1) piakna kinei hi.

Hiai hun zatna ah akuanlam akipan Cee Eel in makaih in kikhopna sawtlou kinei hi.

Thumapi saulou gen in, ZOGAM.COM in hunsawtpi pek akipan Tabitha Home veh utna lungsim a kinei gige ahihdan leh ZC tomkimtak in hilhchian a tuazoh in thumna nei in hun kizang tou hi.

Heutupa Hexwiz in thilpiak piakna hon nei a paikhawm ten khut ki beng damdam hi.

Thilpiak piak zoh in inntek lam akipan (Mangpu Tonsing) in hun hon zang hi. Aman a genna ah, ZC in nahon phawk khak zenzen uh kipaklua ahihdan nasatak in gen hi. HCN toh kisai naktak a panlak hi a, tu in maban ah Cable Digitalize sawm ahihdanleh a van ding bangkim leng hongtung ta hin gen hi (hiai thu kuamah kiang a ka genkhiak ngam naiou, nou kahon hilh ahi). Cable subscriber te thohkhawm tungtawn a Tabitha Home tuni tan tatsatlou a pai thei ahihdan a gen a, Pathian' vualzawl tuinaak gaihsenglouh leng om ahihdan gen hi. Lamet phakhetlouh a ZC in vehna akineih kipaklua ahihdan naktak in gen a, huai in nakpitak in hon thathousak hi. Maban a leng pangkhawm zel ding in hon chiam a, ama hun sung in naupang ten self introduction kineih chiat uhi.

Innteknu (Zoram) in a genna ah, Tabitha Home ah naupang 10 om ua himahleh khat in pasal hon neihsan ziak in tulel in naupang 9 omlel uhi. Tu in mabanzek ah 10 a phak na'ng un naupang khat lakbeh kisawm hi chi hi. Mun leh mual thu ah Tabitha Home omna nidang in zu leh sa leh khamtheih-guihtheih hihna mun hi a, atunglai in kiim leh kiang ah kikapna phim muhding om gige a, huchibang mun himahleh Pathian hehpihna ziak in tunichiang in tuabang te muhding omnonlou in Tagah te kepna munpi suakta hi. Dai kilkal a mi himahle ung nou ten nahon phawkphak uh, Pathian' honsawl na hi uh ka chilou theikei chi in sawtlou thugenna nei hi.

Tuazoh in, tawpna leh ZC adia thumsakna Inteknu in hon neihsak in program kizou hi.

Program nuamtak zatzoh ahihin, vekpi in lemlakna zong kineikhawm nainai hi.