Apaisa Oct. 2, 2013 in YPA Hall, Laimanai, Imphal ah The 54th Siamsinpawlpi Imphal Block Annual Conference & Awards Distribution-cum-Presidential Election, 2013 lohchingtak a neih in om. Hiai hun ah Imphal Block sung a Unit 5 (nga) omte apan in item tuamtuam lahna a om a, Block Level Awards tuamtuam Education toh kisai leh Sports toh kisai in hawmkhia na leng neih in om hi. Kum 2011-2013 sung vaipawte hun a bei toh kiton in Block Advisers leh Block Committee Members tengteng kiang ah Certificate of Recognition piak vek in om uhi.  Hiai program pen hunpi nih in kikhen hi a, hun masa ah Pu T. Manga Vaiphei, Hon’ble MLA, Henglep A/C Chief Guest in pang a, Guests of Honour in Pu V. Tualthang, Addl. Director, Customs & Industries leh Pi V.L. Roui, IFS pang uhi.

Hun nihna ah Chief Guest in Pu Phungzathang Tonsing, Hon’ble Minister, Health & Family Welfare / GAD / CADA pang a, Guest of Honour in Pu Dr. N. Khaizalian, IFS pang hi.   Hun masapen a Pu T. Manga Vaiphei in a thugenna ah SSPP a pahtakdan gen kawm in i rights i theih zahzah ua i duties uh leng i theih uh poimoh ahi chi hi. Midangte etton pawlpi ahihna ah tunung chiang a leng tua sang a naksem apang ding in hasuan hi.

Guest of Honour Pu V. Tualthang in a thugenna ah Pasian lau a diktattak a pan ding ahi, diktatna tellou a nasemte kuamah kuitung tuan lou ahi chi hi. Guest of Honour Pi V.L. Roui in laisimna lam chauh en lou a lam tuamtuam a kitaitehnate leng et ding ahi chi kawm in saptuam hi in politics ah hitaleh role model (etton leh ngaihsan) kichian khat neih a, panlak hoih a sakthu gen hi. Ama’n US President Barack Obama bang ettonhuai a sakdan leng naktak in gen hi.

Hun nihna ah Chief Guest a pang Pu Phungzathang Tonsing in tuni pen Gandhi pianni ahihtoh program tuamtuam a zatna hun ua a ngaihtuahna ah ‘Gandhian Thoughts’ a thupi dante leh Khristian sahkhua toh leng kituak mahmah ahihdan gen hi. Ama’n a thugenna ah thil thum chiamteh ding gen a, huaite ahihleh; omdan hoih, sepna khatpeuh hoihvek chih leh sahkhua limsak ding ahi chihte gen hi.   Omdan toh kisai a genna ah pupate’n chiindan hoihtak ana nei sek ua, huaite i etton a i zuih touh zel ding uh ahi chi hi. Sepna lam toh kisai ahihleh koipeuh ah a dim-in-dim phot leng phatuam ngeina ding ahi chi a gen kawm in sepna khat sep sung ngei a leng sepna sangzaw delh touh theih lai ahi chi hi. Sahkhua lam toh kisai a genna ah ahihleh mi bangchituk in pang mahleh a sahkhua a limsak keileh bangmah hi tuanlou ahihdan gen in, kikhopnate limsak poimoh ahi chi hi. A tawppen a poimoh ahihleh nu-le-pa zahtakna ahi chi hi. Hiai tungtang a gensauna ah pil leh siam kisa a i nu-le-pate simmoh a i omleh bel bangmahtan kitung tuanlou ding a, khenkhatte’n bangtanhiam a tun chiang un amau suangtute simmoh mawk ua huai hoihlou ahi chi hi.

Tuni a hunzek nihna hun ah Chief Guest Pu Phungzathang Tonsing in item tuamtuamte ah kipahman sum pevek a, SSPP Imphal Block huhna ding in Rs. 20,000 pia hi. Hun khatna Chief Guest Pu T. Manga Vaiphei in SSPP Imphal Block huhna ding in Rs. 20,000 mah pia hi.   Program sung in kum 2013-2015 sung SSPP-IB President thak ding a uncontest a ching Pa Khamthianlal kichiamsakna SSPP-GHQ apan Election Commission in sai ua, huai hun ah SSPP-GHQ Standing Committee a Chairman Pu M. Jamchinthang in kichiamsakna nei ngal hi.

Block President apan thu kingahdan in, incharge kipiakna pen hun lemtang masa khat ah neih hipah ding a, huai ni in annkuangluina leng neih sawm ngal uhi.

~Eimi Weekly | October 06, 2013

{rss uri=https://picasaweb.google.com/118095921257227603922/SSPPIBConference2013Album limit=200}