Hmar FC in Tamchon 2014 Champion la

8th NE Tamchon Football Tournament 2014 Final program zan 29th November 2014 nitaklam dak 5:30 velin Ambedkar Stadium, New Delhi ah neih in om hi. Closing ceremony program zat in om a, hiai hun a lasa siam tuamtuam Red light passengers, Roslyn Lalumpui leh Maker Kashung ten zaila oi uhi. Tamchon Official te a kipan in welcome address leh presentation hon neih zoh un North East Dance group te a kipan in Lion dance leh Bihu Dance lah in om hi. Chief Guest Joint Secretary, Ministry of Sports in Hmar FC leh SSPP FC players te inspection a neih khit in nitaklam dak 7 in Final match kimawlna ki pan hi.

Stadium sung ah Hmar FC leh SSPP FC fans te dim mitmet ua, husa ngaih mahmah hi. Nampuan chiat a kizem in stadium sung etlawm sak mahmah hi. Final kimawl team te siam tuaktuak ua, ki bei thei mahmah uhi. First half ah goal ki khum zou kua mah om lou hi. Second half a SSPP FC lam a kipan in Ngangam in goal khat hon khum masa a, huai khit sawt lou in Hmar FC akipan Thompson in goal hon din zou pah non uhi. Huchi in goal ki khum beh zou om tuanlou in time hong bei ta hi. Extra time first half ah SSPP FC ten penalty hon mu ua, himahleh ball goal post tung lam a leng in khum lou uhi. Hiai penalty a missed pen un Hmar FC te tha pe mahmah in, hong ki neh mahmah uhi. Extra time a le goal ki khum beh a om louh ziak un Penalty shootout neih in hon om hi. Penalty shootout ah lang lam tuak ua goal khat tuak khum lou ua, penalty a leng hong ki draw nawn uhi. Penalty pek di mi nih tuak behlap ahih nung in, SSPP FC lam ah khat in hon khum louh ziakun Hmar FC ten 7-6 in vualzawhna hon la uhi.

Chiampion team Hmar FC ten cash prize 5 lakhs la ua, runners up team SSPP FC ten 3 lakhs sang uh hi. Tua banah Third Place latu Hornbill FC in 2 lakhs la uhi.

Individual prize chiamteh khak khenkhat te:
Best Striker: Tluanga (SSPP FC)
Best Player: Ngurneilal Ngurte (Hmar FC)
Best Defender: Daniel L Hmar (Hmar FC)
Best Goalkeeper: Senapati FC
Best Coach: Senapati FC

MORE PICTURES HERE: https://www.facebook.com/media/set/?set=oa.759529177466525&type=1