2nd Siamsinpawlpi Suangdoh Block Meet zang uh
Lamka, Nov-28: Singngat sub-division sung Suangdoh khua ah Nov 27-28, 2013 sung ‘2nd Siamsinpawlpi(SSPP) Suangdoh Block Meet-cum-Presidential Election-2013’ zang uh a, tuni’n Suangdoh mipite’n khawnawl apan Community Hall tan Khuallian a pang Ginsuanhau, MLA(Singngat A/C)leh Kikhopna Uktu Langkhanpau Guite, Chairman, ADCC zawng uhi. Khuallian 2te mipi’n a zawnlai un lampi nawl ah thau lawng 20 vel avangkim in kap uh a, mipite leh khawsung poimawhte MLA kianga ngenkawm in phuisam uhi.
Inntekpa in G. Suanchinpau Guite, MDC(Lungthul); Khualzahtakhuai in M. Gouzamang Guite, EM/ADCC; Upa (Dr) G. Chinkholian, Chief of Suangdoh; Lalrobul Fimate, MCS, SDO/Singngat leh Zindeihthawh in Lianzapau Samte, President, SSPP Gen HQ; Siamnunlian Valte, Exe.Dir. V.K. Tawna College te’n ni 2 sung hunzatna ah uap uhi.
Khuallian in a thugenna ah siamsinna poimawh mahmah a,gamsung makai hoih omna dingin leng siamsinna ah kinga a, maban ah Suangdoh mipite’n siamsinna lam a kalsangzaw suantheihna dingin Govt School leh Missions School te gawmkhawm dan ngaihtuah theile hang hoih mahmah ding chi hi. Tuinek tawh kisai ah kumnawn sunga zat theih dingin solar tungtawn a tuinek laklut theihna din hausapa tawh panla lel uh hi’n gen hi. Inn 300 val adin langva kihawm mahleh khawsung ah inn tamtak kikhuhlou in Lamka a zang maimah hunkhop om hi’n gen a, mipite poimawh tuinek leh electric leng etzui hiding chi hi. Suangdoh khua ah electric tungta hi’n kigen hi.
Kikhopna Uktu in agenna ah siamsinna ah chihtakna tawh pang din hasuan a, mi chitakte lawhching uh hi’n leng gen hi. Gam-le-nam adia mi zattak leh makai hihtheihna dingin thuman poimawh masa a, ngaihtuahna tangtak nei a lungsimhoih neih ngai hi’n gen hi. Tup-le-ngim siangthou neikawm in thaltang in target a neih bangin tup nei a khangkhia hiding in deihsakthu gen hi. Tup-le-ngim a lawhchingte’n leng Pathian vualzawlna ziaka lawhching hihdan thei a mahni kisialna a zanglou din thuhilh hi. Siamsinna lou in khawsuahna ding omlou ahihman in siamsinna mah pibawl in kembit ni chi hi.
Khualzahtakhuai SDO/Singngat in namsung leh khawtang adinga student orgn- te khuampi khat leh apoimawhpen ahi uh chi a, siamsinna lam ah naktak a pang dingin leng hasuan hi.President, SSPP Gen HQ in agenna ah Suangdoh khua a siamsinna bawlhoihna dingin SSPP panlakna tawh Class-IX tan zilna dinkhiak hi a, bialtu MLA leh MDC te banah khaw hausa leh makaite panlakna tawh lawhchinna om a, himahleh Class-X tan om nailou ahihman in kumnawn sunga Class-X tan om theihna dia panlak poimawh lai chi hi.
Presidential Election ahkum 2014-16 sung vaipaw ding candidate 2 om lakah Pausonthang of Suangdoh telching in om hi.

Addl DC in tuni’n ICICI Bank thak hongkhia
Lamka, Nov-28: Maniram Sharma, IAS, Addl DC/CCpur in tuni zinglam in Lamka Police station khangzek Tedim Road-Zomi Colony junction kianga building thak ah Chief Guest apang in ICICI Bank Limited hongkhia a, Rev Stephen Chinzathang, Sr. Executive Secretary, ZPCS in Pathian kiang ah thumna in lan hi.
Chief Guest in a genna ah kum 3 vel paisa in CCpur dist ah UBI leh SBI branch kia om a, hileleng tu’n bank branch tuamtuam 15 vel omta a, bank kihongthak ziakin CCpur dist ah law & order a hoihsaktuan ban ah development om ahihdan taklang chi hi. Lamka a bank te’n competition nei in customer-te adia hoih leh service hoih kidemna om a, mipite mah ahampha gen hi. Tuni a bank branch kihongthak panpihtheihna tuamtuam a panpihding in Dist Aministration lam mansa hi’n gen hi.
Tuni a official a ICICI bank kihongahihleh Aug 2013 vel apan transaction kipan a, ATM 1 leng om in mi 80 val in bank account hongta hi'n kigen hi. Bank account honna ding in Rs 7700/- poimawh a, minimum balance Rs.5000 poimawh hi. Tunia bank kihong thak bel Manipur adia ICICI branch 6 na hi'n kigen hi. Huai branch a Manager bel Nirmal Kumar Moirangthem in hi a, bank honna ah Imphal apan Manihar Sougaijam ,Cluster Branch Manger Manipur Head, ICICI in leng uap hi.

Med Supdt in Press te kimuhpih
Lamka, Nov-28: Dr N.Paul Ginthang, Med Supdt, Dist Hospital in tuni sunnung Media- te kimuhpih a, JSSK program tawh kisai a patient transportation, damdoi supply leh diet supplement supply thu mipi theihding a hilhchian kawmin , Dec 1,2013 akipan zat hidin gen hi.
Damlou puakna ding(Patient transportation) tawh kisai in S.Vunglam Ngaihte of Bungmual ; Lhunmang of B. Aijalon leh Thangkhochinson Ngaihte of HQ Veng hi uh a, South lam ah Mata tan cover hiding a, West ah Pearsonmun , Tuinom, North ah Kholmun, Kangvai tan, East lam ah Muolvaiphei tan cover ding uhi. Damdoi supply dingin Max Th Paulemmuan of Emmanuel Medical Store ; Thangsuanmang of M/s Emergency Pharmacy leh Palal Thangluai of M/s L.K Pharmacy hia, Dist Hospital a naunei te’n amaute kiang ah damdoi la in Rs 350 tan damdoi man govt in piaksak ding a, diet supplement ah Ms.Mary, Whole Care&Self Help Society, in normal devivery te' ni 3 sung leh caesarean operaton te ni 7 sung ni 1 in Rs.100 value supply ding hi'n gen hi.
JSSK tawh kisai Dist Hospital kia hilou in Sinzawl PHC; Saikot PHC; Sagang PHC; Parbung CHC leh Singngat PHCah leng zat hiding a, govt in fund leng pekhin hi'n D.Khuala Vaiphei, Dist Program Manager, NRHM/CCpur in gen hi.

Director leh ZEO teng meeting ding
Lamka, Nov-28: H.Deleep Singh, Director of Education (S) makaih in Nov 29, 2013 in Directorate of Education (S) a Conference hall ah Hill dist a ZEO tengin meeting neiding uh a, huai hun ah ATSUM in Education tawh kisai demand a neihte tawh kisai a govt leh ATSUM in kihouna a neihte genkhawm ding uh chih ahi hi.

Nov 29, 2013 in Protest Rally
Lamka, Nov-28:Rengkai ah Nov 26, 2013 a Vaite mi 3 Gas Stove zuak dana val vialte laka tel Md Nafis Malik(26) of s/o Y. Malik of Meerut, Uttar Pradesh(UP) tulela Tribal Colony a KR Lane a om in nupi khat kilawmlou taka khoihsiat(rape) a sawm mawhpaihna leh tununga hibang thil deihhuailou a tun nawnlouh deihna ziakin Hmar Women Association(HWA) Rengkai Unit leh a kizoppih pawl tuamtuam kigawmte makaihna in Nov 29, 2013 zinglam dak 10.00 in Lamka Public Ground akipan DC/CCpur office tan mipi hon Protest Rally pai ding uhi.

Lampi a tui luanziak in accident tam
Lamka, Nov-28: Lamka Public Ground gei, YPA Gen HQ hall lutna sakdeuh Tipaimukh Road ah Bungmual Tanky apan khawpi sung supply-na tuilong(pipe) akeh ziak in tuikai hun ah 2-wheeler taite kipuk sekin accident om mun mahmah chih hi. Zan zinglam in leng 2-wheeler 5 leh tuni’n 2-wheeler 4 kipuk a, niteng in 2-wheeler accident om gige hi.Accident tamzaw ah student school kaidingte telkha hi’n kigen hi. Tipaimukh road kuak ziakin lampi lai ah tui vung a, gari taite hat tai kei mahleh lampi nal ziaka kipuk zel uh hi’n kigen a, akisaipih te’n pipe bawlhoihkin dia deihthu tamtak in gen uhi.

HWA in mawhpaihthu puang
Lamka, Nov-28: Hmar Women Assn(HWA), Rengkai Unit in Nov 26, 2013 a Gas stove pua leh zuak kawma Rengkai khawsung a inn ah ban lut a, nupi kum 19 mi sualsawm Md Nafis Malik(26) s/o Y. Malik of Meerut,UP tulelin Tribal Colony KR Lane a om leh a lawmte driver Md Thoiba(30)s/o Md Juma Khan of Keibung Makha Leikai,Thoubal tulela Old Lambulane a om leh Paravej(24) s/o Iqbal of Meerut,UP tulelin KR Lane a omdan uh HWA Rengkai Unit in mawhpaih uh a,tunung in hibang thil tun nawnlouhna ding in theihtawp suah a panlak hiding a, state govt tan kia hilou in Centre tanpha ah panlak hidin taklang uhi.
Hiai thil tawh kisai tunitan a apanla SP/CCpur, SDPO, OC, IO leh a seppihte uh, Moirang, Bishnupur leh Imphal police,khawtang pitu, Rengkai V/A, Val upa,HYA, HSA,khawsung mipite, students orgn leh phatuamngai pawl tuamtuam leh mimal tunga kipahthu genkawm in tununga leng kithuahpih zel dingin chial uhi.
Hibang thil deihhuailou tunung in Rengkai ah a tun nawnlouhna ding in Vaite leh kuamapeuh Identity card hiam address proof omlou himhim phalna beiin Rengkai khua ah thil zuaka vak vialvial leh mi innsung a lut himhim mat hita ding uh a, a tung ua thiltung a om leleng bangmah a genthei kei ding uh chih ahi hi.Dukan leh omna ding in mi theihchianglouh himhim kuaman inn luahsak lou ding in leng theisak uhi.

ZYA Emergency Cabinet meeting
Lamka, Nov-28: T.Goukhomang, President, ZYA Gen HQ tenna inn Simveng ah Nov 29, 2013 zingsang dak 7:00 in ZYA Gen HQ Emergency Cabinet meeting om ding a, huai ah thu poimawh tuamtuam genkhawm ding uhi.

Advocacy & Networking meeting om
Lamka, Nov-28: Kuki Inpi/CCpur leh IGSSS saina in tuni zinglam in Tuibuong a KIC office ah Advocacy & Networking meeting om a, huai ah KWU, KKL, KSO, KWHR leh orgn tuamtuam apan tel uhi. Amau tulela haksatna a tuahte uh report bawl uh a, maban a panlak ding dan kikum uhi. KKL te’n report a bawlna uah CCpur-Behiang road NEC tungtawn in kibawl a, CCpur-Tipaimukh road pen BRTF te’n enkai in hileleng Henglep area lampi hoihlouhluat ziakin accident tam mahmah a, CCpur dist ah gari accident 50% bang Henglep area hi’n gen uh a, accident om hun ah KKL-te buai thei mahmah uh hi’n gen uhi.

BSF te’n thaukap hun ding puang
Lamka, Nov-28: BSF Subsdiary Training Centre(STC)/CCpur a BSF personnel training pawlin Mission Compound suahlam pang a Pearsonmun,Mualkoi leh Gangpimual khua apan sim-tum(south west) lama om thau kapna mun(firing range) ah zingsang dak 5.00 akipan nitak sawttan thau leh grenade a kap uh Nov 30, 2013 tan ding himahleh Dec 1-15, 2013 tan hidingin behlap uhi. Huai hun sungin a kimnai a khua omte akipan kuamah huai biala lutlou ding leh ganvulh leng a khahzan omlou ding in DIG, STC BSF CCpur in theisak hi.

Army te’n UTLA cadre 1 mankhia
Lamka, Nov-28: Police apan kizadan in Nov 25, 2013 nitak dak 6:45 velin 7-Assam Rifles te'n Tuibuong ah KNO/UTLA cadre SS Lt Kaikhosiem(28) s/o H.Douva of Kaimai, Tamenglong dist mankhia in amah akipan 7.65 mm pistol 1, atang 5 leh Nokia Mobile 1 mukhia uhi. 7-Assam Rifles te'n Imphal Police khut ah pekhia uh a, CCpur Police te'n a case lasawn in zan in CJM court ah dingsak uh a, CJM in Nov 30, 2013 tan Police custody a omdin phalsak hi. Huai tawh kisai in CCpur Police te'n FIR No. 92 (11) 2013 CCP-PS U/S 400 IPC & 25 (1-C) Arms Act registered uhi.

ZDF in thusuah bawl uh
Lamka, Nov-28: Stalin Zo, Secy(Info & Publicity) Zou Defence Volunteer(ZDV) in thusuah bawlin a taklatna ah Simte Tribe Council(STC) in Zoumunnuam ah Nov 25, 2013 a thiltung tawh kisai a thusuah a bawl uh lamdang sakthu puang uhi.Huai thusuakin a gendan in ZDV cadre khat leh a tapa in Nov 23, 2013 a Zoumunnuam a phaklai un Dongzalian in mipi fuih in ZDV cadre leh a tapa amai uh tuamsak in Community Hall ah liam khop in soisa uh a,hileleng ZDV cadre leh atapa lamdang takin taikhe thei uh chi uhi.
ZDV thusuak in a genzeldan in hun paisa ah ah leng mi pawlkhat in Orgn hihsiat sawmsek mahle uh amau pawl kidek teitei uh hi’n gen a,tutung in leng khutkha pawlin a thuakte’ damdoi man ding pia a kihoulempih ding in theisak uh hi’n taklang uhi. Hileleng huai thulaklou uh hi a taklang kawm in Dongzalian in a theihsiam ding thil a thuk uh hi’n taklang uhi.ZYO Lamka Block a Secretary ahihna ah zah mahle uh ZDV cadre leh a tapa tunga a thilhih mawhpaihna sangpen piaktak hi’n leng taklang uhi. STC te’n thil omdan suichian masalou a mawhsakna thusuah a bawl uh nuamlou sakthu ZDV thusuak in taklang a,tunung in ZDV minsiatsak tupna kuama’n ching nawnlou ding in theisak uhi.

SUUNNA
Upa K.Ngilkham(79) f/o K.Nengzathang of Dorcas Veng, New Lamka zan nitak in internal bleeding in si a, tuni’n YPA Hanmual, New Lamka ah kivui hi.
S. Khamsuanlian (38) s/o S. Paukhogin Ngaihte (Chief of Dialkhai, Thanlon Sub-divn) zan nitak dak 8 velin a khawnawl ua kawl(gorge) ah kia a, alawmte’n kintakin akhua uh Dialkhai pawtung mahle uh nitak dak 9 velin si chihthu kiza hi. Misi ahihleh tuni nitaklam in Dialkhai hamluah ah kivui hi.

IMPHAL NEWS
Cabinet meeting om ding
Imphal, Nov-28 : Chief Minister’ Cabinet Secretariat ah Nov. 29, 2013 nitaklam dak 3:00 in Chief Minister O. Ibobi makaihna in Cabinet meeting om ding hi. Huai hun ah agenda tuamtuam 12 genkhawm ding uh hi’n thutut kingah hi. Tuate lakah District Council-te khut ah power piakkhiak ding(devolution of powers) tawh kisai genkhawm thakna(review) om ding a, tua banah Manipur Assembly Session 6veina Dec. 16, 2013 akipan om ding chih tungtang leng genkhawm ding uhi. Huailou in Manipur a Armed Forces Spl Powers Act kikoih ahun bei dia om leng kumkhat behlap ding tawh kisai genkhawm ding uh hi’n kigen hi.

India ‘B’ (Manipur) team in champion la
Impha, Nov-28: Imphal Polo Ground a ‘7th International Polo Tournament 2013’ ah tuni’n USA leh India ‘B’(Manipur) team in final match a kimawlna uah India ‘B’ (Manipur) team 5-3 a vualzou in champion hihna la uhi.Huai a Chief Guest a pang Manipur & Nagaland Governor Dr. Ashwani Kumar in champion team India ‘B’(Manipur team) te Trophy leh cash prize Rs. 50,000 pekhia hi. Aman a thugenna ah Polo kimawlna ziakin leitung gam tuamtuam ah Manipur minthang mahmah a,huai ziakin Polo kimawlna a kizang sakol chikhat ‘pony’ kichite thelthanglou dia hoihtaka kepbit banah a phazah punsak poimawh ahihdan gen hi.

Mary Kom’ autobiography gelhkhia
Imphal, Nov-28: DM College a Assistant Professor Dina Kom in Indian Icon leh Olympic Broze Medalist MC Mary Kom’ hinkhua tangthu(biography) a gelh Harper & Collins publishing company in December,2013 sungin suah(publish) khe ding uh chihthu om hi.Huai autobiography honkhiak ni ding bikhiah hi naikei mahleh Imphal leh Guwahati banah India gam a khawpi tuamtuam adiakin Mumbai leh Bangalore ah leng honkhiak hiding a, huai munte ah Ms Mary Kom in uap ding chihthu om hi.

Chinese delegates te’n Sangai Festival en ding
Imphal, Nov-28: Zhejiang Provincial Committee a Vice-Chairman Chen Jiayuan makaihna in China apan delegate 7 in Nov. 29, 2013 in Hapta Kangjeibung a Sangai Festival, 2013 zatna mun hongpha ding uh hi’n kigen hi. Amau Nov. 29 nitaklam dak 3:10 in Air India lenna in Imphal Airport hongtung ding ua, Minister for Commerce & Industries, Chief Secretary, DGPG Principal Secretary (Com & Ind), Govt. of Manipur ten ana vaidawn ding uhi. Amau ni 2 sung om ding uh a, tua hunsung in Sangai Festival a telin Manipur a historical places mun tuamtuam leng pha ding uhi.

Meltheihlouhte’n Bus driver pimang
Imphal, Nov-28 : Imphal-Guwahati kikal a passenger service Royal Rajdhani Bus (No. MN- 01/1737) a driver zan zinglam dak 5.30 velin meltheihlouh mi 3 ten Nagaland state sung Viswema mun akipan pimang uhi. pimang a om Thoudam Rame (31) s/o Ningthem of Luwangsangbam Matai Awang Leikai hi a, Viswema mun a tun un Maruti Van atuang meltheihlouh mi 3 te’n khawlsak in driver kaikhia in pimang uhi. Huai tawh kisai in Inter State Bus Owners Association te’n Thoudam Rame khahkhe ding in ngen uhi.

Dec 6 akipan Cachar Rd khak ding
Imphal, Nov-28: Cachar Road Educational & Sporting Assn akipan thusuak in a gendan in Masnipur govt tawh Dec 14, 2012 a thukimna bangin March,2013 akipan in Cachar Road lamlian bawlhoihna nasep kipan ding chih himahleh govt in nasep apat tuanlouh ziakin huai bial mipite’n lamlian hoihlou ziakin haksatna genvuallouh tuak uh hi’n taklang uhi. Huainung in govt in nasep pat hiding chisek mahle uh a pat tuanlouh ziakun Nov 20, 2013 akipan ni 15 sung(Dec 5,2013 tan) a nasep a pat tuankei lailai ua leh Dec 6,2013 akipan in hunchiam omlou ding Cachar Road ah indefinite bandh puan hiding chi’n Cachar Road Educational & Sporting Association pawlin tuni’n thupuan bawlthak nawn uhi.

Ukhrul ah gamsa zalentak in kizuak
Imphal, Nov-28 : Ukhrul district ah gamsa zalentaka kizuak hi’n kigen hi. A kigendan in Wild Life(Protection) Act, 1972 om mahleh Ukhrul district ah thuneituten huai Act zanglou uh a, mi a ut peuhin bazar ah gamsa chikim zalentakin zuak uh hidan in kigen hi. Huai tawh kisai state leh district administration in ngaihsaklou ua, tua om lel government sponsored 7th Exhibition-cum-Sales of the NERCORMP kichi ah leng stall khat in Falcon (gamsa) kichi khat mipi muh dinga takkhia in zuak hi’n kigen hi. Huai hun aGuest of Honour SK Chourasia, IAS, DC/Ukhrul in Falcon kizuak a muhtakin stall neitute kiangah kintak a lakhe ding in theisak chihthu om hi.