50 YEARS OF SIAMSINPAWLPI SHILLONG GRAND FINALE
AND
ANNUAL CONFERENCE-CUM-DISTRIBUTION OF AWARDS

Place: U Soso Tham Auditorium
Date: 2nd October, 2013 Time: 11:00 am
Comperes: N. Pauzakhup & Mary Ngailianching

Chief Guest: Pu Langkhanpau Guite, Hon. Chairman, ADC, CCpur, Manipur
Functional President: Pu Lianzapau Samte, President, SSPP GHQ,
Special Guest : Pu N Munish Singh, Regional Officer, ICCR, Shillong

Apaisa October 2, 1963 in heutu masate’n pawlpi leh siamsinte khualna in Shillong ah Siamsinpawlpi ana phutkhia uhi. Huai nung tatsatlou chihtheih phial in heutu tuamtuam in i pawlpi uh ana zuun in siamsinte ading in sep theih dandan in ana pang uhi.  Pathian kepna in a kum 50 chinna (Golden Jubilee) October ni 2, 2013 in lawhching takin zat zoh hita hi.

A programme patna thumna Pastor Khankham, Local Pastor, EBCC Shillong in Shillong a zaila awih siam tuamtuam te’n SSPP Lapi hon vek uhi. Hiai hun zat zoh in Golden Jubilee Celbration Commt (GJCC) Chairman, Pu T Kiamlo hangzo, IDAs in mipi leh heutu hon paikhawmte vaidawenna hun hon zang hi. Huaizoh  in SSPP JHQ Shillong President Pu L Chinkhomang Ngaihte in heutu masate leh a phamsa heutute  zahna hun hon neihpih hi. Hiai hun ah Advisory Chairman Pu Thangchinlian Guite in leng va dingpih hi.

Zahna hun zoh in, Secretary in ahon bawl Siamsinpawlpi Shillong khangthu a tomkim a report na Tangval Joshua in simkhiakna hon nei hi. Huai kawmkawm in limlak leh SSPP khangthu a mi poi moh tuamtuamte projector apan ki kap khia hi.
Hiai teng zoh in Education Department te makaih in 2012-2013 sunga kong tuamtuam a lawhchinna ana ngahte pahtawina hun hon zang hi. Huchimah bangin SSPP Shillong in leng Huetu masate pahtawina Memento a sungte/tanaute a omom kiangah piakhiakna a neih banah, Chief Guest leh General Headquarters apan hon uapte leng pahtwaina Memento te piakkhiakna nei hi.

Hiai hun ah SSPP Shillong in ana kum khat paisa apan ana buaipih Golden Jubilee Souvenir ‘Siamsin Thugousiah Vol-V’ Chief Guest, Pu Langkhanpau in honna nei hi. Chief Editor Pu Vungzamuan Valte in Souvenir tungtang toh kisai tamlou a gen zoh in, a hall sung mah ah zuakna leng kinei ngal hi. Complimentary copies heutu hon uap te banah Chief Guest pu kiangah leng piak khiak in om ngal hi.

Zaila bangzah hiam mipi’n tai tak a angaih khiak zoh un, Chief Guest in thugenna hun zang hi. Hiai huna ah Chief Guest in Siamsinna a pomoh dan agen banah, khawpi a om eimite chouna hun in zang hi. Aman a genna ah khawpi a khosa te’n leng I kipatna chiat ah mun poimoh tak len kha ihi a chih banah, I pianna gam ngilh lou dingin ha suan hi.

Special Guest in leng a thugenna ah Paite-te Shillong hi’n North-east a a poimoh dan uh a gen banah, amah mah leng Paite-te a ngaihnat banah, a kipolhkhamna programme te uh nuam sa thei mahmah ahihdan gen hi.

Functional President in a thugenna honpat in ‘Shillong-te bilhek zekdia’ hong kuan ahihdan hon genpah hi. Aman Shillong SSPP a poimoh dan a gen banah, ei Paite kampau te’n I paidan uh et thak a poimoh dan gen hi. I gam dinmun uh balhoih a poimoh dan a gen banah, siamsin khangthak dingte hanthawn na leh a deihsak laintak toh a thugenna hun khak hi.

Programme hih piching mahmah nih om a, huaite ahihleh NEHU Zomi kichi eimi kipawl khawm te’n Pupa kizepnate kilawm tak leh nalhtak mai in lahna hon nei uhi. Huaite banah Shillong a taltak deuhte kipawlkhawm ‘Paite Cultural Troupe’ te’n I tawndan leh laamte lahna kilawmtak hon nei uhi.

A programme pai hun sungin Shillong a zaila awih siam tuamtuam te’n mipi biltai huntawk takin a vangkim in lasak hun nei zel uhi. Hiai hun ah Zorock, Chingmuankim, Lunkim, Florence Lianching, Lalzom leh Thangkhanmuan, Moibiaklian, Mary, Khawkhawl, OMG te’n mipi taitak in programme kizat hunsung koih uhi. Huai banah Nongthymmai Boys Team te’n leng entertainment item ‘Music Vdo Falshback’ lahna nei uhi. Mipite limtak mai in koih zou uhi.

Hiate banah Sports Department saina nuai ah 50 years SSPP Shillong red carpet photo shoot nah un nei uhi. Hiai ah a ut peuh kilak theih dingin camera mansa diam in koih uh a, a programme bei toh kiton in a lemlakte print sa leng hawmna nein gal uhi.

Pu P Langbiaklian, Secy, GJCC in kipahthu genna hun a zoh in Programme khakna Pu Rev Biakmuan in hon nei in mipi te khelah takin in ki khen uhi. Mipite paikawm in zaila awih siam te’n ‘Dialdial in diamdiam leng…’ chih la toh mipi inlam zuante khakhia uhi.

Nitak hun in SSPP GHQ palai hon uapte, SSPP JHQ Shillong Executives leh Advisory Board, leh ADC Churachandpur Chairman, Pu Langkhanpau Guite toh kipolhkhawmna hun poimoh tak zang uhi.Hiai hun ah Pawlpi maban paiding dan leh eimite  toh kisai thu tuamtuam kikup khawmna hun in zang uhi.  Hiai hun ah ankuang sawk khawmna leng nei gal uhi.